Luke 9 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uyisha bayidi bandi, udi ubamuangalasha

¹ Yeye wakabikila bayidi bandi dikumi ne babidi, wakabaha bukole ne bukokeshi bua kuleshabo bademon bonso, ne bua kukoleshabo bakadi ne mabedi.

² Yeye wakabatuma bua kuambilabo bantu bualu bua bukelenge bua Nzambi, ne bua kukoleshabo bena mabedi.

³ Yeye wakabambila ne, Kanuangatshi bintu bia kuya nʼabi mu luendu, anyi tshibangu, anyi tshibombo, anyi bidia, anyi mpalata, anyi bikowelu bibidi.

⁴ Hanuabuela mu nsubu, nushalemu tô ne hanumuka.

⁵ Bantu badi kabai banuitabusha, hanutshidi nuluhuka mu musoko au, nututule nsenga idi mu makasa enu bu tshimanyinu tshia dibenga diabo.

⁶ Bakamuangalaka, bakaya mu misoko mikese tô, benda bamba lumu luimpe, bashikisha masama a bantu kuonso kuakayabo.

⁷ Muloho Helode wakunvua lumu lua malu au onso akenzabo; wakatamba kulubakana, bualu bua bantu bakuabo bakadi bamba ne, Yone wakubika ku lufu;

⁸ banga ne, Eliya wakumueneka; banga ne, Muprofete wa kale wakubika kabidi.

⁹ Helode wakamba ne, Nakukosa Yone mutu; ahu au undi ngunvua lumu luandi nganyi? Wakakeba mua kumumona.

Bayidi ba Yesu badi bahingana, Yesu udi udisha bantu binunu bitanu

¹⁰ Hakahingana bapostolo, bakambila Yesu malu akenzabo. Wakabangata, wakaya nʼabo nkayabo mu musoko, dina diau Bete-saîda.

¹¹ Kadi bantu ba bungi, hakatangilabo bualu ebu, bakamulonda; yeye wakabakidila, wakabambila bualu bua bukelenge bua Nzambi, wakakolesha bakadi ne mabedi.

¹² Diba diakamba kubuela, bayidi bandi dikumi ne babidi bakalua, bakamuambila ne, Umuangalashe bantu, baye mu misoko ne mu luseke elu bua kulala ne bua kuangata bia kudia: bualu bua kunoko tudi mu tshihela.

¹³ Kadi yeye wakabambila ne, Nuenu nubahe bia kudia. Bakamba ne, Katuena ne bia kudia bihite mitanda itanu ne mishiha ibidi, anu bituaya kusumba bia kudia bia bantu aba bantu.

¹⁴ Bakadi balume bu binunu bitanu. Yeye wakambila bayidi bandi ne, Nubashikike hanshi, ku tshisumbu bu makumi atanu, ku tshisumbu bu makumi atanu.

¹⁵ Bakenza nunku, bakabashikika buonso buabo.

¹⁶ Yeye wakamema mitanda itanu ne mishiha ibidi, wakatangila mulu, wakabivuidishila disanka, wakabitshibula, wakabifila mu bianza bia bayidi bua kubitekabo ku mpala kua bantu.

¹⁷ Bakadia, bakukuta buonso buabo; bakangula bihesa bia bidia biakadi bishala bisaka dikumi ne bibidi.

Petelo udi witabusha ne, Yesu udi Muana wa Nzambi

¹⁸ Hakadiye utendelela Nzambi ha nkayandi, bayidi bakadi ha buihi nʼandi; yeye wakabakonka ne, Bantu badi bangamba meme ne, Nganyi?

¹⁹ Bakamuandamuna ne, Yone Mubatiji; kadi bakuabo badi bamba ne, Eliya; bakuabo ne, Muprofete wa kale wakubika kabidi.

²⁰ Yeye wakabakonka ne, Kadi nuenu nudi nungamba ne, Nganyi? Petelo wakamuandamuna ne, Kilisto wa Nzambi.

