फिलिप्‌पि 2:1 - आठपहरिया

¹ पाक् खानि खिरिस्‍टङि आलिसिनाँ आँट् टोग्‍माना रिङ् युङ्‌ग्‍वा नि? पाक् उन्‍ङाना मायालाम्‍मा सान्‍तोना टोक्‍माना रिङ् युङ्‌ग्‍वा नि? पाक् खानिङा सेङ्‌सेङ्‌ना हाङ्‌सालोक् साङ्‌गाति आचोगुएट्‌टुम् नि? पाक् खानिलोक् ठिबाङ्‌ङा आरको माया हिट्‌नुङ् दाया चोक्‍माना निङ्‌ग्‍वा युङ्‌ग्‍वा नि?

फिलिप्‌पि 2:1 Cross References

लुका 2:25

हिट्‌ना बेला सिमियोन ओलोडुना याप्‌मि यरुसलेमङि युङाना॥ उन् माङ्‌हाङ्‌ङाना रिङ् टेन्‍ना याप्‌मि डाना हिट्‌नुङ् माङ्‌हाङ्‌ङाना सेवा चोगाना॥ उन्‍ङा इस्‍राएलि छोङ्‌चिगा काहिङ्‌मेप्‍बा डाङ्‌बाङाना लाम्‍बो पुयेट्‌टुना हिट्‌नुङ् माङ्‌हाङ्‌ङाना सेङ्‌सेङ्‌ना हाङ्‌सा उन्‌लोक् युङासाना॥

युहान्‍ना 14:18

आङा खानि याङ्आछाडिगा गाड्‌डे पोक्‍नेनिन्‍गा, आङा फेरि खानि सोरि टाङा॥

युहान्‍ना 14:27

“आङा खानिलोङ्‌सा हाङ्‌हाङ् पिनाढानाँनि॥ आप्‍पे आङाना हाङ्‌हाङ् खानि पिनाँनि हिट्‌नुङ् नाराङा आपिना गाड्‌डेना हाङ्‌हाङ् माखाक्॥ खानि निङ्‌ग्‍वा टुक्‍नेनुम् हिट्‌नुङ् किट्‌नेनिन्॥

युहान्‍ना 17:13

“टरो हाट्‌ले आङा खान् सोरि काट्‌नागेट्‌नाँ॥ हिट्‌नुङ् हिट्‌नागाँगा उन्‌चि निङ्‌ग्‍वाङि आङाना हारकाङा उइप्‍टुवाक् नुङ् नागा रिङ् आङा नाराङि लिङाना बेला डोक् खानि लोनाँनि॥

मुलिचेला टोॽवा 2:46

हिट्‌नागा ठिक्‍ए निङ्‌ग्‍वा ओचोगुङ् लेम्‍बासेम्‍बा माङ्‌ठानाङि उछुमागा डागा, उन्‌चिगा पाङ्-पाङ्‌ङि माङ्‌खोइ ओचोगा डागा, हिट्‌नुङ् आनान्‍दा चोक्‍सा हिट्‌नुङ् हारका लिसा चामा-ठुङ्‌मा ओहान्‍डुजोए॥

मुलिचेला टोॽवा 4:32

सोब्‍बे बिस्‍वासिचिङा ठिक्‍ए निङ्‌ग्‍वा ओचोगुए॥ हिट्‌नुङ् उन्‌चिलोक् युङागा थोक्‌चि “ना खान्‍ङाना ना आङाना” उपिक्‍नेयाट्‌नि हिट्‌नुङ् उन्‌चिलोक् लिसागा थोक्‌चि सोब्‍बेङा ओहान्‍डुजोए॥

रोमि 5:5

हिट्‌नुङ् आनि चोगुम्‍ना आसाङा निरासा आचोक्‌निना, पोङ्‌भोने माङ्‌हाङ्‌ङा आनि औधि माया आचोक्‍ना रिङ् उन्‍ङा आपिडाना सेङ्‌सेङ्‌ना हाङ्‌सालाम्‍मा आनि ठाहा टोगुम्‍टुम्॥

रोमि 8:26

हिट्‌नाडेडोक् सेङ्‌सेङ्‌ना हाङ्‌साङा चा आनि पाक्‍चा चोक्‍मा हिनिम्‍ना बेला घुवार आफायुक्॥ हिट्‌ना बेला खोड्‌डे पारिक् बिन्‌टि चोक्‍मा कोन्‌युक्‍ना, आनि ठाहा टोग्‌निम्‍ना, टरो सेङ्‌सेङ्‌ना हाङ्‌सा आप्‍पेङा माप्‍मालोक् हिनिम्‍ना रिङ्‌ङि आनि निङ्‌ग्‍वालाम्‍मा बिन्‌टि आठाङ्‌युबियुक्॥

