فِلِبِّي 3:2 - الكتاب المقدس بالعربي الدارجي هنا تشاد

² أَوْعُوا بَالْكُو مِنْ الْكُلابْ! هُمَّنْ الْيِسَوُّوا الشَّرّ. يَفْرَحَوْا بِقَطِعِينْ مِنْ الْجِسِمْ وَ نُقُولْ لَيْكُو بَتَّانْ أَوْعُوا بَالْكُو مِنْهُمْ!

فِلِبِّي 3:2 Cross References

2 كُرُنْتُس 11:13

الْفَشَّارِينْ دَوْل، هُمَّنْ مَا رُسُلْ بِالصَّحِيحْ. هُمَّنْ خَدَّامِينْ غَشَّاشِينْ وَ يِسَوُّوا نُفُوسْهُمْ يِشَابُهُوا رُسُلْ الْمَسِيحْ.

تِيطُس 1:16

يُقُولُوا يَعَرْفُوا اللّٰهْ لَاكِنْ بِعَمَلْهُمْ يَكْفُرُوا بَيَّهْ. نَاسْ مِثِلْ دَوْل مَكْرُوهِينْ وَ عَاصِيِينْ وَ مَا يَنْفَعَوْا لِأَيِّ عَمَلْ هَنَا خَيْر.

رُؤية 22:15

وَ بَرَّا مِنْ الْمَدِينَةْ، فِيَّهْ الْفَاسْدِينْ وَ السَّحَّارِينْ وَ الزَّنَّايِينْ وَ كَتَّالِينْ الدِّمَمْ وَ النَّاسْ الْيَعَبُدُوا الْأَصْنَامْ وَ النَّاسْ الْكَلَامْهُمْ وَ خِدْمِتْهُمْ كِدِبْ.

غَلاطِية 5:15

لَاكِنْ كَنْ تِلْخَالَفَوْا أَمْبَيْنَاتْكُو وَ تِدَّاوَسَوْا مِثِلْ كُلابْ، خَلَاصْ فِي الأَخِيرْ تِلْآكَلَوْا مَرَّةْ وَاحِدْ.

فِلِبِّي 3:19

وَ فِي الأَخِيرْ، هُمَّنْ يَمْشُوا فِي الْهَلَاكْ. بُطُونْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيّءْ الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فِي خُمَامْ الدُّنْيَا بَسْ.

غَلاطِية 5:6

أَشَانْ فِي دَرِبْ الْمَسِيحْ عِيسَى، كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، هُو الْإِيمَانْ بِالْمَسِيحْ وَ الْمَحَبَّةْ الْجَايَةْ مِنْ الْإِيمَانْ دَا.

زَبُور 22:16

مَجْمُوعَةْ النَّاسْ الْهَوَانِينْ حَوَّقَوْنِي مِثِلْ كُلابْ قَعَدَوْا جَايْ وَ جَايْ لَيِّ وَ قَدَّوْا إِيدَيْنِي وَ رِجِلَيْنِي.

مَتَّى 7:15

«أَنْقَرْعُوا مِنْ النَّاسْ الْيِسَوُّوا نُفُوسْهُمْ أَنْبِيَاء. يَجُوا لَيْكُو ضَلُولِينْ مِثِلْ عِيَالْ غَنَمْ وَ لَاكِنْ فِي قُلُوبْهُمْ هُمَّنْ مِثِلْ مَرَافْعِينْ الْيِدَوْرُوا يَاكُلُوكُو.

زَبُور 22:20

نَجِّي حَيَاتِي مِنْ السَّيْف وَ جِسْمِي مِنْ خُشُومْ الْكُلابْ.

رُؤية 21:8

لَاكِنْ الْخَوَّافِينْ وَ الْمَا مُؤمِنِينْ وَ الْفَاسْدِينْ وَ كَتَّالِينْ الدِّمَمْ وَ الزَّنَّايِينْ وَ السَّحَّارِينْ وَ عَابِدِينْ الْأَصْنَامْ وَ كُلَّ الْكَدَّابِينْ، بَكَانْهُمْ يَبْقَى بَحَرْ النَّارْ وَ الْكِبْرِيتْ الْأَصْفَرْ. وَ دَا بَسْ الْمَوْت التَّانِي.»

رُؤية 3:9

شِيفْ، النَّاسْ الْيُقُولُوا بِكِدِبْ هُمَّنْ يَهُودْ وَ لَاكِنْ هُمَّنْ مَا يَهُودْ. يِصَلُّوا فِي بَيْت الصَّلَاةْ لَاكِنْ هُمَّنْ جَمَاعَةْ إِبْلِيسْ. هُمَّنْ دَوْل أَنَا نَجْبُرْهُمْ يَجُوا لَيْك وَ يَسْجُدُوا قِدَّامَكْ وَ يَعَرْفُوا كَدَرْ أَنَا نِحِبَّكْ.