²¹ Yeye wakabambila bikole ne, Kanuambidi muetu bualu ebu;

²² wakabambila ne, Budi Muana wa muntu nʼabu mbua kukengeshibua makenga a bungi, ne bua kuhidibua kudi bakulu ne kudi bakuidi banene ba Nzambi ne kudi bafundi, ne bua kushihibua, ne bua kubishibua hahita matuku asatu.

²³ Yeye wakabambila buonso buabo ne, Biasua muntu kundonda, adihidie, atuale mutshi wandi mutshiamakane ku ditutu ku dituku, andonde.

²⁴ Bualu bua wasua kusungila muoyo wandi neaujimishe; kadi wajimisha muoyo wandi bua bualu buanyi neausungile.

²⁵ Biaheta muntu buloba buonso, ne bua bualu ebu udi udijimisha anyi udi unyanga muoyo wandi, mushinga wandi muimpe udi hanyi?

²⁶ Muntu yonso udi unfua meme ne mei anyi bundu, Muana wa muntu neamufue yeye bundu, halueye ne butumbi buandi ne bua Tatu ne bua banjelo ba tshijila.

²⁷ Ndi nuambila bulelela ne, Bakuabo badi bimana aha kabena bafua tô ne hamonabo bukelenge bua Nzambi.

Kukudimuka kua Yesu

²⁸ Yesu wakashikisha kuamba malu â; hakahita matuku bu muanda mukulu, yeye wakangata Petelo ne Yone ne Yakobo, wakabanda nʼabo ku mukuna bua kutendelela Nzambi.

²⁹ Hakadiye utendelela Nzambi, mpala wandi wakakudimuka, bilulu biandi biakalua bitoke, biakengelela.

³⁰ Monai, balume babidi bakadi bayikila nʼandi, Mose ne Eliya;

³¹ bakamueneka mu butumbi, bakadi bamba bualu bua lufu luandi luakambeye kushikisha ku Yelushalema.

³² Mesu a Petelo ne a bakuabo bakadi nʼandi akadi maneme ne tulu; kadi hakatabalabo, bakatangila butumbi buandi, ne balume babidi bimane nʼandi.

³³ Hakadi balume aba bumuka kudiye, Petelo wakambila Yesu ne, Mukelenge, hatudi kunoko mbimpe, tuasai bitanda bisatu, tshikuabo ntshiebe, tshinga ntshia Mose, tshikuabo ntshia Eliya; Petelo kakamanya tshiakadiye wamba.

³⁴ Hakadiye wamba dî edi, ditutu diakalua, diakababuikila; hakadibo babuela mu ditutu, bakadi ne buowa.

³⁵ Dî diakaluhuka mu ditutu ne, Eu udi Muanʼanyi musungula, munvuilai.

³⁶ Hakakosa dî, bakasangana Yesu nkayandi. Bakahua, mu matuku au ka bakamanyisha muntu malu akamonabo.

Yesu udi ushikisha disama dia muena tshiseke, udi umanyisha bayidi bandi bualu bua lufu luandi

³⁷ Hakatshiabu, bakahueka ku mukuna, tshisumbu tshinene tshia bantu tshiakasangila nʼandi.

³⁸ Muntu wa mu tshisumbu wakela dî diandi bikole ne, Muyishi, ndi nkutendekena, ulue kutangila muanʼanyi mulume; bualu bua udi muana wanyi umuehele mulela;

³⁹ monai, nyuma mubi udi umukuata, yeye udi utayika ne miadi; nyuma mubi udi umuhaluisha tô lututu luhatuka ku mishiku, kena umulekela lukasa, udi umukuma mikumu.

⁴⁰ Nakutendekena bayidi bebe ne, Bamumushe; bakuhanga.

⁴¹ Yesu wakandamuna ne, Nuenu ba tshikondo etshi tshia buhidia ne tshitshu, nenshale nʼenu musangu bule munyi? Nentate nʼenu musangu bule munyi? Lua ne muanʼebe.