१ कोरिन्‌थि 12:13

आनि याहुदि नुङ् चा, पानिछोङ्‌बा नुङ् चा, कामारा नुङ् चा, कामारा माखाक् नुङ् चा, आनि सोब्‍बेङा ठिक्‍ए सेङ्‌सेङ्‌ना हाङ्‌सालाम्‍मा ठिक्‍ए येम्‌ङि बाप्‌टिस्‍मा लिसेसिए, हिट्‌नुङ् आनि सोब्‍बेङि ठिक्‍ए सेङ्‌सेङ्‌ना हाङ्‌सा युङैसे॥

१ कोरिन्‌थि 15:31

आम्‍भु-आन्‍झाचि हिट्‌नुङ् आनो-आन्‍झाचि, छेम्‍बा डोक् आङा खानि लोनाँनि, “आङा लेन्‍सेन् सिमा कोन्‍ना रिङ् आङ्‌डुएट्‌टुङ्॥” खानिङा टाङ्‌बा येसु खिरिस्‍टङि बिस्‍वास आचोगुम्‍ना रिङ्‌ङा आङाना आड्‌डिक् आचाप् टायाना रिङ् माङ्‌हाङ्‌ङा ठाहा टोगुटु॥ हिट्‌नुङ् हिट्‌डेडोक्, नाहि आङाना दुखे सोरोक् आड्‌डिक् टुक्‍ना रिङ् छेम्‍बा डोक् नुङ् उन्‍ङा ठाहा टोगुटु॥

१ कोरिन्‌थि 3:16

पाक् खानि आप्‍पे माङ्‌हाङ् पाङ् हिट्‌नुङ् माङ्‌हाङ् ओहाङ्‌सा खानिङि युङ्‌युक् नुङ् खानिङा ठाहा आटोक्‌निम्‍नै?

२ कोरिन्‌थि 13:14

टाङ्‌बा येसु खिरिस्‍टङाना मायादाया, माङ्‌हाङ्‌ङाना ओमाया हिट्‌नुङ् सेङ्‌सेङ्‌ना हाङ्‌साङाना साङ्‌गाटि खानि सोब्‍बेलोक् उलियाक्॥

२ कोरिन्‌थि 2:14

टरो आङा माङ्‌हाङ् पोए-पोए ठाङ्‌सुङ्‌टुङ्, पोङ्‌भोने उन्‍ङा आनि सोरोक् खिरिस्‍टङि बिजाएङाना लाम्‍भोङि आलाम्‌टिमेट्‌युक्॥ माङ्‌हाङ्‌ङा ख्‍वाप्‍पालेङ् खिरिस्‍टङाना ठोना बारेङि छिन्‍मा लाउङ्‌सा चा आनि घुवार आफायुक्, हिट्‌नुङ् ना ठोनाम्‍बाक् बुङ्‌बुङ् नाम्‍ना आट्‌टार गाड्‌डेना ए॥

गालाति 4:6

हाट्‌ले आनि माङ्‌हाङ् ओछालेट्‌चि ए, हिट्‌नुङ् माङ्‌हाङ्‌ङा उइछाङाना ओहाङ्‌सा आनि निङ्‌ग्‍वाङि आठेन्‍डाबिडाइसे, हिट्‌नुङ् हिट्‌ना हाङ्‌सालाम्‍मा आनि उन् “हाउ आब्‍बा, पाबा” नुङ् छेम्‍मा हिडुम्‍टुम्॥

गालाति 5:22

टरो सेङ्‌सेङ्‌ना हाङ्‌साङा माट्‌टु गाड्‌डे काचोक्‍बा याप्‌मिङा नाड्‌डेगा टोॽवा चोगुटु, उन्‍ङा याप्‌मिचि माया चोगुचिचि, खुसि लियुक्, हाङ्‌हाङ् लियुक्, आङ्‌मा काहिबा लियुक्, याप्‌मिचि दाया चोगुचिचि, आरु नुलोक् मेट्‌टुचिचि, बिस्‍वासिलो लियुक्,

एफिसि 4:4

आनि सोब्‍बे येसुङि बिस्‍वास काचोक्‌चि ठिक्‍ए येम् गाड्‌डेगा ए, हिट्‌नुङ् सेङ्‌सेङ्‌ना हाङ्‌सा चा ठिक् एना ए॥ हिट्‌नाडेउङ् खानिङा आसा आचोगुम्‍ना हिट्‌ना ठिक् एना नुना आसिक् लाउङ्‌सा माङ्‌हाङ्‌ङा खानि माछेम्‌डिए॥

फिलिप्‌पि 1:8

आङा खानि टुब्‍माना आड्‌डिक् निङ्‌ग्‍वा चोगुङ्‌ना रिङ् छेम्‍बा डोक् ए नुङ् माङ्‌हाङ्‌लाउङ्‌सा ठाहा युङ्‌ग्‍वा, पोङ्‌भोने खिरिस्‍ट येसुङा खानि माया माचोगि गाड्‌डे डोक् आङा चा खानि माया चोक्‍नाँनि॥

फिलिप्‌पि 3:3

पोङ्‌भोने छेम्‍बा डोक् माङ्‌हाङ् ओयाप्‌मिचिउम्आनि गोलो टे, आनि हाङ्‌साङा माङ्‌हाङ् माङ्‌ध्‍यान् चोगुम्‍टुम् हिट्‌नुङ् खिरिस्‍ट येसु उनिङ् चोन्‍डुम्‍टुम्॥ आनिम्‍टे याप्‌मिचिङा ओचोगुएट्‌टुना रिति थितिङि भोरोसा युङ्‌निम्‍गा॥

