فِلِبِّي 4:8 - الكتاب المقدس بالعربي الدارجي هنا تشاد

⁸ يَا أَخْوَانِي، دِي هِي آخِرْ وَصِيَّةْ النَّنْطِيهَا لَيْكُو. فَكُّرُوا فِي أَيِّ شَيّءْ الصَّحِيحْ وَ الشَّرِيفْ وَ الْعَادِلْ وَ الطَّاهِرْ وَ الْمَحْبُوبْ وَ الْكَرِيمْ وَ الْأَفْضَلْ وَ الْوَاجِبْ لَيَّهْ الشُّكُرْ. وَ كُلَّ شَيّءْ الْمِثِلْ دَا، خُطُّوا أَفْكَارْكُو فَوْقَهْ ثَابْتِينْ.

فِلِبِّي 4:8 Cross References

يَعْقُوب 3:17

لَاكِنْ الْحِكْمَةْ الْمِنْ اللّٰهْ أَوَّلاً كَيْ صَافِيَةْ وَ النَّادُمْ الْعِنْدَهْ الْحِكْمَةْ يِرِيدْ السَّلَامْ وَ كَلَامَهْ بَارِدْ وَ رَاسَهْ مَا قَوِي وَ هُو حَنُونْ وَ يِسَوِّي عَمَلْ الْخَيْر وَ هُو مَا عِنْدَهْ تَفْرِقَةْ وَ لَا نِفَاقْ.

تِيطُس 2:7

أَبْقَى لَيْهُمْ مَثَلْ فِي كُلِّ شَيّءْ. وَصِّفْ لَيْهُمْ بِحَالَكْ كِكَّيْف يِسَوُّوا الْخَيْر. وَ خَلِّيهُمْ يِشِيفُوا كَدَرْ إِنْتَ نَادُمْ مُخْلِصْ فِي تَعْلِيمَكْ وَ مُنْكَرِبْ فَوْقَهْ.

2 كُرُنْتُس 8:21

وَ شِلْنَا نِيَّةْ لِنِسَوُّوا الْعَدِيلْ قِدَّامْ اللّٰهْ وَ قِدَّامْ النَّاسْ كُلَ.

غَلاطِية 5:22

لَاكِنْ مِثِلْ الشَّدَرْ يَلْدَ عِيَالْ، دَاهُو عِيَالْ الرُّوحْ الْقُدُّوسْ هُمَّنْ الْمَحَبَّةْ وَ الْفَرَحْ وَ السَّلَامْ وَ الصَّبُرْ وَ الْقَلِبْ الْأَبْيَضْ وَ الْخَيْر وَ الْأَمَانْ

1 بُطْرُس 2:12

خَلِّي حَالْكُو فِي أُسْط النَّاسْ الْمَا مُؤمِنِينْ تَبْقَى عَدِيلَةْ. وَ بِمِثِلْ دَا، كَنْ يَكْدُبُوا فِيكُو وَ يُقُولُوا إِنْتُو نَاسْ فَسْلِينْ كُلَ، يِشِيفُوا عَمَلْكُو السَّمَحْ وَ فِي الأَخِيرْ، يِمَجُّدُوا اللّٰهْ فِي يَوْم الْفَرَجْ.

عِبْرَانِيِّين 13:18

أَسْأَلَوْا اللّٰهْ لَيْنَا. أَنِحْنَ مُؤَكِّدِينْ كَدَرْ نِيِّتْنَا مُخْلِصَةْ وَ نِدَوْرُوا نِتَابُعُوا حَالْ عَدِيلَةْ فِي كُلَّ شَيّءْ.

1 تِمُوتَاوُس 4:12

مَا تِخَلِّي نَادُمْ يَحْقِرَكْ بِسَبَبْ إِنْتَ صَغَيَّرْ فِي الْعُمُرْ. سَوِّي نَفْسَكْ مَثَلْ لِلْمُؤمِنِينْ فِي كَلَامَكْ وَ حَالَكْ. خَلِّي يِشِيفُوا فَوْقَكْ الْمَحَبَّةْ وَ الْإِيمَانْ وَ الطِّهَارَةْ.

