فِلِبِّي 2:7 - الكتاب المقدس بالعربي الدارجي هنا تشاد

⁷ بِالْعَكْس، هُو خَلَّى مِنَّهْ كُلَّ شَيّءْ وَ سَوَّى نَفْسَهْ مِثِلْ عَبِدْ وَ قَصَّدْ يَلْدَوْه وَ يَبْقَى إِنْسَانْ.

فِلِبِّي 2:7 Cross References

2 كُرُنْتُس 8:9

أَشَانْ رَحْمَةْ رَبِّنَا عِيسَى الْمَسِيحْ تَعَرْفُوهَا. هُو غَنِيْ وَ لَاكِنْ فِي شَانْكُو إِنْتُو، هُو بِقِي فَقْرِي أَشَانْ بِفَقْرَهْ دَا، إِنْتُو تَبْقَوْا غَنِيِّينْ.

مَتَّى 20:28

سَوُّوا مِثْلِي أَنَا، إِبْن الْإِنْسَانْ. أَنَا مَا جِيتْ أَشَانْ النَّاسْ يَخْدُمُوا لَيِّ لَاكِنْ أَشَانْ نَخْدِمْ لِلنَّاسْ. وَ جِيتْ أَشَانْ نَفْدَى نَاسْ كَتِيرِينْ بِرُوحِي.»

يُوحَنَّا 1:14

وَ الْكَلِمَةْ بِقَتْ إِنْسَانْ وَ هُو سَكَنْ فِي أُسُطْنَا. وَ شِفْنَا قُدُرْتَهْ الْمَجِيدَةْ. وَ قُدُرْتَهْ هِي مَجِيدَةْ بِلْحَيْن وَ مُوَافْقَةْ لِلْإِبْن الْوَاحِدْ الْجَايِ مِنْ اللّٰهْ أَبُوهْ. وَ هُو مَلَانْ بِالرَّحْمَةْ وَ الْحَقّ.

رَوْمَا 8:3

شُرُوطْ التَّوْرَاةْ أَبَداً مَا قِدْرَوْا يِنَجُّوا النَّاسْ أَشَانْ ضُعُفْ طَبِيعَةْ الْإِنْسَانْ دَحَرَاهُمْ. وَ اللّٰهْ ذَاتَهْ سَوَّى الشَّيّءْ الشُّرُوطْ التَّوْرَاةْ مَا قِدْرَوْا يِسَوُّوهْ. هُو رَسَّلْ إِبْنَهْ الْوَاحِدْ لِيَبْقَى إِنْسَانْ فِي جِسِمْ مِثِلْ جِسِمْ الْمُذْنِبْ. وَ وَكِتْ هُو فِي جِسْمَهْ الْإِنْسَانِي دَا، اللّٰهْ حَاكَمْ فِي الذَّنِبْ مَرَّةْ وَاحِدْ.

غَلاطِية 4:4

لَاكِنْ الْوَكِتْ تَمَّ خَلَاصْ وَ اللّٰهْ رَسَّلْ إِبْنَهْ فِي الدُّنْيَا. هُو مَوْلُودْ مِنْ مَرَةْ وَ رَبَّوْه تِحِتْ شُرُوطْ التَّوْرَاةْ

عِبْرَانِيِّين 4:15

رَاجِلْ الدِّينْ هَنَانَا دَا يَعَرِفْ ضُعُفْنَا أَشَانْ هُو كُلَ، جَرَّبَوْه بِكُلَّ التَّجْرِبَةْ مِثِلْنَا لَاكِنْ هُو أَبَداً مَا سَوَّى ذَنِبْ.

رَوْمَا 15:3

أَشَانْ الْمَسِيحْ ذَاتَهْ مَا شَالْ الدَّرِبْ الْيَعَجِبْ نَفْسَهْ، لَاكِنْ مَكْتُوبْ فِي الْكِتَابْ: <الْيِعَيُّرُوكْ، مُعْيَارْهُمْ وَقَعْ فَوْقِي أَنَا كُلَ.>

إشَعْيا 53:11

وَ بَعَدْ تَعَبَهْ، هُو يِشِيفْ نُورْ الْحَيَاةْ وَ يَشْبَعْ مِنَّهْ. وَ بِتَعَبَهْ، عَبْدِي الصَّالِحْ يِسَوِّي نَاسْ كَتِيرِينْ صَالِحِينْ أَشَانْ هُو حِمِلْ خَطَاهُمْ.

