Nsumuinu 1 - MUKANDA WA MYIDI MUKULU

¹ Shelomu, muana wa Davide, mukalenga wa bena Izrayele, ke muena nsumuinu idi mifunda eyi.

Tshidibu bafundila mukanda wa nsumuinu

² Nsumuinu eyi idi ilongesha bantu mua kusomba biakane ne meji mu bantu.

³ Idi ilongesha bantu mua kupeta lungenyi, bua balonde njila wa buakane, bikale ne muoyi umue, kabayi badinga bantu bakuabu!

⁴ Nsumuinu idi ileja bantu badi kabayi banji kumona malu panu njila udibu mua kulonda; idi ilongesha bansongalume malu adibu ne bua kuelangana meji.

⁵ Nansha bena meji batshidi amu mua kulonga malu makuabu padibu babala nsumuinu eyi. Badi ne lungenyi nebapetelemu njila wa kulonda.

⁶ Nebajingulule mianu ne malu masokome bia bantu badi balongesha mudi meji.

⁷ Muntu udi musue kupeta meji, atshine, kabidi anemeke Maweja-Nangila. Bantu badi bapepeja malongesha ne mibelu bia bena meji mbatshimbakane.

Mutudi mua kudimukila bansongalume babi

⁸ Muananyi, uteleje tshidi tatuebe ukulongesha. Kupetudi mibelu ya kudi mamuebe.

⁹ Yoyi neikupe lumu bu nsala wa kalumbandi muasa ku mutu, nansha bu mabue a busanga adibu bela mu nshingu.

¹⁰ Muananyi, padi bansongalume babi basue kukufikisha ku bubi, kuanyishi to. Kubalondi

¹¹ padibu bakuamba ne: “Vuaku, tuye kualamina bantu mu njila bua kubashipa, tubajikidile, tubabunde, nansha bobu kabayi batuenzele bibi.

¹² Tubakuate, tubashipe patshidibu ne dikanda. Tubafikishe ku lufu; tuenze tuetu mene mudimu udi lufu nawu!

¹³ Tubanyenge bionsu bidibu nabi, tuwuje yetu nzubu.

¹⁴ Luaku, tuye. Neupete tshiebe tshintu, bualu netubiteke mu tshibombu tshimue!”

¹⁵ Muananyi, kuendakanyi ne bantu ba mushindu ewu to. Umbuka mu njila yabu.

¹⁶ Bualu badi bipatshila bua kuenza malu mabi. Badi baluijakaja bua kuela mashi a bantu panshi.

¹⁷ Nyunyi mumone tshilembi umuteya, kena upia mu disoka adi to.

¹⁸ Kadi bantu ba nanku badi baditeya nkayabu; bifufu biabu neabenzele bobu mene bibi.

¹⁹ Ke mudi bantu bivi badienzela bibi bobu nkayabu: muivi nebamunyenge muoyi wende.

Meji adi abela bantu

²⁰ Meji adi ela diyi mu misesu, akula bikole mu bisalu.

²¹ Adi ela lubila mu mansanga a njila, ambila bantu badi basangila ku biibi bia mu tshimenga ne:

²² “Nuenu batshimbakane, nenushale amu batatakane too ne ku diba kaayi? Nuenu basekianganyi, nenunseke too ne ku diba kaayi? Nuenu bantu bapote, nenubenge kulonga malu too ne ku diba kaayi?

²³ Londayi mundi nnulongesha. Nanku mibelu yanyi neinuludike. Ne tuabanyangane nenu lungenyi lundi nalu.

²⁴ Kadi pandi nnubikila, nudi nubenga kufika kundi. Ndi nnuoluela tshianza bua kunuambuluisha, kadi kanuena basue nansha kuntangila.

²⁵ Nudi nubenga mibelu yanyi yonsu. Nudi nulengulula bindi nnulongesha.

²⁶ Nanku meme kabidi nenseke panuikala mu dikenga. Nenseke pikala bowa bunukuata.

²⁷ Bualu dituku dikuabu dikenga nedinukuate bu mvula wa tshipupu. Bowa nebunuenze bu tshipepela tshia mvunde. Lutatu ne dipampakana nebinutatshishe bikole.

²⁸ Dituku adi nenumbikile bua meme kunuambuluisha, kadi tshiakunuandamuna to. Nenunkebe, kadi kanuakummona to.

²⁹ Nebienzeke nanku, bualu nudi nubenga kulonga malu, kanuena basue kutshina Maweja-Nangila to.

³⁰ Nudi nulengulula mibelu yanyi, kanuyi nuangata bindi nnuambila ne mushinga.

³¹ Nenupete dinyoka dinudi nudikebela. Binudi nuenza nebinukebele makenga.

³² Bualu tshibulengenyi udi ubutuka padiye ubenga meji. Kalengu ka bantu bapote kadi kabajimija.

³³ Kadi muntu udi unteleja udi ushala mu bupole. Neasombe talalaa kayi utshina dikenga to.”