तीतुस 3 - राना थारु नयाँ नियम

ख्रीष्टियन चालचलन

¹ बिश्वासीनके याद करबा, कि हाकिम और अधिकारीके आदर करएं, और उनकी आज्ञा मानएं, और सब जनै एकदुस्रेके ताहीं अच्छे काम करनके ताहीं तयार रहाएं।

² कोइको बदनाम नाए करएं; लडाइ करन बारे नाए होमएं; पर दुस्रे आदमीनके दया दिखान बारे होमएं, और सब आदमीनके सँग मिलनसार होमएं।

³ काहेकी हम फिर पहिले समयमे मुरख, परमेश्वरको आज्ञापालन नाए करन बारे, और आदमीनसे धोखा खाएभए हएं, और हम हर मेलके खराब काम करनके नाए छोडपात रहएं, जौनके हम करन चाँहत रहएं। अइसे करके हमके आनन्द मिलत रहए। और हम अपने समय खराब तरिकासे ब्यबहार करनमे और दुस्रे आदमीनसे डहा करनमे बितात रहएं। और हम घृणित आदमी रहएं; हर कोइ आदमी हमसे घृणा करत रहए, और हम बोसे घृणा करत रहएं।

⁴ तहुँफिर, हमर मुक्तिदाता परमेश्वर हमके अपनी दया और प्रेम दिखाइ।

⁵ परमेश्वर हमके हमर पापके दण्डसे बचाइ, और जा हमर अपनो धार्मिक कामके कारण नाए, जो हम करे रहएं, बल्कि बा हमर उपर दया दिखाइ, और बा पबित्र आत्मा दइके हमके बचाए लइ। जौन हमरे पापनके धोइ और हमके एक नयाँ जीबन और ब्यबहार करनके एक नयाँ तरिका दइ।

⁶ हमर मुक्तिदाता येशू ख्रीष्ट जो करी, बाके द्वारा परमेश्वर जा पबित्र-आत्माके, हमरे भितर रहानके ताहीं स्वतन्त्रसे और प्रसस्ततासे पठाइ।

⁷ ताकी हम कभी फिर नाश नाए होन बारो जीबन पानके आसरा करपामएं, जो परमेश्वर हमके अपने सन्तानके रुपमे देनके बाचा करीहए। और हम जाके बारेमे पक्का हएं, काहेकी परमेश्वर अपने अनुग्रहके द्वारा हमके अपने सँग ठिक ठहिराइ हए।

⁸ जा एक सच्ची कहानी हए, जो मए हबए तोके बताओ हओं। और मए चाँहत हओं, कि तए जे बातके बारेमे पक्का रुपसे बिश्वासीके सिखा, जाकेमारे कि जौन परमेश्वरमे बिश्वास करीहए, ताकी बे अच्छे काम करनके ताहीं अपनो समय देनमे ध्यान लगामएं। जा शिक्षा सबके ताहीं अच्छी हए, और फाइदा बाली बात हए।

लडाइसे दुर रहो

⁹ पर मुरखसे बाद-बिबाद, और पुर्खनको लम्बी सुची, बिरोध और लडाइ जो मोशाको नियम कानुनके बारेमे होएं बिनसे दुर रहो; काहेकी बे बेकार और फाइदा देन बारे नाए हएं।

¹⁰ अगर कोइ अइसो आदमी हए, जो बिश्वासीनके बीच फुट पैदा करत हए, तओ बोसे गम्भीरतासे बात कर, और बोसे अइसो ब्यबहार करन छोडनके कहो। अगर बो छोडनसे नाए मानैगो, तओ बोके फिरसे चेतावनी दे। जाके पिच्छु, अगर बो फिरसे नाए छोडन मानैगो कहेसे तोके अइसे आदमीके छोडदेन चाहो।

¹¹ तए पक्का रुपसे जान जाबैगे, कि अइसो आदमी जानबुझके गलत डगरमे चलरहो हए, और बोको अपनुवए खराब काम साबित करत हए, कि बो दोषी हए।

अन्तिम सन्देश

¹² मए क्रेट टापूमे अर्तिमास और तुखिकसके तिर ठिन पठाएरहो हओं, जब बे क्रेट टापूमे पुगंगे तओ तए मेरे ठिन निकोपोलिस सहरमे आनके कोसिस करिए; काहेकी मए ठण्डो महिनामे निकोपोलिस सहरमे बितानके बिचार करो हओं।

¹³ जब जेनास नाउँको नियम कानुन सिखान बारो और अपोल्लोस नाउँको एक दुस्रो आदमी अपनी यात्राके ताहीं निक्रंगे, तओ उनकी मदतके ताहीं जो कुछ तए कर्पात हए, करिए। जो कुछको फिर उनके जरुरत होए, बो उनके दिए। ताकी यात्रा करत पेती उनके कुछु कमी नाए होबए।

¹⁴ सिरफ इतकए इकल्लो नाए, तोके बिश्वासीनके सिखातए रहान पणो, कि अपने ध्यानके अच्छे काम करनके ताहीं लगातार मेहेनत करतए रहाएं, ताकी बेहीं आदमीनको जरुरत पुरा करपामएं, जौनके ठिन बिनको जरुरीको चीज कुछु नाए हए। और अइसे कर्नेसे बिश्वासी एक लक्षके सँग अपन जीबन जीइ लेहएं।

अभिबादन

¹⁵ मेरे सँग हियाँके सब बिश्वासी तोके अभिबादन करत हएं। हुवाँ क्रेट टापूमे हमरे सँगी बिश्वासीके जो हमसे प्रेम करत हएं, उनके अभिबादन करिए। मए प्राथना करत हओं, कि प्रभु तुमर उपर अनुग्रह करतए रहाबए।