يَهُوذَا 1:4

أَشَانْ فِي نَاسْ وَاحِدِينْ فَسْلِينْ أَنْدَسَّوْا أَمْبَيْنَاتْكُو بِعَشِيرْ. وَ هُمَّنْ قَاعِدِينْ يِعَوُّجُوا كَلَامْ رَحْمَةْ اللّٰهْ لِيِحَلُّلُوا بَيَّهْ الْمُحَرَّمَاتْ. وَ بَيْدَا، يَنْكُرُوا عِيسَى الْمَسِيحْ الْهُو بَسْ سَيِّدْنَا وَ رَبِّنَا. وَ مِنْ زَمَانْ، الْكِتَابْ حَجَّى بِالْعَذَابْ الْيَرْجَاهُمْ.

1 تِمُوتَاوُس 1:19

أَكْرُبْ الْإِيمَانْ قَوِي وَ سَوِّي كُلِّ شَيّءْ بِنِيَّةْ مُخْلِصَةْ. نَاسْ وَاحِدِينْ خَلَّوْا مِنْهُمْ النِّيَّةْ الْمُخْلِصَةْ وَ تَلَّفَوْا إِيمَانْهُمْ مَرَّةْ وَاحِدْ.

فِلِبِّي 3:3

يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

غَلاطِية 5:13

يَا أَخْوَانِي، اللّٰهْ نَادَاكُو أَشَانْ يِدَوْر إِنْتُو تِعِيشُوا فِي الْحُرِّيَّةْ. لَاكِنْ مَا تِسَوُّوا الْحُرِّيَّةْ دِي فُرْصَةْ لِتِتَابُعُوا شَهْوَاتْكُو الْفَسْلِينْ. أَخَيْر تَخْدُمُوا لِأَخْوَانْكُو بِمَحَبَّةْ.

رَوْمَا 2:28

بِالصَّحِيحْ، الْيَهُودِي مَا يَبْقَى يَهُودِي بِالشَّيّءْ الْيِنْشَافْ فَوْقَهْ. وَ الطَّهُورَةْ الصَّحِيحَةْ مَا قَطِعِينْ الْجِلِدْ بَسْ.

مَتَّى 7:6

«مَا تَنْطُوا شُغُلْ مُقَدَّسْ لِكُلابْ وَ لَا تِدَفُّقُوا شَيّءْ جَمِيلْ لِخَنَازِيرْ. أَشَانْ الْخَنَازِيرْ يِفَجُّقُوهْ بَسْ وَ الْكُلابْ يِقَبُّلُوا وَ يَاكُلُوكُو.

أمْثال 26:11

الْمَطْمُوسْ يِقَبِّلْ فِي نِفَاقَهْ مِثِلْ الْكَلِبْ يِقَبِّلْ يَاكُلْ الْقَدَّفَهْ.

رُؤية 2:9

أَنَا نَعَرِفْ التَّعَبْ اللِّقَاكْ وَ نَعَرِفْ إِنْتَ بِقِيتْ مِسْكِينْ وَ لَاكِنْ عِنْدَكْ بَرَكَةْ كَبِيرَةْ. وَ نَعَرِفْ الْكَلَامْ الْفَسِلْ الْيُقُولُوهْ فَوْقَكْ النَّاسْ الْيِسَوُّوا نُفُوسْهُمْ يَهُودْ وَ لَاكِنْ هُمَّنْ مَا يَهُودْ. يِصَلُّوا فِي بَيْت الصَّلَاةْ وَ لَاكِنْ هُمَّنْ جَمَاعَةْ إِبْلِيسْ.

2 بُطْرُس 2:22

الْبِقِي لَيْهُمْ دَا مِثِلْ كَلَامْ الْمَثَلْ الصَّحِيحْ الْبُقُولْ: <الْكَلِبْ يِقَبِّلْ يَاكُلْ الْقَدَّفَهْ.> وَ بَتَّانْ بُقُولْ: «الْخِنْزِيرْ الْغَسَّلَوْه يِلْمَرْمَغْ فِي الطِّينَةْ.»

مَتَّى 24:10

وَ مُؤمِنِينْ كَتِيرِينْ يِخَلُّوا الْإِيمَانْ وَ يَكْرَهَوْا أَخْوَانْهُمْ وَ يُخُونُوهُمْ.

زَبُور 119:115

بَعُّدُوا مِنِّي، يَا الْفَسْلِينْ، أَشَانْ نَحْفَضْ قَوَانِينْ إِلٰـهِي!