Psalms 140 - Bible Ni Thothup

Ba meybil ni fan ko Ayuw

¹ SOMOL, mu ayuwegneg u pa’ e girdi’ nib kireb; mu ayuwegneg rok e pi’in yad ma’ngach ko cham.

² Gubin ngiyal’ ni yad be t’ar liyaben e tin kireb, gubin ngiyal’ ni yad be k’aring e malu’eg thin.

³ Bolowtherad e bod e porchoyog ni tak’ad; ma pi thin rorad e bod e yub rok e porchoyog ni kobra.

⁴ SOMOL, mu matanagiyeg rok e pi’in kireb; mu ayuwegneg u pa’ e pi’in ma’ngach ko cham ni yad be t’ar liyaben ni nggu thay.

⁵ Girdi’ nib tolangan’rad e kar fal’aged ba tafich ni fan ngog; kar ted e wup rorad, ma to’oben e wo’ kar ted e pi tafich ngay ni ngar koledgag.

⁶ Me lungug ngak SOMOL, “I gur e Got rog.” SOMOL, murung’ag e meyor rog ni gu be man ayuw!

⁷ SOMOL rog nib Th’abi Tolang, ni yoror rog nib el, kam rungrung ngog u fithik’ e mael.

⁸ SOMOL, dab mu pi’ ngak e pi’in kireb e tin yad ba’adag; dab mu pag e pi makath ni yad be tay nge fel’ rogon.

⁹ Dab mu pag e pi to’ogor rog ngar gelgad; mu gagiyegnag e pi thin rorad ni kireb nib sor ngog nge sul ngorad.

¹⁰ Mang e yigi mul e kol nga dakenrad; mang e yi gu nin’rad ngalan ba low ni dabkiyag ni ngar sulod ngalang.

¹¹ Mang e yigi dabi fel’ e tin be leamnag e pi’in yad ma t’ar e thin nga daken e girdi’; mang e yigi buch wa’athan e girdi’ nib ma’ngach ko cham nge math owcharad.

¹² SOMOL, gumnang ni ga ma n’ufeg e pi gafgow ko oloboch rorad nge mat’wun e pi’in bt’uf e ayuw rorad.

¹³ Pi’in bmat’aw e rriyul’ ni bay ra pininged e sorok ngom; bay ur pired u p’eowchem.