कालास्‌सि 2:2

खानि ख्‍वाप्‍पाङा आँट् टोगानुम् हिट्‌नुङ् खानि खानिङि माया चोगानिउङ् एक्‍केउ लिसानि नुङ् आङा नाड्‌डे चोगुङ्‌ना॥ हिड्‌डे लिसानाँ खानि निङ्‌ग्‍वाङि आड्‌डिक् बोल्‍लेउ आलिसिउङ् सोब्‍बे माङ्‌हाङ्‌ङाना रिङ् बुजा चोक्‍मा आहिडुम्‍टुम्, हिट्‌नुङ् माङ्‌हाङ्‌ङाना ठोबाना रिङ् डोक् खिरिस्‍ट ए नुङ् मिसेन् आनिसुम्‍टुम्॥

कालास्‌सि 3:12

पोङ्‌भोने खानिम्‍टे माङ्‌हाङ्‌ङा ओयाप्‌मिचि लिमा मासेगिगा हिट्‌नुङ् उन् लाउङ्‌सा खानि आसाम्‍डेसिए, हिट्‌नुङ् उन्‍ङा खानि माया माचोगिटि॥ हिड्‌नाड्‌डेउङ् खानिङा याङ्‌छामा ओटोगुगा याप्‌मिचि घुवार फाडानुम्‌चिम्, दाया चोगानुम्‌चिम्, मेयोक् लिसानि, सोजो लिसानि, आङ्‌मा कोन्‍ना रिङ्‌ङि निङ्‌ग्‍वा पिडानुम्॥

हिब्‍रु 6:18

हाट्‌ले माङ्‌हाङ्‌ङा आनि चामारसिङा आपिडे हिट्‌नुङ् बाचा चा चोगुए, नागाचि इप्‍पोक् रिङ् फेराँ लिनिना, पोङ्‌भोने माङ्‌हाङ् माङ्‌जो चेक्‌निना॥ हिट्‌नाड्‌डेउङ् आनि उन् सोरि सुराछे टोक्‍माउङ्‌सा खाडिगाँ आनि टोकानाङि आयुङ्‌साबिडाना आसा टोग्‍माना ठेना आँट् टोगुम्‍टुम्॥

१ पाटरुस 1:2

पाइले डोक् माङ्‌हाङ् पाबाङा खानि आप्‍पे ओयाप्‌मिचि चोक्‍माउङ्‌सा मासेगिए, हिट्‌नुङ् सेङ्‌सेङ्‌ना हाङ्‌साङा खानि सेङ्‌सेङ् माचोगिए॥ हिट्‌डेउङ् खानिङा येसु खिरिस्‍टङाना रिङ् आखेम्‍सुम्‍टुम्, हिट्‌नुङ् उन्‍ङाना ओहेलिक्‌ङा खानि चोख्‍याँ आलिसिएसिए॥ माङ्‌हाङ्‌ङा खानि जोम् जोम् मायादाया लोक् हाङ्‌हाङ् मापिडियाक्॥

१ युहान्‍ना 3:24

उन्‍ङा माट्‌टुगा रिङ् पालान् काचोक् सोब्‍बे याप्‌मिचि उन्‌ङि उलियुक्, हिट्‌नुङ् उन् हिट्‌नागालोक् लियुक्॥ नाड्‌डेउङ् माङ्‌हाङ् आनि निङ्‌ग्‍वाङि युङ्‌ना रिङ् उन्‍ङा आपिडाना सेङ्‌सेङ्‌ना हाङ्‌सालाम्‍मा आनि ठाहा टोगुम्‍टुम्॥

१ युहान्‍ना 4:12

साङा चा खोना बेला चा माङ्‌हाङ् उनिसुन्‍गेट्‌टुन्‍ना॥ टरो आनि ठिबाङ्‌ङा आरको माया चोगुम्‍टुम् भोने, माङ्‌हाङ् आनिलोक् युङ्‌युक्, हिट्‌नुङ् उन्‍ङाना माया आनिङि युडैसे॥

१ युहान्‍ना 4:16

नाड्‌डेउङ् आनि आप्‍पेङा चा माङ्‌हाङ्‌ङा आनि माया आचोगाना ठाहा टोगुम्‍टुम् हिट्‌नुङ् हिट्‌ना माया आन्‍याँ बिस्‍वास चोगुम्‍टुम्॥ माङ्‌हाङ्‌ङा याप्‌मिचि सोरोक् माया चोगुचिचि॥ हिट्‌नुङ् जुन् याप्‌मि माङ्‌हाङ्‌ङाना ओमायाङि लियुयाक्‌युक् भोने हिट्‌ना माङ्‌हाङ्‌ङि लियुक्, हिट्‌नुङ् माङ्‌हाङ् उन्‌ङि लियुक्॥