⁴² Hakadiye ulue, demon wakamukuma hanshi, wakamuhaluisha bibi. Kadi Yesu wakabela nyuma wa bukoya, wakashikisha disama dia muana, wakamuhingisha mu bianza bia tatuʼandi.

⁴³ Buonso buabo bakakema bualu bua butumbi bunene bua bukelenge bua Nzambi. Hakadi bantu bonso bakema bua malu onso akadiye wenza, yeye wakambila bayidi bandi ne,

⁴⁴ Mei â abuele mu matshu enu, bualu bua nebafile Muana wa muntu mu bianza bia bantu.

⁴⁵ Kadi bobo kabakamanya dî edi, diakadi dibasokoka bua kabadijinguludi; bakatshina mua kumuebesha dî edi.

Yesu udi wambila bayidi bandi bualu bua kanemu

⁴⁶ Bayidi bakadi belangana mpata ne, Udi mutambe bakuabo nganyi?

⁴⁷ Kadi hakamanya Yesu mpata yakadi mu mitshima yabo, wakangata muana mukese, wakamushikika ha buihi nʼandi,

⁴⁸ wakabambila ne, Witabusha muana mukese eu mu dina dianyi udi ungitabusha meme; wangitabusha meme udi witabusha udi muntume; bua udi mutambe bukese munkatshi muenu nyeye udi mimene.

Yesu udi musue bantu bonso batu benza bimpe, yeye kena ne kansungusungu

⁴⁹ Yone wakamuandamuna ne, Mukelenge, tuakutangila muntu umusha bademon munda mua bantu mu dina diebe; tuakumukanda bualu bua yeye kena nkulonda nʼetu.

⁵⁰ Kadi Yesu wakamuambila ne, Kanumukandi, bualu bua udi kai unuhidia udi nʼenu.

Yesu udi ne badi bamuhidia luse; yeye udi umuka mu Galela

⁵¹ Hakamba matuku a kumubandishabo mulu kukumbana, yeye wakambula mpala wandi mutangisha ku Yelushalema bua kuyeye kuakua,

⁵² wakatuma bena mukenshi ku mpala kuandi; bakaya, bakabuela mu musoko wa Bena Samalea, bualu bua kumulongoluela malu.

⁵³ Kadi Bena Samalea bakamuhidia, bualu bua mpala wandi wakadi mutangile ku Yelushalema.

⁵⁴ Bayidi bandi Yakobo ne Yone, hakamonabo bualu ebu, bakakonka ne, Mukelenge, udi musue tuetu tulombe kahia kalue mu diulu bua kubosha, anyi?

⁵⁵ Kadi yeye wakatshinguluka, wakababela.

⁵⁶ Bakaya ku musoko mukuabo.

Yesu udi uteta badi basue kumulonda munda

⁵⁷ Hakadibo baya mu nshila, muntu wakamuambila ne, Nenkulonde kuonso kuwaya.

⁵⁸ Yesu wakamuambila ne, Mibuabua idi ne mena ai, nyunyu ya mulu idi ne masua ai; kadi Muana wa muntu kena ne ha kuladika mutu wandi.

⁵⁹ Yesu wakambila muntu mukuabo ne, Undonde. Kadi yeye wakakudimuna dî ne, Mukelenge, witabushe bua meme nganje kuya diambedi bua kujika tatu wanyi.

⁶⁰ Kadi yeye wakamuambila ne, Shîa bafue bajike bafue babo; kadi wewe ya biebe, umanyishe bantu bualu bua bukelenge bua Nzambi.

⁶¹ Mukuabo kabidi wakamuambila ne, Mukelenge, nenkulonde; kadi witabushe bua meme nganje kuya diambedi kulaya badi mu nsubu muanyi.

⁶² Kadi Yesu wakamuambila ne, Muntu mumane kukuata ku lukasu ludi ludima nʼalu tubalu, biatangileye ku nyima, yeye kena muakanangane ne bukelenge bua Nzambi.