أفَسُس 5:9

أَشَانْ نُورْ اللّٰهْ يِجِيبْ نَتِيجَةْ فِي قُلُوبْ النَّاسْ وَ النَّتِيجَةْ دِي، هِي الْخَيْر وَ الْعَدَالَةْ وَ الْحَقّ.

تِيطُس 1:8

لَاكِنْ وَاجِبْ يَبْقَى نَادُمْ كَرِيمْ لِلضِّيفَانْ وَ يِرِيدْ الْخَيْر وَ عَاقِلْ وَ عَادِلْ وَ صَالِحْ وَ يِثَبِّتْ نَفْسَهْ.

1 يُوحَنَّا 3:3

وَ أَيِّ نَادُمْ الْعِنْدَهْ عَشَمْ مِثِلْ دَا فِي الْمَسِيحْ، يِطَهِّرْ قَلْبَهْ تَمَامْ مِثِلْ إِبْن اللّٰهْ هُو طَاهِرْ.

1 بُطْرُس 1:22

وَ إِنْتُو طَهَّرْتُوا نُفُوسْكُو وَكِتْ تَابَعْتُوا كَلَامْ الْحَقّ وَ لِقِيتُوا مَحَبَّةْ أَخَوِيَّةْ بَلَا نِفَاقْ. وَ خَلَاصْ، أَرَّايَدَوْا أَمْبَيْنَاتْكُو بِشِدَّةْ وَ بِقَلِبْ وَاحِدْ.

تِيطُس 3:14

وَ خَلِّي كُلَّ أَخْوَانَّا يَعَرْفُوا كِكَّيْف يِنْكَرْبُوا فِي عَمَلْ الْخَيْر أَشَانْ يِسَاعُدُوا النَّاسْ الْحَوْجَانِينْ بِالصَّحِيحْ. وَ مِثِلْ دَا أَخْوَانَّا مَا يَبْقَوْا نَاسْ الْحَيَاتْهُمْ مَا عِنْدَهَا فَايْدَةْ.

رَوْمَا 13:13

خَلِّي حَالْنَا تُكُونْ حَالْ هَنَا عِيَالْ النُّورْ. وَ خَلِّي مَا نَمْشُوا فِي السَّفَاهَةْ وَ السَّكَرْ، وَ لَا فِي الزِّنَى وَ الْفَسَادْ، وَ لَا فِي الدُّوَاسْ وَ الْحُسُدْ.

أمْثال 20:7

الصَّالِحْ يِعِيشْ تَمَامْ مُدَّةْ حَيَاتَهْ وَ مَبْرُوكْ لِعِيَالَهْ مِنْ بَعَدَهْ.

يَعْقُوب 1:27

دَاهُو الدِّينْ الصَّافِي الْمَا عِنْدَهْ عَيْب قِدَّامْ أَبُونَا اللّٰهْ. عَاوُنُوا الْأَتَامَا وَ الْعَوِينْ الْأَرَامِلْ الْقَاعِدِينْ فِي التَّعَبْ. وَ أَقِيفُوا بَعِيدْ مِنْ الْأَشْيَاءْ الْيِنَجُّسُوا نَاسْ الدُّنْيَا.

1 يُوحَنَّا 3:18

يَا عِيَالِي، خَلِّي مَا نِرَّايَدَوْا بِكَلَامْ خُشُومْنَا بَسْ لَاكِنْ خَلِّي نِرَّايَدَوْا بِالْفِعِلْ وَ بِالْمَحَبَّةْ الصَّحِيحَةْ.

تِيطُس 2:2

وَصِّي الشِّيَّابْ أَشَانْ يَبْقَوْا عَاقْلِينْ وَ مُحْتَرَمِينْ وَ خَلِّي بَالْهُمْ يَبْقَى وَسِيعْ. وَ خَلِّي يَبْقَوْا ثَابْتِينْ فِي الْإِيمَانْ وَ الْمَحَبَّةْ وَ الصَّبُرْ.

