Sililo 3:40 - Siswati 1996 Bible

Asihlolisise tindlela tetfu sitivivinye, bese sibuyela kuSimakadze.

Sililo 3:40 Cross References

2 Tikhronike 30:6

Inkhosi yakhipha tigijimi, talihamba lonkhe laka-Israyeli nelakaJuda tiphetse tincwadzi letatiphuma kuyo nakutiphatsimandla tayo, letatitsi: “Sive sonkhe saka-Israyeli, buyelani kuSimakadze Nkulunkulu wa-Abrahama, na-Isaka, na-Israyeli, khona atewubuyela kini, nine lenisele ngekuphunyula esandleni semakhosi ase-Asiriya.

2 Tikhronike 30:9

Nanibuyela kuSimakadze, labomnakenu nebantfwabenu batawutfola sihawu kulabatfumbi babo, bese babuya kulelive, ngobe Simakadze Nkulunkulu wenu unemusa nebubele. Angeke anifulatsele, nanibuyela kuye.”

Tihlabelelo 119:59

Nangicabanga ngetindlela tami, ngijikisa tinyatselo tami, ngiticondzise etimisweni takho.

Tihlabelelo 4:4

Nanitfukutsele ningoni, cabangisisani nisathulile etinhlitiyweni tenu, nisacambalele emacansini enu. Cabanga.

Isaya 55:7

Lomubi akayiyekele indlela yakhe lembi, nalokhohlakele ayekele imicabango yakhe lemibi. Akaphendvuke abuyele kuSimakadze, uyawuba nemusa kuye, akabuyele kuNkulunkulu wetfu, ngobe uyawumtsetselela ngenkhululeko.

Hezekeli 18:28

Ngenca yekutsi atinake tonkhe tono takhe labesatentile, agucuke kuto, lowo ngempela uyawuphila; angeke afe.

Hoseya 12:6

Kodvwa wena kufanele ubuyele kuNkulunkulu wakho, umtsandze, ulalele imitsetfo yakhe, wente intsandvo yakhe, ulindzele Nkulunkulu wakho ngaso sonkhe sikhatsi.

Hoseya 5:15

Ngiyawube sengibuyela endzaweni yami, baze balivume licala labo. Bayawufuna buso bami; baseselusizini lwabo bayawungifunisisa.”

Hoseya 6:1

“Wotani, asibuyele kuSimakadze. Sewusidzabule saba ticucu, kodvwa uyawusiphilisa; usilimatile, kodvwa uyakuwabopha emanceba etfu.

Imisebenti yebaPhostoli 26:20

kodvwa ngashumayela kusukela khona eDamaseko, naseJerusalema, nakulo lonkhe laseJudiya nakubetive ngimemetela kutsi abaphendvuke babuyele kuNkulunkulu bente imisebenti lekhombisa kuphendvuka.

1 kubaseKorinthe 11:28

Kodvwa umuntfu akatihlolisise yena, emvakwaloko-ke adle lesinkhwa anatse kulendzebe.

1 kubaseKorinthe 11:31

Kepha kube besitehlulela tsine ngalokufanele, besingeke sehlulelwe.

2 kubaseKorinthe 13:5

Tihlolisiseni nine ngekwenu nitibone kutsi nibambelele yini ekukholweni kwenu. Tivivinyeni nine. Aniboni yini kutsi Jesu Khristu ukini? Ngaphandle kwaloko nitehluleki!

Dutheronomi 4:30

Naniselusizini senehlelwe ngito tonkhe letintfo, kuyawutsi emvakwaloko nibuyele kuSimakadze Nkulunkulu wenu, nimlalele.