Maak 11 - Tampulma

Yesu Fun La Zu Jɛrusalɛm

¹ Ba fun wa tel tɔsi naa ba yir Bɛtfaji awa Bɛtani, awa bi naa ba yir Ɔlif chen a wa dugli Jɛrusalɛm. Yesu fun a tum o gantɛl tiŋsa nara balɛ a ŋɔ ba,

² “Ma te ya suwachak a la zu tɔhɔn ti. Ma vaan la zu dooni, ma zi na kokum be pɔlu ka ba vɔu un chiŋsi dooni. Nandigi ha wa zini un. Ma pur un a kpa wa.

³ Ma wa pur un ka nandigi wa pɛɛsi ma, ‘Yɛrɛ ma pur un?’ Ma ŋɔ un, ‘Ya kunyana la daŋni un. O wa peti, o zi nyɛ ya kpa un bur wau lalaga.’ ”

⁴ Ba fun kaali a la na kokum be pɔl ti ka ba vɔu un chen a chiŋsi dam ti bulzɔɔnɔ ni. Ba fun pur un.

⁵ Ba funɛ pur un chene, ba naa chiŋi dooni fun pɛɛsi ba, “Yɛrɛ ma pur un?”

⁶ Ba fun ŋɔ ba chenani Yesu ŋɔ ba chen ka ba fun nyɛ ba pur un a kpa un ba kaali Yesu wati.

⁷ Ba funɛ wa tel o wati, ba ur ba kilaarɛ bɔnɛ a saksi kokum be pɔl ti ni. Yesu fun zini a kani un ni.

⁸ Nidamata fun a kpa ba gata a pogli a bɛrigi nyinbaan ni di Yesu kpa kokum ti a val a daha ni. Bɔnɛ ka fun kaali nyinbaan nɔ a la teŋsi bugil hulsa a wa bɛrigi dau.

⁹ Ba funɛ nyɛn nyinbaan ni a la chene, ba naa funɛ te o suwachak awa ba naa funɛ tiŋ o gantɛl, ba maga fun a nyɛ un jirima a la chɛɛmi a ŋɔ, “Tabarkala. I waa naa Koosa tum chen, yaa zaami hinu kinkan.

¹⁰ Koosa suŋi hin a suŋi i nawaal Devid koor ti naa i zi wa di. Zinan ya pɛgi ya kunyan Koosau.”

¹¹ Yesu funɛ wa tel Jɛrusalɛm, o fun la zu Koosa bar jɛɛmi dam ti a nyini aa go kina maga a li kaali. Domi nha funɛ wa chel, Yesu wa o gantɛl tiŋsi ta wa fun nyɛn doon vusi, amaa ba funɛ buru a kaali Bɛtani.

Yesu Fun Ŋɔ Nɔ A Nyɛ Bugil Digi Ni

¹² Chɔɔsa funɛ wa pisi, ba fun bu si Bɛtani ni a li kaali. Lɔsa fun wa kpak Yesu.

¹³ O fun na bugil naa ba yir ‘fig’ ka o kpak kpachaga a chiŋi bar boli ni. O fun kaali o mun a daŋni o di o nɔna. O ka wa fun na kundɔŋ. Kpachak duŋduŋnɛ o fun kpak. O nɔni saha ha wa fun tel.

¹⁴ Yesu fun ŋɔ bugil ti ni, “Nandigi wa zi bu di i nɔna zinan wuzu nɔ kpa la saha maga.” O gantɛl tiŋsi ta fun nu chen.

Yesu Fun La Zu Koosa Bar Jɛɛmi Dama

¹⁵ Ba fun la tel Jɛrusalɛm. Yesu fun la zu Koosa bar jɛɛmi dam ti ka niyogle awa niyawɛ fun nyɛn dooni. O fun la duŋni ba maga a li dooni. O fun burgi malɛ nichɛrɛ tima tebulsa a naa funɛ chiŋi dooni, a burgi ba naa la yogli kosa chen kuta a ta.

¹⁶ O wa fun la nɔɔni di nandigi bu kpa kundɔŋ a la zu Koosa bar jɛɛmi dam ti tuhu ni.

