Luke 1 - Mukanda wa Nzambi Dihungila Dikulukulu ne Dihungila Dihia-dihia 2003

Dî dia ku mpala

¹ Bualu bua bantu ba bungi bakabanga kufunda malu au akenjibua munkatshi muetu,

² akatuambilabo kudi bamonyi ne benji badi,

³ nakuelangana meshi munda, Mukelenge Teofilo, ne, Mbimpe bia meme kabidi kukufundila malu au malondolola biakane, bualu bua meme nakualonda bimpe ku tshibangidilu tshiau tô ne katataka;

⁴ bua wewe umanye ne, Malu akukumanyishabo adi malelela.

Laka udi wamba bualu bua Yone Mubatiji diambedi yeye kai muanze kuledibua

⁵ Mu matuku a Helode, mukelenge wa Yudaya, muakuidi wa Nzambi wakadiku, dina diandi Zakâya, wakadi wa mu mulongo wa Abiya; mukashi wandi wakadi wa mu bana bakashi ba Alona, dina diandi Elisabeta.

⁶ Bubidi buabo bakadi bakane ku mesu kua Nzambi, bakadi balonda mikenshi yonso ya Mukelenge ne mei andi, kabakadi ne bualu.

⁷ Kabakadi ne muana, bualu bua Elisabeta wakadi nkumba, bubidi buabo bakadi banunu.

⁸ Nunku hakadiye wenza mudimu wandi wa buakuidi ku mesu kua Nzambi mu mulongo wandi,

⁹ bu muakadi tshilele tshia mudimu wa bakuidi, yeye wakasungudibua bua kubueleye mu ntempelo wa Mukelenge bua kuosha musenga wa mananashi.

¹⁰ Hakafika diba dia kuosha musenga wa mananashi, tshisumbu tshionso tshia bantu tshiakadi tshitendelela Nzambi ku mbelu kua ntempelo.

¹¹ Muanjelo wa Mukelenge wakamueneka kudiye, muimane ku tshianza tshia balume tshia tshioshelu tshia mananashi.

¹² Mutshima wa Zakâya wakahandika hakamumoneye, buowa buakamukuata.

¹³ Kadi muanjelo wakamuambila ne, Zakâya, kutshinyi, bualu bua bakunvua kulomba kuebe, mukashi webe Elisabeta neakulelele muana, neumuidike ne, Yone.

¹⁴ Wewe newikale ne diese ne disanka; bantu ba bungi nebasanke bualu bua kuledibua kuandi.

¹⁵ Yeye neikale muntu munene ku mesu kua Mukelenge; kanu biandi nvinyo ne bintu bidi bikuatangana; yeye neûshibue tente ne Nyuma Muimpe diambedi mamu wandi kai muanze kumulela.

¹⁶ Yeye neakudimushe mitshima ya bana ba Isalele ba bungi kudi Mukelenge Nzambi wabo.

¹⁷ Yeye neaye ku mpala kuandi ne nyuma ne bukole bia Eliya, bualu bua kuhingisha mitshima ya batatu kudi bana, ne bua kualukisha bena buhidia ku meshi a badi bakane; ne bua kulongoluela Mukelenge bantu badi ne mitshima yabo mimana kulongolola.

¹⁸ Zakâya wakakonka muanjelo ne, Nemanye bualu ebu munyi? Bualu bua meme ndi muntu mununu, ne mukashi wanyi udi ne bidimu bia bungi.

¹⁹ Muanjelo wakamuandamuna ne, Ndi bianyi Gabaliele, ntu ngimana ku mesu kua Nzambi; nakutumibua bua kuakula nʼebe ne bua kukuluila ne lumu luimpe.

²⁰ Tangila, wewe neuhue, kuena umanya mua kuakula tô ne halua dituku dialua malu â, bualu bua wewe kuakuitabusha mei anyi, neajalame dituku dialua malu au.

²¹ Bantu bakadi bindila Zakâya, bakakema bualu bua yeye wakanenga musangu mule mu ntempelo.

²² Hakaluhukeye, kakamanya mua kuakula nʼabo; bakamanya ye, Yeye wakumona tshikena kumona mu ntempelo; wakadi wakula nʼabo ne bianza biandi, wakashala kamama,

²³ Hakashika matuku a mudimu wandi, wakaya kuandi.

