Ju 9 - Tampulma

Chenani Ju Tima Funɛ Jɛɛmi Koosa Saha Digi

¹ Koosa wa Ju tim ta funɛ te ya nɔ bɛgim, o fun a biksi ba chenani ba zi jɛɛmi un, awa chenani ba zi du lɛu a la jɛɛmi un dooni.

² Ba fun a kpa gar a purigi lɛu ti bilɛ. Ba fun kpa fitina, tebul awa boroboro naa ba fun kpa a dau Koosa suwachak ni a du zɔɔnɔ dɛ ni a yir un Koosa bar lisi.

³ Ba funɛ yir lɛu ti dɛ mun dɛ doonani Koosa fun lisi kinkan,

⁴ a fun kpa salma a tɔ biŋbiŋa awa adaga zenzen a dau dooni. Bu bɛgim bun kam ba dam kɔkɔɔrsa nihɛɛ fun kpa poora naa sɔɔra weree a fu biŋbiŋ ti ni a nyɛ Koosa ni. Ba fun kpa diwe ta tama naa Koosa fun kpa nyɛ ba a li nyabaan ti ni ka ba yir un ‘mana’ a du salma gbaŋ ni. Gbaŋ nɔ awa Ɛrɔn da naa funɛ tasi o kpachaga chen awa Koosa chiksɛ naa o fun sɔbi a sak gbɛntɛl sulsi daha ni a nyɛ Mosis ni, a maga funɛ nyɛn adaga zenzen ti ni.

⁵ Ba gbanko funɛ kpa kina balɛwa a chi Koosa malaikasa a dau adaga ti nyuhu ni. A waa funɛ biksi nara tima di Koosa naa kpak jirima kinkan awa chaani, nyɛn dooni. Ba chɛnɛ funɛ tɔ adaga ti doonani Ju tim dam kɔkɔɔrsa nihɛɛ ti fun pisi kɔɔri ti chɛl a ta, chen ni Koosa zi yisi nara timau a li ba tum tagna ni. Mu wara daŋni mu sɔbi a gbaari chenani mu piin sɔbi nan.

⁶ Ju tim ta funɛ kɔɔri lɛu ti peti, wuzu kam ba Koosa dam kɔkɔɔrsi ta yaa fun si a la zu zɔɔnɔ dɛ ti di ba tum ba tuma dooni.

⁷ Ba Koosa dam kɔkɔɔrsi ta nihɛɛ ti duŋduŋ yaa fun si a la zu dɛ mun dɛ ti bun kam bu bɛgim. O fun kpa kɔɔri ti chɛl a nyɛ Koosa ni o tum tagna awa tum tagna naa nara tima vɛ zim di ba tumu daha.

⁸ Koosa siim weri ti biksi ya a li kin nama ni di lɛu ti zɔɔnɔ dɛ ti funɛ tɔ nara tima nyinbaan, chen ni ba wa zi koti a zu doonani Koosa fun lisi kinkan.

⁹ Chenani o fun du saha digi, o ha vɛɛn du chene hali wa zinan. Ju tima Koosa dam kɔkɔɔrsi ta fun kpa nara tima papaha a kɔɔri kɔɔra a nyɛ Koosa ni di a chiŋi ba tum tagna bar chiŋi ni. Chenani ba ya wa chaksi ba tum tagna a li ba bambe ni.

¹⁰ Ju tim ta waa baga nyɛn kin nawara ba na gbampulim nɛɛ. Diwe bɔnɛ awa kinyɔɔlɛ bɔnɛ funɛ ya kichiilewa, ka nyinbaanasa naa ba sɔ ni kurgɛ. Yesu funɛ wa nyɛ Koosa wa ya ya nɔ bɛgim, o fun biksi ya di kin nama wa bu ya kibirigi.

¹¹ Kristo naa ya ya Koosa dam kɔkɔɔra, nyinbaan ya kibirigi a kaali nyinbaan buni ti. Waa tum o tuma a nyɛ Koosa ni a li lɛu naa Koosa fun du o tɔhɔn ti ni. O waa zenee a kaali lɛu naa Ju tim ta fun du a li nyabaan ti ni saha digi chen.

¹² Kristo funɛ la zu lɛu naa Koosa fun du o tɔhɔn ti ni chen tuha a kaali doonani Koosa fun lisi kinkan a kpalimi dooni, o wa fun kpa buuna awa nupɔla chɛllɛ a nyɛ un dooni. O ka fun kpa o titi chɛl a nyɛ un, chen ni o zi kotiu a yisi ya a li ya tum tagna ni ya tiŋ un hali saha naa vɛ kpak bɔ.

¹³ Ju tim ta Koosa dam kɔkɔɔrsi ta yaa fun kpa buuna awa nuwala chɛl a nyɛ Koosa ni a kpa nupɔl a fu o bara a kpa tɔ ti a zaasi ba naa chɔk ba chi ti, chen ni ba chaksi ba gbampulim ni.