¹⁷ O fun vɛɛn biksi nara tima. O funɛ biksi ba chene, o pɛɛsi ba, “Ma wa zim chenani ba fun sɔbi a du Koosa sɛm tɔn ti ni chenn? Ba funɛ sɔbiu di, ‘N dam nɔ ya nara maga Koosa bar jɛɛmi damnɛ.’ Ba funɛ sɔbi nannɛ, amaa ma waa kpa a burgi ŋmɛɛrsa bar kani.”

¹⁸ Doone Koosa dam kɔkɔɔrsi ta awa Koosa chiksɛ nibiksɛ ta fun a nu chenani yɛɛ aa dɛu nyinbaan chenani ba zi ya a kpak Yesu a kpu un. Ba yaa fun a ɔm di ba kpu un, domi o biksi ti yaa fun a ya zɛmɛ ta alaazibu kinkan.

¹⁹ Zaazɔn saha funɛ wa tel, Yesu wa o gantɛl tiŋsi ta fun li tɔhɔn ti ni.

Chenani Bugil Naa Yesu Fun Ŋɔ Nɔ Nyɛ Chen Biksi Ya

²⁰ Chɔɔsa funɛ wa pisi, ba fun wa a daŋni ba gali bugil ti ni. O luta fun a pɔ ka bugil ti hul.

²¹ Pita fun a lisi Yesu sɛm ta a ŋɔ un, “Kina, bugil naa i fun ŋɔ nɔ a nyɛ chen, o maga hulu.”

²² Yesu fun ŋɔ ba, “Ma nyɛ ma se su Koosa.

²³ Ma nyɛ n ŋɔ ma, ba naa maga se su Koosa ka ba ŋɔ bi nɔ ni di o si a chel bɛɛŋ nɔ ni a vɛ beeli, o zi siu.

²⁴ Maa daŋni kundɔŋ aa sumi Koosa, ma sumi un wa se suuli. Ma sumi un wa se suuli, Koosa zi nyɛ mau.

²⁵ Saha naa maga ma yaa wa daŋni ma sumi Koosa, ma yaa kilisi. Nandigi tum tum tagin a nyɛ ma, ma te gil o wu tagin a nyɛ un a kisumi Koosa.” ((

²⁶ Amaa ma ka vɛ gil tum tagna naa nara tum a nyɛ ma, ma kunyan Koosa naa nyɛn o tɔha ni, gbanko wa zi gil ma tum tagni ta a nyɛ ma.))

Kpok Naa Nyɛ Yesu Tum O Tuma

²⁷ Ba fun a bur wa Jɛrusalɛm a la zu Koosa bar jɛɛmi dam ti. Yesu funɛ val dooni, Koosa dam kɔkɔɔrsi ta, Koosa chiksɛ nibiksɛ ta awa tɔsi nihɛɛti ta maga fun wa lagmi o wati,

²⁸ a pɛɛsi un, “Anti kpa kpok nɔ a nyɛ hin i koti aa tum tum na nan? Anti nyɛ hin nyinbaan di i val aa kiya nan?”

²⁹ Yesu fun ŋɔ ba, “N gbanko kpak pɛɛsiu a zi pɛɛsi ma. N pɛɛsi ma ka ma koti a ŋɔ min o mun, n gbanko zi biksi ma naa nyɛ min kpok ti muu tum kin naa maga chenu.

³⁰ Tɔ. Jɔn naa funɛ chaksi nara wa ni ni chen, Koosa funɛ nyɛ un chen kpok ti akoo nibinsiwaa?”

³¹ O funɛ pɛɛsi ba chene, ba di dɔŋa wa amɔrɛ a ŋɔ, “Ya ŋɔ di Koosa funɛ nyɛ un chen kpok ti, o zi burgi a pɛɛsi yau, ‘Yɛrɛ ya se fun vɛ su un?’ ”

³² Bɔnɛ fun ŋɔ, “Ya ka wa kiŋɔ di nibinsa funɛ nyɛ un chen kpok ti, zɛmɛ ta zi na paanu a du ya ni, domi ba yir Jɔn Koosa witiinne.”

³³ Ba fun ŋɔ Yesu ni, “Ya wa zim.” Yesu ka fun ŋɔ ba, “N gbanko wa zi biksi ma naa nyɛ min kpok ti muu tum kin naa maga chenu.”