रोमियों 9 - राना थारु नयाँ नियम

इस्राएलके ताहीं पावलको अन्तर बेदना

¹ मए ख्रीष्टमे सच्चो बात कहात हओं, झुठ नाए मस्कत हओं, और मिर बिबेक फिर पबित्र आत्मामे गवाही देतहए,

² कि मोके बडो सौख हए, और मिर मन मेरे आदमीनके ताहीं हर समय दुखमे हए।

³ मए त हियाँतक फिर चाँहन सिक्तो, कि मेरे यहूदी बिश्वासी ददाभइया और मेरे अपने जातिके ताहीं परमेश्वर मोहीके सराप देबए और ख्रीष्टसे अलग होओं।

⁴ बे इस्राएल देशके आदमी हएं, बे परमेश्वरके अपने सन्तान बनानके ताहीं छानी हएं, और परमेश्वर उनके अपनो महिमा दिखाइ। बा बिनसे अपनो करार बाँधी और बिनके अपनो नियम कानुन दइ। बिनके बाको आराधना करन और बाको अदभुत प्रतिज्ञा पान मौका रहए।

⁵ अब्राहाम, इसहाक और याकूब उनके पुर्खा हएं, और जहाँ तक उनको मानब स्वभाबको सम्बन्ध हए, ख्रीष्ट अपनए फिर एक इस्राएली रहए। परमेश्वर, जो सबके उपर राज्य करत हए, बाकी हमेसाके ताहीं प्रसंसा होतए रहाबए। आमेन।

⁶ पर मए नाए कएहओं, कि परमेश्वर अपनो वादा पुरा करनमे बिफल हए, काहेकी इस्राएल देशके सबए बंश पक्के परमेश्वरके आदमी नाए हएं।

⁷ अब्राहामके बंशमे जनम लेनसे सबए बाके सच्चे सन्तान नाए होत हएं, काहेकी परमेश्वर अब्राहामसे कही, “जो इसहाकके बंशमे जनम लेतहए, बेहीं तेरे बंश माने जामंगे।”

⁸ जक अर्थ, जो बंश प्रकृतिके अनुसार जनम लेतहए, बे परमेश्वरको सन्तान नाए हएं, पर सिर्फ प्रतिज्ञाके सन्तान इकल्ले अब्राहामके सन्तान माने जात हएं।

⁹ काहेकी प्रतिज्ञाको बचन जा हए, “अग्ले सालमे जहे समय मए दुबारा आमंगो और तओ साराकी एक लौंणा होबैगो।”

¹⁰ और केबल जा नाए, पर रेबिकाके गर्भमे एकए पुरुष, अर्थात् हमर पुर्खा इसहाकसे जुरिया बच्चा भए।

^11-12 जन्मनसे अग्गुवए कुछ अच्छो और कुछ खराब काम करनसे पहिलीयए परमेश्वर रेबिकासे कही रहए, कि बक बाणो लौंणा छोटो लौंणाको सेवा करैगो। परमेश्वर जा दिखानके ताहीं कही, कि बा अपनो इच्छा अनुसार अपनए बनातहए और जा कोइ फिर कामके कारण नाए रहए, जो बे करीं।

¹³ जा ठिक उइसीयए, जैसे कि पबित्र-शास्त्रमे लिखो हए, “मए याकूबसे प्रेम करो, पर एसावके घृणा करो।”

इस्राएलके आदमी परमेश्वरके अस्वीकार करीं और बाको न्याय

¹⁴ तओ हम का कहाएं? का परमेश्वर अन्यायी हए जब जौनक चाहो बहेक चुन्त हए? नाए! बिरकुल नाए!

¹⁵ काहेकी परमेश्वर मोशासे कहात हए, “मए जोकोइके उपर दया करन चाहओं, बोके उपर दया करंगो; और जोकोइके उपर कृपा करन चाहओं, बोके उपर कृपा करंगो।”

¹⁶ जहेमारे परमेश्वर बो आदमीके चुनैगो जोके उपर दया दिखानको निर्णय लेतहए; बाको छनौट आदमीको करन चाहन बारो काम या इच्छामे भर नाए पणत हए।

¹⁷ काहेकी पबित्र-शास्त्रमे परमेश्वर मिश्रदेशको राजासे अइसे कहात हए, “मए तोके जाकेमारे राजा बनाओ हओं, कि तोएमे अपनो शक्ति दिखाए पामओं, और मिर नाउँको परचार जा संसारके सब आदमीनमे होए।”