2 كُرُنْتُس 13:7

وَ نَسْأَلَوْا اللّٰهْ أَشَانْ إِنْتُو مَا تِسَوُّوا أَيِّ خَطَا. وَ سُؤَالْنَا دَا، مَا أَشَانْ النَّاسْ يِشِيفُوا نَجَاحْنَا لَاكِنْ أَشَانْ إِنْتُو تِسَوُّوا الْخَيْر، حَتَّى كَانْ نَاسْ وَاحِدِينْ يُقُولُوا أَنِحْنَ فَشَلْنَا كُلَ.

كُلُوسِي 4:5

عِيشُوا بِحِكْمَةْ فِي أُسْط النَّاسْ الْمَا مُؤمِنِينْ. أَيِّ فُرْصَةْ اللِّقِيتُوهَا، أَشْهَدَوْا لِلْمَسِيحْ.

1 بُطْرُس 4:8

قُبَّالْ كُلَّ شَيّءْ، أَرَّايَدَوْا أَمْبَيْنَاتْكُو بِمَحَبَّةْ شَدِيدَةْ أَشَانْ الْعِنْدَهْ مَحَبَّةْ يِسَامِحْ زِيَادَةْ لِلنَّاسْ الْيَخْطَوْا فَوْقَهْ.

2 صَمُوِيل 23:3

اللّٰهْ إِلٰـهْ بَنِي إِسْرَائِيلْ حَجَّى، أَيْوَى، مَلْجَأْ بَنِي إِسْرَائِيلْ قَالْ لَيِّ: ‹الْمَلِكْ الْيَحْكِمْ بِالْعَدَالَةْ وَ يُقُودْ النَّاسْ بِخَوْف اللّٰهْ،

رَوْمَا 13:3

أَشَانْ النَّادُمْ الْحَالَهْ عَدِيلَةْ مَا يَخَافْ مِنْ الْحُكَّامْ إِلَّا النَّادُمْ الْحَالَهْ فَسْلَةْ، هُو يَخَافْ مِنْهُمْ. كَنْ تِدَوْر مَا تَخَافْ مِنْ الْحَاكِمْ، خَلَاصْ سَوِّي الْخَيْر وَ الْحَاكِمْ يَشْكُرَكْ.

تِيطُس 2:14

هُو أَنْطَى نَفْسَهْ ضَحِيَّةْ لِيَفْدَانَا مِنْ كُلَّ الْفَسَالَةْ وَ يِطَهِّرْ قُلُوبْنَا أَشَانْ نَبْقَوْا لَيَّهْ شَعَبَهْ حَلَالَهْ مُنْكَرِبِينْ فِي عَمَلْ الْخَيْر.

فِلِبِّي 3:1

وَ خَلَاصْ، يَا أَخْوَانِي، أَفْرَحَوْا بِرَبِّنَا عِيسَى. مَا قَاسِي لَيِّ نَكْتِبْ لَيْكُو نَفْس الشَّيّءْ الْأَوَّلْ أَوْرَيْتكُو بَيَّهْ وَ نِكَرِّرَهْ بَتَّانْ أَشَانْ دَا يَبْقَى لَيْكُو أَكِيدْ.

رَوْمَا 2:29

لَاكِنْ الْيَهُودِي الصَّحِيحْ، هُو يَهُودِي فِي قَلْبَهْ وَ طَهُورْتَهْ، هِي طَهُورَةْ الْقَلِبْ الْجَايَةْ مِنْ رُوحْ اللّٰهْ. وَ طَهُورْتَهْ مَا طَهُورَةْ الْمَكْتُوبَةْ فِي كِتَابْ التَّوْرَاةْ بَسْ. الْيَهُودِي الْمِثِلْ دَا، كَنْ النَّاسْ مَا يَشْكُرُوهْ كُلَ، اللّٰهْ يَرْضَى بَيَّهْ.

