Luke 3 - MUKANDA WA MYIDI MUKULU

Yowanane-Batiste udi ulongesha bantu

¹ Tshidimu tshia dikumi ne tshitanu tshia bukalenga bua mukalenga wa bakalenga Tiberiyuse, Ponsiyo Pilate uvua mutangidi wa buloba bua Yudeya, Erode uvua mukalenga mu buloba bua Ngalileya, muanabu Filipe mu buloba bua Itureya ne bua Trakonitise, Lisaniyase uvua mukalenga mu buloba bua Abilene,

² ne Anase ne Kayifa bavua batuangaji banene. Diba adi, Yowanane, muana wa Zekarya, kumvua diyi dia Mvidi Mukulu mu tshipela.

³ Ke kutuadijaye kuendakana mu buloba bujima bua pabuipi ne Yardene. Uvua wela mbila ne: — Akajayi nsombelu yenu. Banutue mu mayi. Nanku Mvidi Mukulu neajimije mibi yenu.

⁴ Ebi bivua bienzeka muvua muambi Yeshaya mufunde mu mukanda wende ne: “Ndi ngumvua muntu wela diyi dikole mu tshipela ne: Longoluelayi Maweja-Nangila njila. Numuenzele njila milulame.

⁵ Tshibandabanda tshionsu, nutshiuwuje. Mikuna minene ne mikese, nuyipuekeshe. Njila mikonyangale, nuyilulamije. Binina bia mu njila, nubilandakaje.

⁶ Nanku bantu bonsu nebamone mudi Mvidi Mukulu ubasungidila.

⁷ Bantu bavule bavua bafika kudi Yowanane, bua abatue mu mayi. Uvua ubambila ne: — Nuenu nudi nyoka! Uvua munuambile munudi mua kupanduka ku dinyoka dikadi Mvidi Mukulu musue kununyoka nadi nnganyi?

⁸ Enzayi malu adi aleja ne: nudi bakaje nsombelu yenu. Kanudiambidi munda muenu ne: “Abrahame ke nkambua wetu.” Bualu ndi nnujadikila ne: Mvidi Mukulu udi mua kuandamuna mabue aa, ashale ndelanganyi ya Abrahame!

⁹ mBamane kulongolola kasuyi, bua bakosele naku mitshi ku miji. Mutshi onsu udi kauyi ukuama bimuma bilenga, nebaukose, bawele mu kapia.

¹⁰ Nanku bantu kumukonka ne: — Kadi tuenze tshinyi?

¹¹ Yowanane kubandamuna ne: — Muntu udi ne bilamba bibidi bia pambidi, afile tshimue kudi udi kayi natshi. Udi ne biakudia, apeshe badi kabayi nabi.

¹² Balambuishi ba bitadi kabidi kufika, bua Yowanane abatue mu mayi. Bavua bamukonka ne: — Mulongeshi, tudi ne bua kuenza tshinyi?

¹³ Yowanane kubandamuna ne: — Kanufutshishi bantu bitadi bipite mudi mikenji miambe to.

¹⁴ Basolayi kabidi kumukonka ne: — Apu tuetu kabidi, netuenze tshinyi? Yeye kubandamuna ne: — Kanunyengi muntu makuta, nansha ku bukole, nansha ku dimudingila bualu. Kadi nusanke ne bidibu banufuta.

¹⁵ Bantu bavua benda ne ditekemena dikole, badikonka mundamunda ne: Yowanane udi mua kuikala Kristu, Musungidi wetu, anyi?

¹⁶ Kadi Yowanane kubambila bonsu ne: — Meme ndi nnutua mu mayi. Kadi udi mumpite meme ku bukole, nealue. Meme tshiena mukumbane nansha mua kumukopola bisabata. Yeye neanutue munda mua Mueyelu wa Tshijila, ne mu kapia.

¹⁷ Udi ne lubenji mu bianza biende, bua kupepula bisote, kushiya ntete. Nealame ntete mu diyeba. Kadi neoshe bisote mu kapia kadi kakayi kajima.

¹⁸ Yowanane uvua ubela bantu kabidi mibelu mikuabu ya bungi. Ke muvuaye ubamanyisha Lumu lua Disanka nanku.

¹⁹ Kadi Yowanane kutandisha kabidi Erode, mukalenga wa mu buloba abu, bua pavuaye musele Erodiyade, mukaji wa muanabu, ne bua malu mabi makuabu a bungi avuaye muenze.

²⁰ Nenku Erode uvua musakidile kabidi bualu bukuabu bupite bubi: kueleshaye Yowanane mu lukanu.

Yowanane-Batiste udi uvua Yezu mu mayi

²¹ Yowanane mumane kutua bantu bonsu mu mayi, kushisha kutuaye ne Yezu kabidi. Diba divua Yezu utendelela, diulu kubululuka,

²² Mueyelu wa Tshijila kumutulukila ne mubidi bu wa nyunyi wa nkudimba. Ke diyi kumvuika mu diulu ne: — Wewe udi muananyi munanga. Ndi ne disanka bualu buebe.

Dilondangana dia bankambua ba Yezu

²³ Pakatuadija Yezu mudimu wende, ukavua ne bidimu bu makumi asatu. Bantu bavua bela meji ne: Yezu udi muana wa Yozefe. Yozefe uvua muana wa Eli.

²⁴ Bankambua bakuabu ba Yezu badi balondangana mushindu ewu: Matate, Levi, Melki, Yanayi, Yozefe,

²⁵ Matitya, Amosa, Nakume, Esli, Nagayi,

²⁶ Maate, Matitya, Semeyine, Yoseke, Yoda,

²⁷ Yowanane, Resa, Zerubabele, Sheyaltiyele, Neri,

²⁸ Melki, Adi, Kosame, Elmadame, Ere,

²⁹ Yoshuwa, Eliyezere, Yorime, Matate, Levi,

³⁰ Shimeyone, Yuda, Yozefe, Yoname, Eliyakime,

³¹ Meleya, Menna, Matata, Natane, Davide,

³² Ishayi, Obede, Bowaze, Shela, Nashone,

³³ Aminadabe, Admine, Ami, Esrome, Perese, Yuda,

³⁴ Yakobe, Izake, Abrahame, Tera, Nakore,

³⁵ Seruge, Regu, Pelege, Ebere, Shela,

³⁶ Kenaane, Arpakshade, Sheme, Nowa, Lemeke,

³⁷ Metushela, Enoke, Yerede, Maleleyele, Kenaane,

³⁸ Enoshe, Shete, Adame. Adame ke muana wa Mvidi Mukulu.