तीतुस 2 - राना थारु नयाँ नियम

सच्ची शिक्षाको अनुसरण

¹ पर तीतस, तोके बिश्वासीनके इकल्लो बहे बात सिखान पणैगो, जो येशू ख्रीष्टके बारेमे सच्चो शिक्षा हए।

² बुढे मनै अपनए-अपनएके नियन्त्रण करपान बारे होन पणतहए, अइसो ब्यबहार करनके चाहो ताकी आदमी बोके सम्मान करएं, और दुस्रे जनैनसे समझदारसे ब्यबहार करन बारो होन पणतहए। परमेश्वरमे उनको बिश्वास मजबुत होन पणतहए, दुस्रे आदमीनसे सच्चाईसे प्रेम करन बारो होन पणतहए और सहनको क्षमता होन पणतहए।

³ अइसियए करके बुढी बैयर अइसो ब्यबहार करएं, जो हर बातमे परमेश्वरके सम्मान देमएं; दुस्रेनके बारेमे खराब बात बत्कान बारी और दारु पिइन बारी नाए होमएं, पर उनके एक अच्छो जीबन जीइनको तरिका सिखन पणो।

⁴ ताकी बे एक अच्छो उदाहरण बनपामएं, और जवान लौंणीया और बैयरनके सल्लाहा देनके योग्य होमएं, ताकी अपने लोगासे और बच्चनसे प्रेम करएं।

⁵ और शान्तसे ब्यबहार करन बारी, अपने लोगनके अग्गु बफादार होन बारी, अपने घरके रेखदेख करन बारी, दुस्रेनके उपर दया दिखान बारी और अपने-अपने लोगनको अधिकारके सम्मान करन बारी होमएं, ताकी कोइ फिर परमेश्वरको सन्देशके बारेमे परमेश्वरके बदनाम कर नाए पामएं।

⁶ अइसियए जवान आदमीनके फिर सम्झा, कि बे सम्झदरीसे काम करएं।

⁷ तोके हर बातमे उदाहरणके रुपके अच्छो काम करन चाहो, जो देखके दुस्रे आदमी हमेसा पालन करपामएं; जब तए बिश्वासीनके परमेश्वरके बारेमे सिखात हए, तओ तोके अच्छे उदेश्यके साथ सिखान पणो, और अइसे करके सिखा, कि आदमी तोके आदर करएं।

⁸ और बहे सिखा, जो सच्चो शिक्षा हए, और कोइ फिर बदनाम नाए करन बारो शिक्षा होबए, ताकी बे आदमी जो येशू ख्रीष्टके ताहीं तेरे कामके बिरोध करत हएं, बे लाजमे पणएं। ताकी बे हमर बारेमे कोइ फिर खराब बात नाए बतकाए पामएं।

⁹ बिश्वासी जो कमैया हएं, उनके सिखा, कि बे बो सब कुछ करएं, जो उनको मालिक उनके करनके ताहीं कहात हए। बे हर बतामे अपने मालिकनके खुसी करनके कोसिस करएं, और उनके सँग बाद-बिबाद नाए करएं।

¹⁰ बे चोरी नाए करएं; पर जा साबित करएं, कि बे हमेसा इमान्दार हएं। ताकी आदमी उनके अच्छे ब्यवहारमे ध्यान देमएं, और उनको करोभओ सब कामसे आदमीनके हमर मुक्तिदाता परमेश्वरके बारेमे भओ सन्देशके सुननको इच्छा हुइहए।

¹¹ बिश्वासीनके अइसे करके सिखा, काहेकी परमेश्वर सब आदमीनके पापसे उद्धार पानको डगर दिखाएके अपनो अनुग्रह दिखाइ हए।

¹² परमेश्वरको अनुग्रहके कारण, परमेश्वर हमके सिखात हए, कि हम अइसो ब्यबहार नाए करएं, जो ब्यबहार परमेश्वरके खुसी नाए बनात हए। और जौन चीजके पानके गैर-बिश्वासीनको इच्छा रहात हए, उइसो चीजको इच्छा हमके नाए करन पणत हए। और हम संसारमे हएं कहेसे बुद्धिमान और धार्मिकतासे परमेश्वरके खुसी बनानको ब्यबहार करन पणत हए।

¹³ हम अइसे ब्यबहार करत हएं, जब हम बेहीं अदभुत दिनको प्रतीक्षा कर रहे हएं, जोको हमके आसरा हए; बहे दिन जब प्रभु येशू ख्रीष्ट, जो हमर महान परमेश्वर और मुक्तिदाता हए, अपनो सारे महिमाके सँग पृथ्वीमे लौटके आबैगो।

¹⁴ येशू ख्रीष्ट अपनएके हमरे फाइदाके ताहीं बलिदान करदइ। ताकी हम अधर्म कामसे छुटकारा पामएं, और हमके नैतिक रुपसे शुद्ध करपाबए। और ताकी हम बाके अपने खास आदमी बन जाएं, जो भले काम करनके ताहीं पुरी तरिकासे समर्पित होत हएं।

¹⁵ जहेमारे, तीतस मए चाँहत हओं, कि तए क्रेट टापूके बिश्वासीनके जा बात सिखा, जो मए तोके बताओ हओं। अपने आदमीनके बे सब चीज करनके ताहीं हौसला दे। जहाँ जरुरी होबए, हुवाँ उनके सुधार। तोके अइसो करनके अधिकार हए। पक्का कर, कि जो कुछ फिर तए सिखात हए, कोइ फिर लापरबाही नाए करए।