Filemone 1 - MUKANDA WA MYIDI MUKULU

Diela dia muoyi

¹ Meme Polu, udi mubuele mu lukanu bualu mvua mukuatshile Yezu Kristu mudimu, pamue ne muanetu Timote, tudi tunutumina nuenu bonsu mukanda wetu ewu. Wewe Filemone, mulunda wetu, utudi tukuata nende mudimu,

² pamue ne Tshisumbu tshia bena ditaba badi basangile mu nzubu muebe, kabidi ne muanetu wa bakaji Apiya, ne Arshipe, utudi nende mu mvita, tudi tunujingila bonsu ne:

³ dinanga ne bupole bia Mvidi Mukulu Tatu wetu ne Mfumu wetu Yezu Kristu bishindame munda muenu.

Dinanga ne ditaba bia Filemone

⁴ Filemone musuibue, misangu yonsu indi ntendelela Mvidi Mukulu, ndi nkuvuluka, ngela Mvidi Mukulu tuasakidila.

⁵ Bualu ndi ngumvua bantu bamba muudi unanga bena tshisamba tshia Mvidi Mukulu bonsu, kabidi muudi witaba mfumu Yezu.

⁶ Ndi ndomba Mvidi Mukulu bua didisanga dietu nebe mu ditaba dikuame bimuma. Ke muudi mua kumanya bimpe bitambe bilenga bionsu bitudi nabi munda mua Kristu.

⁷ Muanetu Filemone, mvua musanke bikole, mukole muoyi, pamvua mumvue muudi unanga, ukankamija kabidi bena tshisamba tshia Mvidi Mukulu.

Polu udi ulomba Filemone bua afuile Onezime luse

⁸ Nanku, nansha meme mupete bumfumu kudi Kristu bua kukufundila tshiudi ne bua kuenza,

⁹ ndi musue amu kukusengelela, bua dinangangana dietu dimueneke patoke. Meme Polu nkadi mukulakaje. Ndi kabidi mu lukanu, bualu ndi muitabe Yezu Kristu.

¹⁰ Ndi ngakuila Onezime. Ukadi muananyi undi mufikishe mu ditaba pandi mu lukanu apa.

¹¹ Kale kavua ukulengelela to. Kadi mpindiewu ukadi utulengelela bubidi buetu.

¹² Ndi mmupingaja kuudi lelu. Yeye ukadi bu meme mene.

¹³ Mvua musue kumulama pabuipi nanyi, pandi mu lukanu emu bua Lumu lua Disanka, bua angambuluishe pa muaba webe.

¹⁴ Kadi tshivua musue kuenza nanku, tshiyi mukuebeje to. Tshiena musue kukuenzela bualu buimpe ku bukole. Ndi njinga ubuenze ku budisuile buebe.

¹⁵ Bumue Onezime uvua muanji kumuka kuudi tshitupa, bua, papinganaye, ashale kuudi kashidi.

¹⁶ Mpindiewu katshiena mupika, kadi mmupite mupika: ukadi muanetu musuibue. Ndi mumunange bikole. Kadi wewe udi ne bua kupita kumunanga, bualu uvua mupika webe, mpindiewu ukadi muanenu munda mua Mfumu.

¹⁷ Paudi untangila bu muanenu mu ditaba, umuakidile bu meme.

¹⁸ Pikalaye mukuenzele bualu bubi, nansha pikalaye ne dibanza diebe, dibanza edi dishale dianyi.

¹⁹ Ndi mfunda ne tshianza tshianyi miaku eyi ne: Dibanza adi, meme Polu, nenkufutedi. (Bushuwa, tshiena musue kukuvuluija ne: udi kabidi ne dianyi dibanza, ke muoyi webe mene.)

²⁰ Eyowa, muanetu, ndi nkusengelela ne: unsankishe bualu bua Mfumu. Muoyi wanyi upete ditalala kuudi, bualu tudi bantu bamue mu Kristu.

²¹ Pandi nkufundila apa, ndi mujadike ne: newenze tshindi mukulombe. Ndi mumanye ne: neutshikumbaje, upitshishe kabidi.

²² Undongoluele kabidi muaba wa kulala, bualu ndi mutekemene ne: Mvidi Mukulu neitabe malomba enu. Neampingaje kunudi.

Mioyi ya ndekelu

²³ Epafrase, utudi nende mu lukanu, bualu tudi bitabe Yezu Kristu, udi unuela muoyi.

²⁴ Marke, Aristarke, Demase ne Luke, badi bakuata nanyi mudimu, badi banuela kabidi muoyi.

²⁵ Dinanga dia Mfumu wetu Yezu Kristu dishindame munda muenu.