Luke 2 - MUKANDA WA MYIDI MUKULU

Diledibua dia Yezu

¹ Tshikondu atshi, mukalenga wa bakalenga Auguste uvua mutume diyi bua babadike bantu bonsu ba mu bukalenga bua bena Rome.

² Ke musangu wa kumpala uvuabu babadike bantu nanku. Bivua bienzeka diba divua Kiriniyuse mutangidi wa buloba bua Siriya.

³ Bantu bonsu bavua baya kudifundisha, muntu yonsu kuabu.

⁴ Yozefe kumuka mu Ngalileya mu tshimenga tshia Nazarete, kuya mu buloba bua Yudeya mu tshimenga tshidibu binyika Betleyeme, muvuabu balelele mukalenga Davide. Bualu Yozefe uvua wa ku ndelanganyi ya Davide.

⁵ Uvua uya kudifundishamu pamue ne mubangila wende Mariya uvua kulu.

⁶ Pavuabu mu Betleyeme, dituku divua Mariya ne bua kulela kukumbanadi.

⁷ Kulelaye muana wa balume, muanabute wende. Kumujingilaye mikusu, kumuladika mu tshidilu tshia nyama. Bualu kabavua ne muaba mu nzubu wa tshilala benyi.

Mutumibue udi umuenekela balami ba mikoku

⁸ Mu buloba abu muvua balami ba mikoku, batshisha butuku mu mpata bua kulama mikoku yabu.

⁹ Mutumibue wa Maweja-Nangila kubamuenekela. Butumbi bua Maweja-Nangila kubela munkatshi ne bukenke bunene. Balami kutshina bikole.

¹⁰ Kadi mutumibue kubambila ne: — Kanutshinyi to. Ndi munutuadile Lumu lua Disanka luasankisha bantu bonsu bikole:

¹¹ butuku ebu mu tshimenga tshia Davide, mbalelamu Musungidi wenu. Yeye ke Kristu Mfumu.

¹² Nenumujadikile ku tshimanyinu etshi: nenusangane muana mutekete, mujingila mikusu, muladika mu tshidilu tshia nyama.

¹³ Diakamue mutumibue wa Mvidi Mukulu awu kumuelabu munkatshi kudi batumibue bakuabu ba mu diulu. Bavua batumbisha Mvidi Mukulu, bamba ne:

¹⁴ “Butumbi buonsu budi kudi Mvidi Mukulu mulu mu diulu, bupole buende budi pa buloba, kudi bantu badiye munange!”

Balami ba mikoku badi baya ku Betleyeme

¹⁵ Pavua batumibue babashiye, bapingane mu diulu, balami ba mikoku kuambilangana ne: — Tuyayi ku Betleyeme: tuye kumona bidi bienzekaku, bidi Maweja-Nangila mutumanyishe ebi.

¹⁶ Kuambulujabu lukasa bua kuya. Kusanganabu Mariya ne Yozefe, ne muana muladika mu tshidilu tshia nyama.

¹⁷ Balami ba mikoku babamona, kulondabu malu onsu avuabu babambile bua muana mutekete ewu.

¹⁸ Bonsu bavua bumvua bivua balami balonda bavua bakema.

¹⁹ Kadi Mariya uvua ulama malu onsu aa mu muoyi, welangana meji bikole munda muende.

²⁰ Ke balami ba mikoku kupingana kuabu. Bavua batendelela Mvidi Mukulu, bamutumbisha bua bionsu bivuabu bumvua ne bamona. Bualu bionsu bitua bienzeka amu muvua mutumibue mubamanyishe.

Badi binyika muana dina

²¹ Lumingu lujima lumane kupita, tshikondu tshia kuteka muana panshi kukumbana. Kuinyikabu muana dina dia Yezu, divua mutumibue muambe, mamuende wa Yezu kayi muanji kuimita difu.

Badi balambula Yezu mu nzubu wa Mvidi Mukulu

²² Ke tshikondu kukumbana tshivua Yozefe ne Mariya ne bua kudikobolola bilondeshile muvuabu bafunde mu mikenji ya Moshe. Nanku kuyabu ne Yezu muana mu Yerushalayime bua kumulambula Maweja-Nangila.

²³ Bualu mbafunde mu mikenji ya Maweja-Nangila ne: “Muanabute yonsu wa balume nebamujidile mu dina dia Maweja-Nangila.”

²⁴ Batua balambula kabidi ne mulambu udibu bafunde mu mikenji ayi ne: “Nufile nkutshi ibidi, nansha bana ba nkudimba babidi.”

²⁵ Diba adi mu Yerushalayime muvua muntu, dina diende Shimeyone. Uvua unemeka Mvidi Mukulu, ukumbaja bivuaye musue. Uvua muindile muntu uvua ne bua kusungidila bena Izrayele. Mueyelu wa Tshijila kabidi uvua nende.

²⁶ Uvua mudianze kumumanyisha ne: kuena ufua, kuyi muanji kumona Kristu, Musungidi mutuma kudi Maweja-Nangila.

