فِلِبِّي 3:10 - الكتاب المقدس بالعربي الدارجي هنا تشاد

¹⁰ وَ نِجَاهِدْ أَشَانْ نَعَرِفْ الْمَسِيحْ تَمَامْ وَ نِعِيشْ بِقُدْرَةْ بُعَاثَهْ وَ نِشَارِكْ مَعَايَهْ فِي تَعَبَهْ. وَ نِدَوْر نَبْقَى مِثِلْ هُو بِقِي فِي مَوْتَهْ

فِلِبِّي 3:10 Cross References

غَلاطِية 2:20

وَ هَسَّعْ دَا، النَّادُمْ الْحَيّ مَا أَنَا لَاكِنْ الْمَسِيحْ هُو حَيّ فِيِي. وَ كُلَّ شَيّءْ النِّسَوِّيهْ فِي الدُّنْيَا، نِسَوِّيهْ فِي الْإِيمَانْ بِإِبْن اللّٰهْ الْحَبَّانِي لَحَدِّي أَنْطَى نَفْسَهْ ضَحِيَّةْ فِي شَانِي.

رَوْمَا 8:17

وَ كَنْ أَنِحْنَ عِيَالَهْ، أَنِحْنَ كُلَ مِثِلْ وُرَّاثَهْ. أَنِحْنَ وُرَّاثْ اللّٰهْ، أَيْوَى، وُرَّاثَهْ مَعَ الْمَسِيحْ. أَشَانْ كَنْ نَتْعَبَوْا مَعَ الْمَسِيحْ، نَدْخُلُوا مَعَ الْمَسِيحْ فِي مَجْدَهْ كُلَ.

فِلِبِّي 3:8

أَيْوَى وَ زِيَادَةْ مِنْ دَا، عِرْفَةْ الْمَسِيحْ عِيسَى رَبِّي بِقَتْ لَيِّ أَخَيْر مِنْ كُلَّ شَيّءْ وَ نَجْعَلْ كُلَّ شَيّءْ آخَرْ سَاكِتْ. فِي شَانْ الْمَسِيحْ، أَنَا خَلَّيْت كُلَّ شَيّءْ الْعِنْدِي. وَ كُلَّ شَيّءْ الْأَوَّلْ عِنْدَهْ لَيِّ فَايْدَةْ، جَعَلْتَهْ مِثِلْ وَسَخْ أَشَانْ نَلْقَى الْفَايْدَةْ الْكَبِيرَةْ وَ هِي الْعَلَاقَةْ مَعَ الْمَسِيحْ.

1 يُوحَنَّا 2:3

دَاهُو كِكَّيْف نِأَكُّدُوا كَدَرْ أَنِحْنَ نَعَرْفُوا اللّٰهْ. النَّادُمْ الْيِتَابِعْ وَصَايَا اللّٰهْ، هُو بَسْ يَعَرِفْ اللّٰهْ.

كُلُوسِي 3:1

أَكِيدْ لِقِيتُوا حَيَاةْ جَدِيدَةْ فِي بُعَاثْ الْمَسِيحْ وَ أَشَانْ دَا، خُطُّوا بَالْكُو فِي الْأَشْيَاءْ الْقَاعِدِينْ فِي السَّمَاءْ مَعَ الْمَسِيحْ الْقَاعِدْ جَنْب اللّٰهْ فِي نُصَّهْ الزَّيْنَايْ.

كُلُوسِي 1:24

وَ أَنَا فَرْحَانْ بِتَعَبِي أَشَانْ أَنَا قَاعِدْ نَتْعَبْ فِي شَانْكُو. وَ فِي جِسْمِي، نَحْمَلْ كُلَّ التَّعَبْ الْيِقَصِّرْ لِلْمَسِيحْ فِي شَانْ أُمَّتَه الْهِي جِسْمَهْ.

2 كُرُنْتُس 1:5

وَ صَحِيحْ، أَنِحْنَ قَاعِدِينْ نِشَارُكُوا كَتِيرْ فِي تَعَبْ الْمَسِيحْ وَ لَاكِنْ بِعَلَاقِتْنَا مَعَايَهْ، كُلَ نَلْقَوْا شَجَاعَةْ زِيَادَةْ.

1 بُطْرُس 1:3

خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ! هُو رَحَمَانَا بِرَحْمَةْ كَبِيرَةْ الْبَيْهَا بِقِينَا مَوْلُودِينْ مِنْ جَدِيدْ بِسَبَبْ بُعَاثْ عِيسَى الْمَسِيحْ مِنْ أُسْط الْمَيْتِينْ. وَ بَيْدَا، عِنْدِنَا عَشَمْ مُؤَكَّدْ

2 كُرُنْتُس 13:4

صَحِيحْ، الْمَسِيحْ خَلَّى مِنَّهْ الْقُدْرَةْ وَ مَاتْ فِي الصَّلِيبْ لَاكِنْ هُو حَيّ بِقُدْرَةْ اللّٰهْ. وَ فِي عَلَاقِتْنَا مَعَايَهْ، أَنِحْنَ مَا عِنْدِنَا قُدْرَةْ لَاكِنْ نَحْيَوْا مَعَايَهْ بِقُدْرَةْ اللّٰهْ. وَ الْقُدْرَةْ دِي، أَنِحْنَ نِوَصُّفُوهَا لَيْكُو.