إشَعْيا 26:7

يَا رَبّ، دَرِبْ الصَّالِحْ يَمْشِي عَدِيلْ أَيْوَى، إِنْتَ تِعَدِّلْ دَرِبْ الصَّالِحْ.

أمْثال 31:31

كَفُّوهَا تَعَبْهَا فِي شَانْ خِدْمِتْهَا وَ أَشْكُرُوهَا قِدَّامْ نَاسْ حِلِّتْهَا.

1 تِمُوتَاوُس 2:2

خَلِّي يَسْأَلَوْا اللّٰهْ فِي شَانْ الرُّؤَسَاءْ وَ كُلَّ الْكُبَارَاتْ أَشَانْ نِعِيشُوا فِي حَالَةْ هَادِيَةْ وَ بِالسَّلَامْ وَ بِتَقْوَى وَ إِحْتِرَامْ فِي كُلِّ شَيّءْ.

1 تِمُوتَاوُس 5:10

وَ كَنْ هِي مَعْرُوفَةْ بِالْعَمَلْ الصَّالِحْ. وَاجِبْ تَبْقَى مَرَةْ الرَّبَّتْ عِيَالْهَا عَدِيلْ وَ كَرِيمَةْ لِلضِّيفَانْ وَ سَلَّمَتْ نَفِسْهَا أَشَانْ تَخْدِمْ لِلنَّاسْ الصَّالِحِينْ وَ سَاعَدَتْ التَّعْبَانِينْ وَ مِثِلْ دَا هِي أَنْكَرَبَتْ فِي كُلَّ عَمَلْ الْخَيْر.

تَثْنِية 16:20

وَ فَتُّشُوا دَرِبْ الْعَدَالَةْ أَشَانْ تَحْيَوْا وَ تِشِيلُوا الْبَلَدْ الْيَنْطِيهَا لَيْكُو اللّٰهْ إِلٰـهْكُو.

أفَسُس 6:14

أَشَانْ دَا، أَقْعُدُوا ثَابْتِينْ، صُلُبْكُو مَرْبُوطْ بِالْحَقّ. خَلِّي الْحَالْ الصَّالْحَةْ تَبْقَى لَيْكُو دِرِعْ قَوِي فِي صَدُرْكُو.

1 تَسَلونِيكِي 4:12

كَنْ إِنْتُو قَاعِدِينْ تِسَوُّوا مِثِلْ دَا، النَّاسْ الْمَا مُؤمِنِينْ يِكَرُّمُوكُو وَ إِنْتُو مَا تِحْتَاجَوْا لِشَيّءْ مِنْ أَيِّ نَادُمْ.

أفَسُس 4:25

وَ أَشَانْ دَا، أَبَداً مَا تَكْدُبُوا. كَلُّمُوا أَمْبَيْنَاتْكُو بِالصَّحِيحْ أَشَانْ أَنِحْنَ كُلِّنَا وَاحِدْ.

2 كُرُنْتُس 6:8

وَ نَخْدُمُوا لِلّٰهْ كَنْ يِكَرُّمُونَا وَلَّا يَحْقُرُونَا وَ كَنْ يِعَيُّرُونَا وَلَّا يَشْكُرُونَا. يُقُولُوا أَنِحْنَ كَدَّابِينْ وَ لَاكِنْ أَنِحْنَ أَمِينِينْ.

أعمال الرُسُل 10:22

وَ رَدَّوْا لَيَّهْ وَ قَالَوْا: «كَرْنِيلِي رَسَّلَانَا. وَ كَرْنِيلِي دَا هُو كَبِيرْ عَسْكَرْ وَ رَاجِلْ صَالِحْ وَ خَايِفْ مِنْ اللّٰهْ. وَ كُلَّ الْيَهُودْ يَشْهَدَوْا لَيَّهْ هُو نَادُمْ عَدِيلْ. وَ وَاحِدْ مِنْ مَلَائِكَةْ اللّٰهْ جَاءْ لَيَّهْ وَ قَالْ وَاجِبْ كَرْنِيلِي يِنَادِيكْ تَمْشِي بَيْتَهْ أَشَانْ يَسْمَعْ كَلَامَكْ.»