¹⁸ जहेमारे बा जौनके चाँहत हए बहेक उपर दया करत हए। और जौनके चाँहत हए बोके कठोर बनाए देतहए।

¹⁹ तओ कुछ आदमी मोसे कहामंगे: “अगर अइसो हए तओ परमेश्वर कैसे कहे सकत हए, कि हम गलत हएं? काहेकी बा जो चाँहत हए बो चीजके करनसे कोइ रोकनाए पएहए।”

²⁰ ए भइया, तुम कौन हओ जो परमेश्वरसे बिबाद करत हओ? का सृष्टि करोभओ चीज सृष्टि करन बारोसे कहे सकत हए, “तए मोके अइसे काहे बनाओ?”

²¹ का कुम्णाके मट्टीमे अधिकार नैयाँ, कि एकए ढुक्लासे एक खास उदेश्य और दुस्रो साधारण उदेश्यके ताहीं बनाबए?

²² परमेश्वरके अधिकार हए, कि जौन आदमीनके बा बनाइ हए उनके अपनी इच्छाके अनुसार जैसे चाँहत हए, कर सकत हए। परमेश्वर अपनो गुस्सा दिखान चाँहत रहए और हरकोइके बिरुद्ध अपनी शक्ति प्रकट करन चाँहत रहए जो नष्ट होनको लाएक हएं। बल्कि, बा धैर्यसे बिनके सही।

²³ काहेकी बा दिखान चाँहत रहए, कि बा कित्नो महान हए, जब बा आदमीनके उपर दया करी जौनके बा अपनी महिमामे भागीदार होनके ताहीं चुनी हए।

²⁴ हम, जौनके यहूदीनसे इकल्लो नाए, पर गैर-यहूदीनसे फिर मोके छानी हए कहेसे, का भओ तओ?

²⁵ गैर-यहूदीनके बारेमे, परमेश्वर अगमबक्ता होशेकी किताबमे कहात हए, “जौन मेरे आदमी नाए हएं, बिनके मए, मिर प्रजा बनामंगो। और जौनके मए प्रेम नाए करो रहओं, बाके मए मिर प्रिय कहामंगो;

²⁶ और जौन ठिह परमेश्वर कही, तुम मेरे आदमी नाए हओ, हुवइंपर जिन्दा परमेश्वर उनसे अपने सन्तान कहाबैगो।”

²⁷ और इस्राएल देशके बारेमे यशैया अगमबक्ता कहात हए, “इस्राएलके आदमीनकी संख्या समुन्दरके किनारे भए रेता कता बहुत होएसे फिर उन मैसे थोडीए बचेजामंगे।

²⁸ काहेकी प्रभु जल्दीए, और एकए चोटीमे हमेसाके ताहीं, पृथ्वीमैके सब आदमीनको न्याय करैगो।”

²⁹ जैसी यशैया अगमबक्ता पहिले फिर कही रहए, अगर सर्बशक्तिमान प्रभु हमके बंश होनके अनुमति नाए दए हुइतो, कहेसे हम सदोम और गमोराके सहरनके आदमीन कता बनजैते, जौनन्के परमेश्वर पुरा रुपसे नष्ट करदइ।

इस्राएल देशके आदमीनको अबिश्वास

³⁰ तओ हम का कहाएं? बे गैर-यहूदी अपनएके परमेश्वरसे सही बनन्के कोसीस नाए करत रहएं, लेकिन येशू ख्रीष्टमे उनको बिश्वासके कारण उनके परमेश्वरमे धर्मी बनाओ गओ रहए।

³¹ पर इस्राएल देशके आदमी मोशाको नियम कानुनके पालन करके परमेश्वरमे धर्मी होनको कोसिस करत हएं, पर बे परमेश्वरमे धर्मी नाए हुइपाइं।

³² जा कैसे हुइसकत हए? काहेकी बे बिश्वाससे नाए, पर भले कामसे परमेश्वरमे सही बनन्के कोसिस करत रहएं, बे ख्रीष्टके कारण अपमानित भए, जोके बहे पत्थरसे तुलना करोजाए सकत हए जो आदमीनके ठेस देतहए?

³³ जैसे परमेश्वर पबित्र-शास्त्रमे कहात हए, “देखओ, मए यरूशलेम सहरमे एक अइसो पत्थर धरंगो जो आदमीनके ठेस लगात हए, एक अइसो चट्टान जो बिनके गिराबैगो, और जो बामे बिश्वास करैगो, बो लज्जित नाए होबैगो।”