²⁷ Nanku Mueyelu kulombola Shimeyone, kumufikisha mu nzubu wa Mvidi Mukulu. Pavua baledi ba Yezu bafike nende mu nzubu amu, bua kumuenzela bitua mikenji miambe,

²⁸ Shimeyone kuambula muana mu maboku ende, kuela Mvidi Mukulu tuasakidila, wamba ne:

²⁹ — Mukalenga, biuvua mulaye mbimane kukumbana. Witabe mpindiewu bua muntu webe afue mu bupole.

³⁰ Bualu ndi mudimuene lupandu luebe,

³¹ luuvua mulongoluele bisamba bionsu.

³² Ke butoke budi bumanyisha bisamba bionsu muudi, bupetesha bena Izrayele, bantu bebe, lumu.

Shimeyone udi umanyisha bidi ne bua kuenzeka

³³ Tatuende ne mamuende wa Yezu bavua bakema bikole bua malu avua Shimeyone wakula bualu bua Yezu.

³⁴ Shimeyone kubela lupemba, kuambila Mariya, mamuende wa Yezu ne: — Mvidi Mukulu udi musungule muana ewu bua kushindisha ne kujula bantu ba bungi mu Izrayele. Yeye neatumanyishe mudi Mvidi Mukulu. Kadi bantu nebamujudile milandu.

³⁵ Nenku neasokolole meji adi munda mua bantu ba bungi. Wewe kabidi, dikenga nedisompole muoyi webe bu muele.

Ana, muambi mukaji

³⁶ Kuvua kabidi Ana, muambi mukaji. Uvua muana wa Penuwele, wa mu tshisamba tshia Ashere. Ukavua ne bidimu bia bungi. Uvua mushale mu dibaka ne bayende wa ku buana bidimu muanda mutekete.

³⁷ Pashishe kushalaye mukamba. Tshikondu atshi uvua mukumbaje bidimu makumi muanda mukulu ne binayi. Uvua ukuatshila Mvidi mukulu mudimu bufuku ne munya, kayi umuka mu nzubu wende. Uvua ujila biakudia, utendelela Mvidi Mukulu.

³⁸ Kufikaye diba adi, wela Mvidi Mukulu tuasakidila. Uvua uyukidilangana, pa malu adi atangila muana, ne bantu bonsu bavua bindile dituku divua Mvidi Mukulu mua kusungila Yerushalayime.

Badi bapingana ne muana mu Nazarete

³⁹ Baledi ba Yezu bamane kukumbaja bionsu bivua mikenji ya Maweja-Nangila miambe, kupinganabu ne Yezu mu Ngalileya mu tshimenga tshiabu tshia Nazarete.

⁴⁰ Muana uvua ukola, utantamana. Uvua muwule ne meji, kabidi Mvidi Mukulu uvua umunanga.

Yezu muana mu nzubu wa Mvidi Mukulu

⁴¹ Ku tshidimu ku tshidimu baledi ba Yezu bavua baya mu Yerushalayime ku tshibilu tshia Dipita dia Maweja-Nangila.

⁴² Yezu mumane kupeta bidimu dikumi ne bibidi, kuyabu nende mu tshibilu bu muvua tshibidilu.

⁴³ Tshibilu tshimane kujika, baledi bende kupingana kuabu. Kadi Yezu muana kushala mu Yerushalayime, baledi bende kabayi bamanye.

⁴⁴ Bavua bela meji ne: Yezu udi kudi balunda betu batudi nabu mu luendu. Kadi bamane kuenda dituku dijima, ke kushisha kutuadijabu kumukeba mua bena kuabu, ne mua balunda babu.

⁴⁵ Kadi nanshabu kumusangana. Ke kupinganabu mu Yerushalayime, benda bamukeba.

⁴⁶ Dituku disatu kumusanganabu mu nzubu wa Mvidi Mukulu. Uvua musombe munkatshi mua balongeshi ba bena Yuda, ubateleja, ubela ne nkonku.

⁴⁷ Bantu bonsu bavua bamuteleja, bavua bakema lungenyi luende, ne ngandamuna avuaye wandamuna.

⁴⁸ Baledi bende bamumona, kukemabu bikole. Mamuende kumukonka ne: — Muananyi, udi mutuenzele nenku bua tshinyi? Tatuebe ne meme tuvua batate bikole, tuenda tukukeba ne dipampakana.

⁴⁹ Yezu kubandamuna ne: — Kadi nuvua nunkebela tshinyi? Kanuena bamanye ne: ndi ne bua kuikala mu malu a Tatuanyi anyi?

⁵⁰ Baledi bende kabavua bajingulula tshi-vuaye ubambila to.

⁵¹ Ke Yezu kupingana nabu mu Nazarete. Uvua ubatumikila. Mamuende uvua ulama malu aa onsu mu muoyi wende.

⁵² Yezu uvua utantamana, ukola ne meji. Uvua ulengelela Mvidi Mukulu, ulengelela kabidi ne bantu.