يُوحَنَّا 7:18

أَيِّ نَادُمْ الْقَاعِدْ يِعَلِّمْ النَّاسْ بِتَعْلِيمْ حَقَّهْ حَلَالَهْ، هُو يِدَوْر شُكُرْ مِنْ النَّاسْ. لَاكِنْ النَّادُمْ الْيِدَوْر النَّاسْ يَشْكُرُوا اللّٰهْ الرَّسَّلَهْ، النَّادُمْ دَا كَلَامَهْ صَحِيحْ وَ هُو مَا يُغُشّ أَيِّ نَادُمْ.

لُوقا 2:25

وَ فِيَّهْ رَاجِلْ وَاحِدْ فِي مَدِينَةْ الْقُدُسْ أُسْمَهْ سَمْعَانْ وَ هُو نَادُمْ صَالِحْ وَ تَقِي. وَ هُو قَاعِدْ يَرْجَى بِعَشَمْ السَّلَامْ الْيِرَسِّلَهْ اللّٰهْ لِبَنِي إِسْرَائِيلْ. وَ الرُّوحْ الْقُدُّوسْ قَاعِدْ فَوْقَهْ.

مَرْخُوس 6:20

أَشَانْ هِرُودُسْ خَايِفْ مِنْ يَحْيَى. هُو عِرِفْ يَحْيَى نَادُمْ صَالِحْ وَ نَادُمْ هَنَا اللّٰهْ. وَ هُو قَاعِدْ يَحْفَضَهْ مِنْ كُلَّ شَيّءْ فَسِلْ. بِالصَّحِيحْ، كَلَامْ يَحْيَى بَرْجَلَهْ بِلْحَيْن لَاكِنْ هِرُودُسْ يِرِيدْ يَسْمَعَهْ كُلَ.

أمْثال 11:1

الْمِيزَانْ الْمَغْشُوشْ، اللّٰهْ حَرَّمَهْ وَ الْمِكْيَالْ الْعَادِلْ، اللّٰهْ يَرْضَى بَيَّهْ.

رَعُوث 3:11

وَ هَسَّعْ دَا، مَا تَخَافَيْ، يَا بِنَيِّتِي! أَنَا نِسَوِّي كُلَّ شَيّءْ الْإِنْتِ طَلَبْتِيهْ مِنِّي أَشَانْ نَاسْ حِلِّتِي يَعَرْفُوا تَمَامْ كَدَرْ إِنْتِ مَرَةْ عِنْدِكِ قِيمَةْ.

لُوقا 16:15

وَ هُو رَدَّ لَيْهُمْ وَ قَالْ: «إِنْتُو تِسَوُّوا نُفُوسْكُو صَالِحِينْ قِدَّامْ النَّاسْ وَ لَاكِنْ مَا تَقْدَرَوْا تُغُشُّوا اللّٰهْ وَ هُو يَعَرِفْ قُلُوبْكُو. أَيْوَى، الشَّيّءْ النَّاسْ يَشْكُرُوكُو فَوْقَهْ دَا، اللّٰهْ يَجْعَلَهْ حَرَامْ.

1 كُرُنْتُس 4:5

بِمِثِلْ دَا، مَا تِحَاسُبُوا خِدْمَةْ أَيِّ نَادُمْ قُبَّالْ يَوْم الْحِسَابْ. فِي الْيَوْم دَا، رَبِّنَا يَجِي وَ يِبَيِّنْ كُلَّ شَيّءْ الْمُلَبَّدْ فِي الضَّلَامْ وَ يَكْشِفْ نِيَّةْ النَّاسْ الْقَاعِدَةْ فِي قُلُوبْهُمْ. وَ أَيِّ نَادُمْ يَلْقَى رِضَى، مَا مِنْ النَّاسْ لَاكِنْ مِنْ اللّٰهْ.

