Psalms 6 - Bible Ni Thothup

Ba meybil ko ayuw ko ngiyal’ nike yib e gafgow

¹ SOMOL, dab mu puwan’ ngog ni ga ba damumuw, ma dab mu gechig nigeg u fithik’ e damumuw.

² SOMOL, kem’ay gelngig; ere wurengan’um ngog! Mu pi’ gelngig; ya kri thowparwog

³ ku gu aw nga fithik’ e oloboch. SOMOL, bu uw n’umngin nap’an ni ngam son, fin mu ayuwegneg?

⁴ SOMOL, moy ngam ayuwegneg; u fithik’ e runguy rom e ngam lageg riy ko yam’.

⁵ U lan e fayleng ko yam’ e dariy be’ ni ga ra yib ngan’ riy; ma dariy be’ nra pining e sorok ngom u rom.

⁶ Ke aw parwog ko meyor; gubin e nep’ nma munur e chob rog nga lu’ag; gayul rog e ke wanum ko lu’.

⁷ Ka ri chugur ni nge dab kug guy ban’en; ya owcheg e kari thow ni bochan e meyor ni be k’aring e pi to’ogor rog ngog.

⁸ Mu paloggad rog, gimed e pi’in kireb lanyan’! I SOMOL e be rung’ag laman e meyor rog;

⁹ be motoyil ko man ayuw ni gu be yornag ma bayi fulweg taban e meybil rog.

¹⁰ Pi to’ogor rog e bay ra nanged tamra’en e waer, yug nap’an e ra balyang lanin’rad mi ni tulufrad ngar milgad.