1 يُوحَنَّا 2:5

وَ النَّادُمْ الْقَاعِدْ يِتَابِعْ كَلَامْ اللّٰهْ، هُو دَا صَحِيحْ كَيْ يِحِبّ اللّٰهْ تَمَامْ. وَ دَاهُو كِكَّيْف نِأَكُّدُوا كَدَرْ أَنِحْنَ قَاعِدِينْ ثَابْتِينْ فَوْقَهْ.

يُوحَنَّا 17:3

وَ الْحَيَاةْ الْأَبَدِيَّةْ هِي، يَعَرْفُوكْ إِنْتَ اللّٰهْ الْوَاحِدْ الصَّحِيحْ وَ يَعَرْفُوا عِيسَى الْمَسِيحْ الْإِنْتَ رَسَّلْتَهْ.

رَوْمَا 8:29

أَشَانْ النَّاسْ الْاللّٰهْ عِرِفَاهُمْ مِنْ أَوَّلْ، هُو شَالْ نِيَّةْ أَشَانْ يِسَوِّيهُمْ يِشَابُهُوا إِبْنَهْ عِيسَى الْمَسِيحْ وَ مِثِلْ دَا، إِبْنَهْ عِيسَى الْمَسِيحْ يُكُونْ الْبِكِرْ وَ مَعَايَهْ أَخْوَانْ كَتِيرِينْ.

رُؤية 1:18

أَنَا الْحَيّ. أَوَّلْ أَنَا مُتّْ وَ هَسَّعْ أَنَا حِيِيتْ وَ أَبَداً مَا نُمُوتْ بَتَّانْ. وَ عِنْدِي مُفْتَاحْ هَنَا الْمَوْت وَ الْقَبُرْ.

كُلُوسِي 2:13

أَوَّلْ بِسَبَبْ خَطَايَاكُو، إِنْتُو مَيْتِينْ وَ مَا مِنْ شَعَبْ اللّٰهْ الْمُطَهَّرِينْ. وَ لَاكِنْ اللّٰهْ أَنْطَاكُو الْحَيَاةْ الْجَدِيدَةْ مَعَ الْمَسِيحْ وَ غَفَرْ لَيْكُو كُلَّ خَطَايَاكُو.

أفَسُس 4:13

وَ يِسَوُّوا خِدْمِتْهُمْ لَحَدِّي كُلِّنَا سَوَا نَلْحَقَوْا الْوِحْدَةْ فِي الْإِيمَانْ وَ نَعَرْفُوا إِبْن اللّٰهْ تَمَامْ. وَ كُلِّنَا نَبْقَوْا عَاقْلِينْ لَحَدِّي أَيِّ وَاحِدْ يَبْقَى تَمَامْ مِثِلْ الْمَسِيحْ هُو تَمَامْ.

2 كُرُنْتُس 1:10

وَ أَكِيدْ اللّٰهْ الْفَزَعْنَا مِنْ الْمَوْت دَا، هُو يَفْزَعْنَا بَتَّانْ. خَطَّيْنَا عَشَمْنَا فَوْقَهْ هُو بَسْ وَ أَكِيدْ هُو يَفْزَعْنَا بَتَّانْ.

يُوحَنَّا 10:18

مَا فِي نَادُمْ يَقْدَرْ يِشِيلْ رُوحِي لَاكِنْ أَنَا نَنْطِيهَا بِنِيّتِي. عِنْدِي قُدْرَةْ أَشَانْ نَنْطِي رُوحِي وَ عِنْدِي قُدْرَةْ نِشِيلْهَا بَتَّانْ. دَا بَسْ الشَّيّءْ الْأَبُويِ أَمَرَانِي بَيَّهْ.»

مَتَّى 20:23

وَ قَالْ لَيْهُمْ: «أَكِيدْ، تَشَرْبَوْا مِنْ كَاسِي لَاكِنْ مَا نَقْدَرْ نَعَزِلْ النَّاسْ الْيَقْعُدُوا بِإِيدِي الزَّيْنَةْ وَ بِإِيدِي الْإِسْرَةْ. اللّٰهْ جَهَّزْ الْبَكَانَاتْ دَوْل لِلنَّاسْ الْهُو بَسْ عَزَلَاهُمْ.»

إرْمِيا 9:23

وَ دَاهُو اللّٰهْ قَالْ: «خَلِّي الْحَكِيمْ مَا يِسْتَكْبَرْ بِحِكْمَتَهْ وَ خَلِّي الْقَادِرْ مَا يِسْتَكْبَرْ بِقُدُرْتَهْ وَ خَلِّي الْغَنِيْ مَا يِسْتَكْبَرْ بِغُنَايَهْ.

رَوْمَا 8:36

وَ مَكْتُوبْ فِي الْكِتَابْ: <فِي شَانَكْ إِنْتَ، يَكْتُلُونَا كُلَّ يَوْم وَ يَجْعَلَوْنَا مِثِلْ غَنَمْ الْجُزُرْ.>

غَلاطِية 6:17

خَلَاصْ، خَلِّي نَادُمْ وَاحِدْ مِنْكُو مَا يِبَشْتِنِّي بَتَّانْ أَشَانْ عِنْدِي أَلَمْ فِي جِلْدِي مِنْ زَعَلْ النَّاسْ وَ دِي الْعَلَامَةْ التِّوَصِّفْ أَنَا عَبْد عِيسَى بِالصَّحِيحْ.

2 بُطْرُس 1:13

أَشَانْ وَكِتْ أَنَا لِسَّاعْ قَاعِدْ حَيّ، وَاجِبْ نِذَكِّرْكُو لِمَا تَنْسَوْا.