أعمال الرُسُل 22:12

وَ نَادُمْ وَاحِدْ قَاعِدْ فِي دِمَشْق أُسْمَهْ حَنَانِيَّا. هُو قَاعِدْ يِتَابِعْ التَّوْرَاةْ عَدِيلْ وَ كُلَّ الْيَهُودْ فِي دِمَشْق يَشْهَدَوْا لَيَّهْ كَدَرْ هُو نَادُمْ تَقِي.

نشيد 5:16

خَشْمَهْ حَلُو وَ جِسْمَهْ كُلَّ كَيْ مَحْبُوبْ. وَ دَا بَسْ، حَبِيبِي وَ دَا بَسْ، رَفِيقِي. أَعَرْفَنَّهْ، يَا بَنَاتْ مَدِينَةْ الْقُدُسْ.

تكوين 18:19

أَنَا عَزَلْتَهْ لِيِوَصِّي عِيَالَهْ وَ ذُرِّيّتَهْ لِيِتَابُعُوا دَرِبْ اللّٰهْ وَ يِسَوُّوا الْحَقّ وَ الْعَدَالَةْ. وَ بِمِثِلْ دَا، أَنَا اللّٰهْ نِحَقِّقْ الشَّيّءْ الْقُلْت نِسَوِّيهْ لِإِبْرَاهِيمْ.»

1 يُوحَنَّا 4:1

يَا الْمَحْبُوبِينْ، مَا تِصَدُّقُوا بِكُلَّ النَّاسْ الْيُقُولُوا هُمَّنْ يِحَجُّوا بِقُدْرَةْ الرُّوحْ. جَرُّبُوهُمْ أَشَانْ تِأَكُّدُوا كَنْ كَلَامْهُمْ مِنْ اللّٰهْ. نَاسْ كَتِيرِينْ سَوَّوْا نُفُوسْهُمْ أَنْبِيَاء وَ قَمَّوْا يُرُوغُوا فِي الدُّنْيَا.

1 تِمُوتَاوُس 5:2

وَ حَجِّي لِكُلِّ عَجُوزْ مِثِلْ هِي أَمَّكْ. وَ حَجِّي لِكُلِّ بِنَيَّةْ بِكَلَامْ وَاضِحْ مِثِلْ هِي أَخْتَكْ.

لُوقا 23:50

وَ فِيَّهْ رَاجِلْ وَاحِدْ أُسْمَهْ يُوسُفْ. وَ هُو مِنْ الْمَجْلَسْ الْكَبِيرْ وَ هُو نَادُمْ زَيْن وَ صَالِحْ.

أمْثال 31:29

«كَتِيرْ مِنْ الْعَوِينْ وَصَّفَنْ شَرَفْهِنْ وَ لَاكِنْ كُلِّهِنْ كَيْ، إِنْتِ فُتِّيهِنْ!»

أمْثال 16:11

الْمِيزَانْ الْعَادِلْ، اللّٰهْ يَرْضَى بَيَّهْ وَ الْمِكْيَالْ الْعَدِيلْ، هُو بَسْ ثَبَّتَهْ.

أمْثال 12:4

الْمَرَةْ الْعِنْدَهَا شَرَفْ مِثِلْ تَاجْ لِزَوْجهَا وَ الْمَرَةْ الْعَايْبَةْ مِثِلْ سُوسَةْ فِي عُضَامْ رَاجِلْهَا.

1 تِمُوتَاوُس 3:4

وَاجِبْ يَبْقَى نَادُمْ الْيِشِيلْ مَسْؤُولِيَّةْ بَيْتَهْ وَ يِرَبِّي عِيَالَهْ لِيِكَرُّمُوهْ فِي كُلِّ شَيّءْ.