²⁴ Hakahita matuku â, Elisabeta wakimita difu; yeye wakadisokoka ngondo itanu, wakamba ne,

²⁵ Mukelenge wakungenzela bimpe nunku, mu matuku akadiye untangila, bualu bua kumusha bundu buanyi munkatshi mua bantu.

²⁶ Mu ngondo muisambombo muanjelo Gabaliele wakatumibua kudi Nzambi mu musoko wa Galela, dina diau Nazaleta,

²⁷ kudi mukashi wakatshidi kamama, mubangila kudi mulume, dina diandi Yosefe, wa mu tshiota tshia Davidi; dina dia mukashi au Malia.

²⁸ Muanjelo wakalua kudiye, wakamba ne, Muoyo, bakukufuila luse lua bungi, Mukelenge udi nʼebe.

²⁹ Kadi yeye wakatamba kutshina bualu bua dî edi, wakelangana meshi munda ne, Eu muoyo mungelela tshinyi?

³⁰ Muanjelo wakamuambila ne, Malia, kutshinyi; wewe wakusangana luse kudi Nzambi.

³¹ Mona, wewe newimite difu, neulele muana mulume, neumuidike ne, Yesu;

³² yeye neikale munene, nebamuidike dina ne, Muana wa Udi Mutambe Bunene wa mu diulu; Mukelenge Nzambi neamuhe nkuasa wa butumbi wa tatu wandi Davidi;

³³ neikale mukelenge wa nsubu wa Yakoba tshiendelele; bukelenge buandi kabuena ne tshishikidilu.

³⁴ Malia wakakonka muanjelo ne, Bualu ebu nebulue munyi, meme tshi muanze kumanya mulume?

³⁵ Muanjelo wakamuandamuna ne, Nyuma Muimpe nealue kûdi, ne bukole bua Udi Mutambe Bunene wa mu diulu nebukubuikile bu ditutu; nebidike muana wa tshijila uwalela ne, Muana wa Nzambi.

³⁶ Mona, Elisabeta, mukashi wa mu tshiota tshienu, yeye kabidi, wakuimita difu dia muana mulume ku bununu buandi; bakadi bamuamba ne, Udi nkumba, kadi ngondo eu nguandi muisambombo.

³⁷ Bualu bua kakuena dî dimue dia Nzambi didi kadî ne bukole.

³⁸ Malia wakamba ne, Mona, mukashi muhika wa Mukelenge; bangenzele bu muwakuamba. Muanjelo wakamushîa, wakaya biandi.

Malia udi uya kutangila Elisabeta

³⁹ Mu matuku â Malia wakabika, wakaya lukasa mu buloba bua mikuna, mu musoko wa Yuda;

⁴⁰ wakabuela mu nsubu wa Zakâya, wakela Elisabeta muoyo.

⁴¹ Hakunvua Elisabeta muoyo wakamuela Malia, muana wakatabuluka mu difu diandi; Elisabeta wakûshibua tente ne Nyuma Muimpe;

⁴² wakela dî diandi bikole, wakamba ne, Wewe udi mukashi mutambe kusankishibua, muana udi munda muebe udi muvudishila disanka.

⁴³ Bualu ebu buakulua kundi munyi, bua mamu wa Mukelenge wanyi wakulua kundi?

⁴⁴ Hakubuela dî dia muoyo uwakungela mu matshu anyi, muana wakutabuluka mu difu dianyi bualu bua disanka.

⁴⁵ Mukashi wakitabusha udi ne disanka, bua nebashikishe malu onso akamuambilabo kudi Mukelenge.

⁴⁶ Malia wakamba ne, Muoyo wanyi udi utumbisha Mukelenge,

Malia udi utumbisha Nzambi

⁴⁷ Mutshima wanyi wakutamba kusanka mu Nzambi, Musungidi wanyi.

⁴⁸ Yeye wakatangila buhuekele bua mukashi muhika wandi; Milongo yonso ya bantu tô ne tshiendelele neimbikile ne, Udi ne disanka.

⁴⁹ Bualu bua udi ne bukole wakungenzela malu manene; Dina diandi ndia tshijila.

