Luke 2 - Mukanda wa Nzambi Dihungila Dikulukulu ne Dihungila Dihia-dihia 2003

Kuledibua kua Yesu

¹ Mu matuku au Kaisa Augusto wakela mukenshi ne, Bafundishe mena a ba ha buloba bonso.

² Eku kuakadi kuindisha kua kumudia kuakenzabo, hakadi Kulenio ngovena wa Sulia.

³ Bantu bonso bakaya bua kufundishabo mena abo, mutu kuabo mutu kuabo.

⁴ Yosefe, kabidi, wakumuka mu Galela, mu musoko wa Nazaleta, wakabanda mu Yudaya, ku musoko wa Bayidi, udibo babikila ne, Beteleheme, bualu bua yeye wakadi wa mu nsubu wa Davidi ne wa tshiota tshiandi;

⁵ wakaya nunku bua kufundishabo dina diandi ne dia Malia, wakadiye mubaka, wakadi biandi ne difu.

⁶ Hakadibo aku, matuku akakumbana a kuleleye.

⁷ Wakalela muanʼandi mulume, muanʼa bute, yeye wakamujingila tshilulu, wakamuladika mu tshidilu tshia nyama, bualu bua mu nsubu wa tshilala benyi kamuakadi muaba.

Balami ba mikoko badi batendelela Yesu

⁸ Mu luseke alu muakadi balami ba mikoko, balala mu mpata, balama mikoko yabo mu butuku.

⁹ Muanjelo wa Mukelenge wakimana ha buihi nʼabo, butumbi bua Mukelenge buakabatemena; bakatamba kutshina.

¹⁰ Muanjelo wakabambila ne, Kanutshinyi, bualu bua nakunusua ne lumu luimpe lua disanka dinene, nedikale kudi bantu bonso;

¹¹ lelu bakunulelela Musungidi mu musoko wa Davidi, yeye udi Kilisto Mukelenge.

¹² Etshi ntshimanyinu kunudi ne, Nenusangane muana mujingila tshilulu, mulale mu tshidilu tshia nyama.

¹³ Tshisumbu tshia masalayi a mu diulu tshiakadisangisha lukasa ne muanjelo, batumbisha Nzambi, bamba ne,

¹⁴ Butumbi buikale kudi Nzambi mu diulu, Ditalala dikale hanshi ha buloba munkatshi mua bantu badi basankisha Nzambi.

¹⁵ Banjelo bakabashia, bakaya mu diulu; balami ba mikoko bakambilangana ne, Tuyai ku Beteleheme tukatangile bualu ebu buakulua buakutumanyisha Mukelenge.

¹⁶ Bakalua lukasa, bakasangana Malia ne Yosefe, ne muana mulale mu tshidilu tshia nyama.

¹⁷ Hakamonabo bualu ebu, bakasokolola dî diakabambilabo bua muana eu.

¹⁸ Bantu bonso bakunvua malu akabambilabo kudi balami bakakema.

¹⁹ Kadi Malia wakalama mei â onso, wakadi wela meshi munda munda.

²⁰ Balami bakahingana, batumbisha Nzambi bamutendelela, bualu bua malu anso akunvuabo ne akamonabo, bu muakabambilabo.

Badi batengula Yesu

²¹ Hakakumbana matuku muanda mukulu bua kumutengulabo, bakamuidika ne, Yesu, bu muakamuidikabo kudi muanjelo kabai banze kumuimita.

²² Hakakumbana matuku a kudiuvua kuabo, bu mudi mukenshi wa Mose wamba, bakalua nʼandi ku Yelushalema bua kumufila kudi Mukelenge

²³ (bu muakafundabo mu mikenshi ya Mukelenge ne, Nebabikile muana mulume yonso udi ubulula difu dia mukashi ne, Wa tshijila wa Mukelenge),

²⁴ ne bua kufila mulambu mushihela Yehowa bu muakambabo mu mikenshi ya Mukelenge ne, Nyunyu ya nkutshi ibidi, anyi bana babidi ba nyunyu ya nkudimba.

Shimeona udi utumbisha Yesu

²⁵ Muntu mulume wakadi mu Yelushalema, dina diandi Shimeona; muntu eu wakadi muakane, wakadi kabidi mutumikidi wa mei, wakadi utekemena disamba dia Isalele; Nyuma Muimpe wakadi nʼandi.