أعمال الرُسُل 6:3

أَشَانْ دَا يَا أَخْوَانَّا، أَعَزُلُوا مِنْ أَمْبَيْنَاتْكُو سَبْعَةْ رُجَالْ، نَاسْ مَعْرُوفِينْ حَالْهُمْ عَدِيلَةْ وَ مَلَانِينْ بِالرُّوحْ الْقُدُّوسْ وَ عِنْدُهُمْ فِكِرْ عَدِيلْ. وَ نِكَلُّفُوهُمْ بِالْخِدْمَةْ دِي.

مَتَّى 22:16

وَ رَسَّلَوْا لِعِيسَى وَاحِدِينْ مِنْ تَلَامِيذْهُمْ مَعَ نَاسْ مِنْ حِزِبْ هِرُودُسْ. وَ قَالَوْا لَيَّهْ: «يَا مُعَلِّمْ، نَعَرْفُوا كَدَرْ كَلَامَكْ حَقّ وَ تِعَلِّمْ النَّاسْ فِي دَرِبْ اللّٰهْ بِكَلَامْ صَحِيحْ وَ إِنْتَ مَا خَايِفْ مِنْ أَيِّ نَادُمْ وَ مَا تَخَافْ مِنْ وِجِهْ النَّاسْ.

أمْثال 31:10

الْمَرَةْ الْعِنْدَهَا شَرَفْ، يَاتُو يَلْقَاهَا؟ قِيمِتْهَا زِيَادَةْ مِنْ الدَّهَبْ الصَّافِي.

عِبْرَانِيِّين 11:2

فِي شَانْ إِيمَانْهُمْ، نَاسْ الزَّمَانْ لِقَوْا رِضَى اللّٰهْ.

1 تِمُوتَاوُس 3:11

وَ نَفْس الشَّيّءْ لِعَوِينْهُمْ. وَاجِبْ مَرِةْ الْمُعَاوِنْ تَبْقَى مُحْتَرَمَةْ وَ مَا قَوَّالَةْ لَاكِنْ عَاقْلَةْ وَ أَمِينَةْ فِي كُلِّ شَيّءْ.

2 كُرُنْتُس 8:18

وَ الْأَخُو النِّرَسُّلُوهْ مَعَايَهْ مَعْرُوفْ. جَمَاعَاتْ الْمُؤمِنِينْ فِي أَيِّ بَكَانْ يَشْكُرُوهْ بِسَبَبْ خِدِمْتَهْ فِي بَلِّغِينْ بِشَارَةْ الْمَسِيحْ.

2 صَمُوِيل 1:23

شَاوُولْ وَ يُونَتَانْ مَرْيُودِينْ وَ مَحْبُوبِينْ فِي حَيَاتْهُمْ وَ هُمَّنْ مَا أَنْفَرَقَوْا فِي مَوْتهُمْ. هُمَّنْ عَجِيلِينْ مِنْ الصُّقُورَةْ وَ شُدَادْ مِنْ الدِّيدَانْ.

2 بُطْرُس 3:1

يَا أَخْوَانِي النِّحِبُّكُو، دَاهُو الْجَوَابْ التَّانِي الْكَتَبْتَهْ لَيْكُو. وَ فِي جَوَابَاتِي نِدَوْر نِذَكِّرْكُو بِالْكَلَامْ التَّعَرْفُوهْ خَلَاصْ وَ تِفَكُّرُوا بِفِكِرْ مُخْلِصْ.

زَبُور 82:2

«لِمَتَى تَحْكُمُوا بِظُلُمْ وَ تِمَيُّلُوا الشَّرِيعَةْ فِي شَانْ الْعَاصِيِينْ؟ وَقْفَةْ.

رَوْمَا 14:18

النَّادُمْ الْيِتَابِعْ الْمَسِيحْ مِثِلْ دَا، اللّٰهْ يَرْضَى بَيَّهْ وَ النَّاسْ كُلَ يِكَرُّمُوهْ.