Filemone 1 - Mukanda wa Nzambi Dihungila Dikulukulu ne Dihungila Dihia-dihia 2003

Paulo ne Timote hadi batumina Filemona muoyo

¹ Paulo, umena lukanu wa Kilisto Yesu, ne Timote muanʼetu wa mu Kilisto, kudi Filemona munangibue ne muenu mudimu nʼetu,

² ne kudi Apia, muanʼetu mukashi wa mu Kilisto, ne kudi Âkipo, disalayi nʼetu dia Yesu, ne kudi ekelesia wa mu nsubu wandi:

³ Ngasa ikale nʼenu ne ditalala bia kudi Nzambi Tatu wetu ne kudi Mukelenge Yesu Kilisto.

Paulo udi usakidila Nzambi buala bua malu mimpe a Filemona

⁴ Ndi nsakidila Nzambi misangu yonso, ntela dina diebe mu milombu yanyi;

⁵ bualu bua nakunua lumu lua dinanga diebe, ne lua ditabusha diudi nʼadi mu Mukelenge Yesu ne kudi basanto bonso;

⁶ bua buobumue buetu nʼebe mu ditabusha buenzeshe dimanya dilelela dia malu mimpe onso adi munda muenu, bualu bua Kilisto,

⁷ Bua nakadi ne disanka dinene ne busambi bua dinanga diebe, bualu ba mitshima ya basanto yakakankauashibua bua bualu buebe, muanʼetm.

Paulo udi wakiula Onesimo

⁸ Nunku, nasha meme ngikala ne dikima dia mu Kilisto bua kukuelela mukenshi wa bualu budi bukuakanyina,

⁹ kedi udi ntamba kusua kukusengelela bualu bua dinanga; udi wamba bualu ebu mmeme Paulo, muetu mununu, ne katataka muena lukanu kabidi wa Kilisto Yesu.

¹⁰ Ndi nkusengelela bua muanʼanyi wa mu Kilisto Onesimo unakuela mu lukanu luanyi.

¹¹ Diambedi yeye wakadi bu tshintu tshidi katshi tshilubuluka kûdi, kadi katataka udi bu tshintu tshidi tshilubuluka kûdi wewe ne kundi meme kabidi;

¹² nakamuhingisha kûdi, yeye muine, udi bu mutshima wanyi mene.

¹³ Nakasua yeye ashale kundi, bua yeye angenzelenzele mudimu bua bualu buebe mu lukanu mundi bua lumu luimpe;

¹⁴ kadi tshiakasua kuenza bualu tshi muanze kumanya mûdi wela meshi, bua buimpe buebe kabuikadi bua ku bukole, kadi bua mu disua diebe.

¹⁵ Bumue bua bualu ebu mbuakamumushilabo kûdi tshituha, bua wewe wikale nʼandi tshiendelele;

¹⁶ kembu muhika, kadi muhite muhika buimpe, muanʼenu munanga wa mu Kilisto, munangibue kundi tshishiki, kadi mutambe kunangibua kûdi, ne mu mubidi ne mu Mukelenge.

¹⁷ Nunku biwambala bu mukuatshishanganyi nʼebe, umuitabushe bu mûdi ungitabusha meme.

¹⁸ Kadi bikaleye mukuenzele bibi, anyi muikale nʼebe dibanza, udibale bu dianyi;

¹⁹ meme Paulo nakufunda dî edi ne tshianza tshianyi: nenkufute; bua tshikuambidi bu mûdi wewe muine nʼanyi dibanza, muoyo webe mene.

²⁰ Bulelela, muanʼetu, mpeteku disanka dikumbana kûdi mu Mukelenge; ukankamasha mutshima wanyi mu Kilisto.

²¹ Bualu bua adi ntekemena ditumikila diebe, nakukufundila nunku, adi mumanye ne wewe newenze malu matambe andi nkuambila.

²² Kadi bualu bukuabo, undongoluele muaba wa kulala kabidi, ndi ntekemena bua kufikishibua kunudi bualu bua kulomba kuenu.

²³ Epafa, udi muenu lukanu nʼanyi mu Kilisto Yesu, udi nkutumina muoyo;

²⁴ ne Mâko ne Alistâko ne Dema ne Luka, benji nʼanyi ba mumudi badi bakutumina muoyo kabidi.

²⁵ Ngasa wa Mukelenge wetu Yesu Kilisto ikale ne nyuma wenu. Amen.