¹⁴ Kristo chɛl tum kinkan a kaali chen. Waa la chaksi ya tum tagna a li ya bambe ni, chen ni ya zi kotiu a tum tum were a nyɛ Koosa naa nyɛnɛɛ, ni. Ya tum tagna fu kpalimi ya ni, Koosa fu zi wa na ya galimsau a ta ya yɔri. Koosa siim weri naa nyɛn hali saha naa vɛ kpak bɔ, fun suŋi Kristo di o sou a nyɛ ya. O wa fun tum tum tagin hali tama.

¹⁵ Chendaha Kristo fun nyɛ nara awa Koosa bu ya nɔ bɛgim, chen ni ba naa o fun yir zi la kiwere naa o fun vɔu di o nyɛ bau. Kin tima zi nyɛnu a hali saha naa vɛ kpak bɔ. Saha naa Koosa awa Ju tim ta fun te ya nɔ bɛgim chen duŋduŋ funɛ chiŋi, Kristo fun sou a nyɛ ya, chen ni Koosa zi la ya nyuunau a nyɛ ya a yisi ya a li ya tum tagna ni ya tiŋ un.

^16-17 Nar ŋɔ a chiŋsi ka o ha vɛ siwi, o nara wa zi pa o kina. Ba wa kitiŋ chenani o ŋɔ a chiŋi chen see ba biksi di o sir sou.

¹⁸ Chendaha Koosa wa Ju tim ta funɛ te ya nɔ bɛgim, o fun biksi ba di ba kpu sela a lisi a chɛl a nyɛ un, chen ni o zi chiŋiu.

¹⁹ Chen saha ti Mosis fun a biksi Ju tim ta chiksɛ naa maga Koosa fun kpa a nyɛ ba. O fun kpa nupɔla awa buuna a lisi a chɛl a lagmi ni ni. O fun kpa kiduha naa ba yir ‘hisɔp’, awa piisi pusa naa ba kpa tau kisɛm ni, a kpa lagmi dɔŋ ni a vɔu a tau ni wa chɛl ti ni a misi du Koosa chiksɛ tɔn awa nara tima maga ni.

²⁰ O fun ŋɔ ba, “Chɛl nɔ naa mu kpa a misi ma nan, o nyɛ chenani Koosa wa ma ya nɔ bɛgim chene chiŋi. O ŋɔ ma di ma tiŋ chenani o sɛm chen”.

²¹ Mosis gbanko fun kpa ni wa chɛl ti a misi Koosa lɛu naa ba du nyabaan ti ni awa kin naa maga ba kpa a jɛɛmi un.

²² Ju tim chiksɛ ta biksi ba di ba kpa sela chɛl a chaksi ba kina Koosa suwachak ni. O wa fun koti a yisi ba a li ba tum tagna ni, see ba te yoli sela chɛl ti a dau o suwachak ni.

Yesu Fun Wa Sou Ya Daha Bu Bɛgim

²³ Koosa lɛu ti awa kin naa maga nyɛn un ni funɛ ya Koosa tɔhɔn ti kina chamsirɛ. Chendaha Koosa fun ŋɔ ba di ba chaksi a chen. Chenani Yesu fun sou a chaksi Koosa tɔhɔn ti kina kaali sela chɛl ti kinkan.

²⁴ Kristo funɛ si o sou ni, o wa fun la zu Koosa lɛu naa nibinsa fun du chen, ka o fun ya Koosa tɔhɔn ti kin chamsa. O ka fun zini a zu Koosa wuti lɛu naa nyɛn o tɔhɔn ti ni. Lalaknɔ waa kpalimi a kani ya bar kani ni a li Koosa suwachak ni.

²⁵ Bun kam bu bɛgim Ju tim ta dam kɔkɔɔrsa nihɛɛ ti yaa fun kpa sela chɛlu a zu Koosa lɛu dɛ mun dɛ a nyɛ un di o chiŋi ba tum tagna bar chiŋi ni. Kristo wa fun zini a zu Koosa tɔhɔn ti lɛu ti a kpa o titi a nyɛ Koosa ni bu damata.

²⁶ O fu ya chen ni, saha naa Koosa fun naami tɛɛnɛ nɔ maga hali wa zinan, o fu zi namsi bu damatau a sou. Tɛɛnɛ nɔ maga siili saha funɛ wa dugli, o fun wa sou ya daha bu bɛgim a lisi tum tagna kpok a ta.

²⁷ Nibinsa maga zi sou bu bɛgim. Ba wa siti, Koosa zi wa di ba sɛriau.

²⁸ Chen vɛɛna, Kristo funɛ sou bu bɛgimnɛ a kpa o titi a nyɛ Koosa ni, chen ni o zi kotiu a yisi nidamata a li ba tum tagna ni baa tiŋ un. Kristo wa bur wa, o wa bu sou a chiŋi ya tum tagna bar chiŋi ni. O zi yisi ba naa la pɔ unu, a li ba tum tagna ni hali a wa peti.