عِبْرَانِيِّين 12:2

خَلِّي نُخُطُّوا عُيُونَّا فِي عِيسَى الْفَتَحْ لَيْنَا دَرِبْ الْإِيمَانْ وَ كَمَّلَهْ. مِنْ بَعِيدْ، هُو شَافْ الْفَرَحْ الْقَاعِدْ قِدَّامَهْ وَ حِمِلْ تَعَبْ الصَّلِيبْ وَ مَا فَكَّرْ فِي الْعَيْب الْخَطَّوْه فَوْقَهْ. وَ هَسَّعْ، هُو قَاعِدْ جَنْب عَرْش اللّٰهْ فِي نُصَّهْ الزَّيْنَايْ.

لُوقا 22:27

مَثَلاً، كَنْ نَادُمْ وَاحِدْ قَاعِدْ يَاكُلْ وَ نَادُمْ آخَرْ يِجِيبْ لَيَّهْ الْأَكِلْ، يَاتُو مِنْهُمْ الْكَبِيرْ؟ أَكِيدْ، يُقُولُوا الْقَاعِدْ يَاكُلْ هُو الْكَبِيرْ. وَ لَاكِنْ أَنَا ذَاتِي قَاعِدْ فِي أُسُطْكُو مِثِلْ الْخَدَّامْ الْيَخْدِمْ.

رَوْمَا 15:8

وَ فِي شَانْ دَا، نُقُولْ لَيْكُو كَدَرْ الْمَسِيحْ بِقِي خَدَّامْ لِلْيَهُودْ أَشَانْ يِوَصِّفْ كَدَرْ اللّٰهْ صَادِقْ وَ يِتِمّ الشَّيّءْ الْوَاعَدْ بَيَّهْ جُدُودْهُمْ.

فِلِبِّي 2:6

مِنْ أَوَّلْ هُو عِنْدَهْ طَبِيعَةْ اللّٰهْ لَاكِنْ مَا دَوَّرْ يَمْسُكْ لِنَفْسَهْ قُدُرْتَهْ الرَّبَّانِيَّةْ.

إشَعْيا 42:1

«دَاهُو عَبْدِي الْأَنَا قَاعِدْ نِسَاعِدَهْ وَ هُو بَسْ الْأَنَا إِخْتِرْتَهْ وَ فِرِحْت بَيَّهْ. أَنَا خَطَّيْت رُوحِي فَوْقَهْ وَ هُو يِبَيِّنْ الْعَدَالَةْ لِلْأُمَمْ.

زَبُور 22:6

وَ لَاكِنْ أَنَا، النَّاسْ مَا جَعَلَوْنِي نَادُمْ. وَ يِشِيفُونِي نِجِسْ مِثِلْ دُودْ التُّرَابْ وَ عَيَّبَوْنِي وَ أَبَوْنِي.

زَكَرِيَّا 9:9

«يَا صَهْيُون الْمِثِلْ بِنَيَّةْ، أَفْرَحَيْ زِيَادَةْ! عِيطِي بِفَرَحْ، يَا مَدِينَةْ الْقُدُسْ الْمِثِلْ بِنَيَّةْ! دَاهُو مَلِكِّ جَايِ لَيْكِ. هُو عَادِلْ وَ مُنَّصِرْ. هُو مِسْكِينْ وَ رَاكِبْ فِي حُمَارْ، فِي دَحَشْ وِلَيْد حُمَارَةْ.

مَتَّى 12:18

وَ إِشَعْيَا قَالْ: <دَاهُو عَبْدِي الْأَنَا عَزَلْتَهْ وَ النِّحِبَّهْ وَ أَنَا فِرِحْت بَيَّهْ. أَنَا نُخُطّ رُوحِي فَوْقَهْ وَ هُو يِبَلِّغْ عَدَالَةْ اللّٰهْ لِكُلَّ الْأُمَمْ.

عِبْرَانِيِّين 13:3

فَكُّرُوا فِي أَخْوَانْكُو الْقَاعِدِينْ فِي السِّجِنْ وَ أَجْعَلَوْا نُفُوسْكُو مِثِلْ قَاعِدِينْ مَعَاهُمْ. وَ أَخْوَانْكُو الْقَاعِدِينْ يَحْمَلَوْا التَّعَبْ، فَكُّرُوا فَوْقهُمْ أَشَانْ جِسِمْهُمْ مِثِلْ جِسِمْكُو.

رَوْمَا 1:3

وَ الْبِشَارَةْ دِي تِحَجِّي بِإِبْنَهْ الْبِقِي إِنْسَانْ مِنْ ذُرِّيَّةْ الْمَلِكْ دَاوُدْ

مَرْخُوس 9:12

وَ هُو رَدَّ لَيْهُمْ وَ قَالْ: «صَحِيحْ، إِلِيَاسْ يَجِي قُبَّالِي أَشَانْ يِعَدِّلْ كُلَّ شَيّءْ. لَاكِنْ مَا مِثِلْ فِي فِكِرْكُو، أَشَانْ مَكْتُوبْ فِي الْكِتَابْ كَدَرْ إِبْن الْإِنْسَانْ يَتْعَبْ تَعَبْ شَدِيدْ وَ النَّاسْ يَحْقُرُوهْ.

زَكَرِيَّا 3:8

«أَسْمَعْ، يَا يَشُوعْ كَبِيرْ رُجَالْ الدِّينْ وَ كُلَّ رُجَالْ الدِّينْ التِّحْتَكْ. إِنْتُو ذَاتْكُو عَلَامَةْ هَنَا الشَّيّءْ الْيُكُونْ. دَاهُو قَرِيبْ أَنَا نِرَسِّلْ عَبْدِي الْبِنَادُوهْ بِذْرَةْ.

دَنْيال 9:26

وَ بَعَدْ الْأُرْبُعْمِيَةْ وَ تَلَاتِينْ وَ أَرْبَعَةْ سَنَةْ دَوْل، النَّادُمْ الْمَسَحَوْه وَ دَرَّجَوْه مَلِكْ دَا يَكْتُلُوهْ وَ نَادُمْ يِدَافِعْ لَيَّهْ كَيْ مَا فِيهْ. وَ يَجِي مَلِكْ آخَرْ بِعَسْكَرَهْ وَ يِدَمِّرْ الْمَدِينَةْ وَ الْبَيْت الْمُقَدَّسْ. وَ لَاكِنْ الْمَلِكْ دَا، نِهَايَةْ حُكْمَهْ تَجِي عَجَلَةْ مِثِلْ السَّيْل. وَ فِي الأَخِيرْ، الْحَرِبْ وَ الدَّمَارْ الشَّدِيدْ يَبْقَوْا مِثِلْ مُقَرَّرْ.

إشَعْيا 49:3

وَ اللّٰهْ قَالْ لَيِّ: «يَا إِسْرَائِيلْ، إِنْتَ عَبْدِي! وَ بَيْك إِنْتَ، نِوَصِّفْ مَجْدِي.»

2 كُرُنْتُس 13:4

صَحِيحْ، الْمَسِيحْ خَلَّى مِنَّهْ الْقُدْرَةْ وَ مَاتْ فِي الصَّلِيبْ لَاكِنْ هُو حَيّ بِقُدْرَةْ اللّٰهْ. وَ فِي عَلَاقِتْنَا مَعَايَهْ، أَنِحْنَ مَا عِنْدِنَا قُدْرَةْ لَاكِنْ نَحْيَوْا مَعَايَهْ بِقُدْرَةْ اللّٰهْ. وَ الْقُدْرَةْ دِي، أَنِحْنَ نِوَصُّفُوهَا لَيْكُو.