⁵⁰ Luse luandi ludi ku milongo ne ku milongo Ya bantu badi bamutshina.

⁵¹ Wakenza malu makole ne diboko diandi; Wakatangalasha badi badisua bua meshi mabi akadi mu mitshima yabo.

⁵² Wakahuekesha banfumu bakadi mu nkuasa ya butumbi, Wakabandisha bantu bahuekele,

⁵³ Bakadi ne nsala wakabukutshisha ne bintu bimpe; Babanshi wakabahingisha hatuhu.

⁵⁴ Wakukuatshisha muntu wandi Isalele

⁵⁵ Wakubutuka bua kufuila Abalahama ne bana bandi luse tshiendelele, Bu mu akambileye bankambua betu.

⁵⁶ Malia wakasomba nʼandi bu ngondo isatu, wakahingana kuabo.

Kuledibua kua Yone Mubatiji

⁵⁷ Ngondo ya Elisabeta yakakumbana ya kuleleye, yeye wakalela muana mulume.

⁵⁸ Bakuandi ne bena tshiota tshiandi bakunvua ne, Nzambi wakumuvudishila luse luandi: bakasanka nʼandi.

⁵⁹ Hakalua dituku dia muanda mukulu, bakalua kutengula muana; bakamba kumuidika ne, Zakâya, bu dina dia tatuʼandi.

⁶⁰ Mamuʼandi wakandamuna ne, Nasha, bamuidike ne, Yone.

⁶¹ Bakamuambila ne, Kakuena umena tshiota tshienu udi muidika dinu edi.

⁶² Bakidikishila tatuʼandi bianza ne, Udi musue bamuidike dina kai?

⁶³ Yeye wakalomba mukanda wa kufundahu, wakafunda ne, Dina diandi Yone. Buonso buabo bakakema.

⁶⁴ Mukana muandi muakabuluka lubilu, ludimi luandi luakambuluka, wakakula utumbisha Nzambi.

⁶⁵ Buowa buakakuata bantu bonso bakadi ha buihi nʼabo; malu â onso akadi enda ambibua mu buloba buonso bua mikuna ya Yudaya.

⁶⁶ Bantu bonso bakaunvua bakâteka mu mitshima yabo, bakakonka ne, Eu muana neikale muana kai? Bualu bua tshianza tshia Mukelenge tshiakadi nʼandi.

⁶⁷ Tatuʼandi Zakâya, mûshibue tente ne Nyuma Muimpe, wakamba malu akadi kâi manze kulua ne,

⁶⁸ Batumbishe Mukelenge, Nzambi wa Isalele, Bua yeye wakulua kutangila bantu bandi, wakubahidia,

⁶⁹ Yeye wakutubishila lusengu lua luhandu Mu tshiota tshia muanʼandi Davidi,

⁷⁰ (Bu muakambeye mukana mua baprofete bandi ba tshijila ba kale),

⁷¹ Luhandu luakutuhandisheye kudi badi nʼetu lukuna ne mu bianza bia bonso badi batukina.

⁷² Yeye wakalesha bankambua betu luse, Wakavuluka dihungila diandi dia tshijila,

⁷³ Mutshihu wakatshihileye Abalahama tatu wetu

⁷⁴ Ne, Hanuasungidibua mu bianza bia badi nʼenu lukuna,

⁷⁵ Nenutendelele mu buimpe ne mu Buakane ku mpala kuanyi matuku enu onso, kanui ntshina.

⁷⁶ Ne wewe muana, nebakubikile ne Muprofete wa Udi Mutambe Bunene wa mu diulu, Bua wewe neuye ku mpala kua Mukelenge bua kumulongoluela nshila yandi,

⁷⁷ Ne bua kumanyisha bantu bandi Luhandu lua kubabuikidila mibi yabo,

⁷⁸ Bualu bua mutshima wa luse wa Nzambi wetu; nunku hatshiatshia ha kulu nehatuluile,

⁷⁹ Bua kutokeshela badi bashikame mu mîdima ne mu dileshi dia lufu, Ne bua kuendesha makasa etu mu nshila wa ditalala.

⁸⁰ Muana wakadiunda, wakakola mu mutshima wandi, wakadi biandi mu bihela tô ne ku dituku diakamuenekeye kudi Isalele.