²⁶ Nyuma Muimpe wakamana kumumanyisha ne, Wewe kuena ufua tô ne hawamona Kilisto wa Mukelenge.

²⁷ Yeye wakalua mu ntempelo mu Nyuma Muimpe; hakabuelamu baledi ba Yesu ne muana bua kumuenzela bu muakadi tshilele tshia mikenshi ya Mose,

²⁸ Shimeona wakamuambula mu maboko, wakatumbisha Nzambi, wakamba ne,

²⁹ Mukelenge, mpindiu wewe udi ulekela muhika webe aye biandi Talalâ bu muwakuamba;

³⁰ Bualu bua mesu anyi akumona luhandu luebe

³¹ Luwakulongolola ku mesu kua bantu bonso;

³² Munya wamueneka kudi bisamba bia bende Ne butumbi bua Isalele, bantu bebe.

³³ Tatuʼandi ne mamuʼandi bakakema bualu bua malu akamuambabo;

³⁴ Shimeona wakabasankisha, wakambila Malia mamu wandi ne, Muana eu udi mutekela bualu bua kuhona ne bua kubika kua bantu ba bungi mu Isalele, ne bualu bua tshimanyinu tshiahetulabo;

³⁵ muele wa nvita neutubule muoyo webe, nunku meshi a mu mitshima ya ba bungi neamueneke.

Ana udi utambisha Yesu

³⁶ Muprofete mukashi, dina diandi Ana wakadiku, yeye wakadi muana wa Fanuele wa tshisamba tshia Ashê, wakadi mununu be, bayandi wakamubaka hakatshidiye kamama, wakashala nʼandi bidimu muanda mutekete,

³⁷ wakashala mu lufuila bidimu makumi muanda mukulu ne binai; yeye kakumuka mu ntempelo, wakatendelela Nzambi butuku ne munya, ujila bia kudia, umulomba.

³⁸ Yeye wakalua ha diba adi, wakasakidila Nzambi, wakambila bonso bakadi batekemene buhikudi bua Yelushalema bualu buandi.

³⁹ Hakashikishabo malu onso a mu mikenshi ya Mukelenge, bakahingana mu Galela, ku musoko wabo Nazaleta.

⁴⁰ Muana wakadiunda biandi, wakakola, wakadi, mûle tente ne lungenyi; luse lua Nzambi luakadi nʼandi.

Yosefe ne Malia ne Yesu badi ka Kuhita kua Yehowa

⁴¹ Ku tshidimu ku tshidimu baledi ba Yesu bakaya ku Yelushalema ku disanka dia Kuhita kua Yehowa.

⁴² Hakadiye bidimu dikumi ne bibidi, bakabanda ku Yelushalema bu mudi tshilele tshia disanka;

⁴³ hakashika matuku, hakadibo bahingana, Yesu wakadi tshitende wakashala ku nyima mu Yelushalema; baledi bandi kabakamanya bualu ebu;

⁴⁴ bakadi bamanye ne, Yeye udi mu tshisumbu tshia batudi nʼabo mu nshila; bakaya mu nshila dituku dijima; bakamukeba mu bana babo ne mu bantu bakadibo bamanye;

⁴⁵ hakahangabo kumumona, bakahingana ku Yelushalema bamukeba.

⁴⁶ Hakahita matuku asatu, bakamusangana mu ntempelo, mushikame munkatshi mua bayishi, unvua mei abo, ubakonka malu;

⁴⁷ bantu bonso bakadi bunvua mei andi bakakema bualu bua lungenyi luandi ne bualu bua mei akabandamuneye.

⁴⁸ Hakamumonabo, bakakema; baba wandi wakamukonka ne, Muanʼanyi, wakatuenzela nunku tshinyi? Tatu webe ne meme kabidi tuakukukeba tunyingalala.

⁴⁹ Yeye wakabakonka ne, Nuakadi nunkebela tshinyi? Kanuena bamanye ne, Bundi nʼabu mbua kuikala mu malu a Tatu wanyi?

⁵⁰ Bobo kabakajingulula dî diakabambileye.

⁵¹ Yeye wakahueka nʼabo, wakaya ku Nazaleta; wakadi utumikila mei abo; baba wandi wakalama malu â onso mu mutshima wandi.

⁵² Yesu wakadiunda mu lungenyi ne mu kuleha ne mu diakalengele kudi Nzambi ne kudi bantu.