Psalms 54 - Bible Ni Thothup

Ba meybil ni ngan aywegey rok e pi to’ogor

¹ A Got, mu ayuwegneg nga gelngim; gelngim e nge m’ug riy ni bfel’ e rog!

² A Got, mu rung’ag e meybil rog; mmotoyil ko pi thin ni gu be yog!

³ Girdi’ nib tolngan’rad e karbadnag e cham ngog; girdi’ ndariy e runguy rorad e yad be guy rogon ni ngar thanged e pogofan rog — bogi girdi’ ni der un Got u wan’rad.

⁴ Machane Got e ir e ma ayuwegneg. I SOMOL e ir e ma n’ufegeg.

⁵ Mang e yigi cheleg Got e kireb rok e pi to’ogor rog nge aw ngorad. Ra thang owcharad ni bochan e ba yul’yul’.

⁶ A SOMOL, rib felan’ug ngay ni gu ra pi’ ba maligach ngom; bay gu pining e magaer ngom ni bochan e gab manigil.

⁷ Ya kam chuwegeg u fithik’ urngin e oloboch rog, ma kug guy e pi to’ogor rog ni kar waergad.