तीतुस 1 - राना थारु नयाँ नियमअभिबादन 1 मए पावल, जा चिट्ठी तीतसके ताहीं लिखरहो हओं, जो परमेश्वरको दास और येशू ख्रीष्टसे चुनो भओ चेला हओं, मए परमेश्वरके चुनेभए आदमीको बिश्वासके मजबुत करनके ताहीं, और येशूको सत्य शिक्षा बुझानमे मदत करनके ताहीं चुनो गओ हओं। ताकी बे अइसे जीबन जीइमएं, जो परमेश्वरके खुसी करत हए। 2 बोको प्रतिफलके रुपमे बे परमेश्वरके सँग हमेसाके ताहीं रहानके आसरा करत हएं। काहेकी परमेश्वर, जो कभी ठगत नाए हए, बा संसारकी सृष्टि करनसे पहिले प्रतिज्ञा करी रहए, कि बाके आदमी कभी फिर नाश नाए होन बारो जीबन पामंगे। 3 अब बिरकुल ठिक समयमे, परमेश्वर जा अच्छो समाचारके हमरे अग्गु प्रकट करी, और हम जाको परचार सबके बीचमे करत हएं। परमेश्वर हमर मुक्तिदाता जा आज्ञा दइके, मोके जिम्मेदारी दइ, कि मए बाके ताहीं जा काम करओं। 4 मए जा चिट्ठी तीतसके लिखरहो हओं, जो मिर अपनो लौंणा कता हए, काहेकी बो येशू ख्रीष्टमे बिश्वास करत हए। दौवा परमेश्वर और हमर मुक्तिदाता येशू ख्रीष्टके घेनसे तोके अनुग्रह और शान्ति मिलतए रहाबए। क्रेट टापूमे तीतसको काम 5 मए जाकेमारे तोके क्रेट टापूमे छोडके आओ, ताकी तए हुवाँ हमरे काम पुरा करपाबए, और क्रेट टापूके हर सहरमे मण्डलीको अगुवाके नियुक्त करए, जैसे मए तोके करनके निर्देश दओ हओं। 6 मण्डलीके रेखदेख करन बारे सेवक एकए बैयरको लोगा होमएं, खराब चालचलन बारो नाए होमएं। और बिनको लौंणालौंणीया, बात मानन बारे और बिश्वासी होमएं। 7 काहेकी मण्डलीके रेखदेख करन बारे अगुवा परमेश्वरको कामके जिम्मा लए होत हएं। जहेमारे बे कोइ दोष नाए भए बारे आदमी होन पणत हए। बे अपनो मनपरी करके घमण्डसे फुलन बारे, जल्दी गुस्सान बारे, दारु पिन बारे, लडाइ करन बारे और मनमे लोभ होन बारे नाए होमएं। 8 पर पाहुननके सत्कार करन बारे, दुस्रेके ताहीं भलाइसे प्रेम करन बारे, शान्तसे ब्यबहार करन बारे, सही रितिसे ब्यबहार करन बारे, पबित्र जीबन जीइन बारे और बे अपनए-अपनामे अधिन करपान बारे होन पणत हए। 9 और बे, येशू ख्रीष्टके बारेमे बिश्वासयोग्य सन्देशमे मजबुतसे बिश्वास करन बारे होन पणो, जो हम बोके सिखाए हएं। बिनके अइसे करनके चाहो, ताकी बे दुस्रेनके सही शिक्षाके पालन करनके ताहीं हौसला दइ पामएं, और सँगए-सँग उनके साबित करपामएं, कि बे गलत हएं। झुठे गुरु 10 मए अइसो जाकेमारे कहात हओं, काहेकी बहुतसे आदमी ख्रीष्टको सच्चो शिक्षाके बिरुद्ध बिरोध करंगे, अर्थात् बे, जो फाल्तु बात सिखात हएं, और जो दुस्रेनके धोखा देत हएं। जा खास करके कुछ यहूदी समुहनके बारेमे हए, जो बिश्वासी बनिगए हएं। जे आदमी बेहीं समुहसे सम्बन्धित हएं, जो चाँहत हएं, कि सब ख्रीष्टियनके यहूदी नियमके पालन करन चाहो, खास करके खतनाको नियमके। 11 जे अइसे आदमीनके शिक्षा देनके अनुमति मतदिए। काहेकी जब जे बे बातनके सिखात हएं, जो बात नाए सिखानके हए। तओ बे बहुत परिवारनको बिश्वासके नाश करदेत हएं। जे अइसे जाकेमारे करत हएं, ताकी बे धनसम्पति पाए सकएं। 12 क्रेट टापूको एक जनै आदमीके, जोके टापूके आदमी बोके बुद्धिमान मानत हएं और बो कही हए, “क्रेट टापूके आदमी हमेसा ठगत हएं। बे जंगली जानबरके हानी ब्यबहार करत हएं। बे अल्छी हएं और हमेसा बहुत जद्धा खानु खात हएं।” 13 क्रेट टापूके आदमीनके बारेमे जे बात अभौफिर जा गवाही सच्चो हए, जहेमारे बिनके कर्रेसे चेतावनी दे, ताकी बे येशू ख्रीष्टके बारेमे सच्चो शिक्षामे बिश्वास करएं। 14 और बे यहूदीनको झुठी कहानीमे और पुर्खन्को लम्मो सूचीमे ध्यान देनके बन्द करएं। और तए बे आदमीनको शिक्षासे दुर रहीए, जौन सच्चो शिक्षासे दुर हुइगए हएं। 15 शुद्ध आदमीनके ताहीं सब चीज शुद्ध हए। पर अशुद्ध और ख्रीष्टमे बिश्वास नाए करन बारेनके ताहीं, कोइ चीज फिर शुद्ध नाए हए, काहेकी बिनको मन और दिमाक दुनौ पुरा रुपसे खराब हुइगओ हए। 16 बे झुठे गुरु कहात हएं, कि हम परमेश्वरके जानत हएं, पर उनको ब्यबहार स्पष्ट रुपसे दिखात हए, कि बे परमेश्वरके नाए जानत हए, काहेकी बे घिनौने और आज्ञा नाए मानन बारे हएं, और बे कुछ अच्छो करनके लायक नाए हएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation