रोमियों 4 - राना थारु नयाँ नियमअब्राहाम बिश्वाससे धर्मी ठहिरो 1 तओ यहूदी होनके नातासे हम अपने पुर्खा अब्राहामके बारेमे का कहाएं? बो कैसे धर्मी ठहिरो? 2 काहेकी अगर अब्राहाम अच्छो कामसे धर्मी ठहिरतो कहेसे बोके घमण्ड करनको कुछ कारण हुइतो, पर बो अपनो अच्छे कामके बारेमे परमेश्वरके अग्गु घमण्ड नाए कर सकत हए। 3 पबित्र-शास्त्र का कहात हए? जा कि “परमेश्वर जो कही बोके उपर अब्राहाम बिश्वास करी, और जहेमारे परमेश्वर बोके धर्मी घोषित करी।” 4 काम करन बारेनके दिहाणी देनो दान नाए हए, पर बो बोको पान बारो हक हए। 5 पर जौन परमेश्वरको कृपा पानके ताहीं काम नाए करत हए, बल्कि दोषीन्के निर्दोष ठहिरान बारो परमेश्वरमे बिश्वास करत हए कहेसे बोके परमेश्वर अपने अग्गु धर्मी घोषित करैगो। 6 उइसीयए राजा दाऊद लिखी, कि कैसे परमेश्वर बो आदमीनके आशिष देतहए जौनके कुछ काम बिना धर्मी ठहिराओ गओ, 7 “धन्य हएं बे, जौननके अधर्म काम क्षमा हुइगए हएं, जौनन्के पाप क्षमा करोगओ। 8 धन्य हए बो आदमी जोसे परमेश्वर पापको हिसाब नाए लेतहए।” 9 तओ जा धन्य बचन, का खतना बारेनके ताहीं इकल्लो हए या बिना खतना बारेनके ताहीं फिर? हम बहे कहिरहे हएं जो पबित्र-शास्त्र कहात हए, “परमेश्वर जो कही बोके उपर अब्राहाम बिश्वास करी, और परमेश्वर बोके धर्मी घोषित करी।” 10 अइसो कब भओ? अब्राहामको ब्यवस्था अनुसार खतना करनसे अग्गु, कि पिच्छु? खतना करनसे अग्गुवए अब्राहाम पहिले बिश्वास करी। 11 परमेश्वर बोके पहिलीए स्वीकार करलै रहए और बोके धर्मी घोषित करदइ रहए, जबकी अब्राहामको अभए खतनए नाए भओ रहए। खतनाको चिन्हा स्वीकारको चिन्हा हए। जहेमारे अब्राहाम बे आदमीनको आत्मिक दौवा हए, जो बिश्वास करत हएं पर उनको खतना नाए भओ हए। बे अपने बिश्वासके कारण धार्मि ठहिराए जात हएं। 12 और बे खतना करे भएनको पुर्खा हओ, जो नए केवल खतना करेभए हएं, पर उनके ठिन उइसीयए बिश्वास हए, जैसो हमर पुर्खा अब्राहाममे रहए। 13 जा जाकेमारे नाए रहए, कि अब्राहाम मोशाको नियम कानुनके पालन करी। पर परमेश्वर अब्राहाम और अब्राहामको बंशके जा संसारके देन प्रतिज्ञा करी, और बा बिश्वास करोके कारणसे धर्मी घोषित करी। 14 काहेकी अगर अब्राहाम और बोको बंशके मोशाको नियम कानुन पालन करोके कारणसे बो प्रतिज्ञा दओ जैतो कहेसे, बिश्वास बिना कामको और प्रतिज्ञा बिना मतलबको हुइजैतो। 15 नियम कानुन पुरा रुपमे नाए मानन बारेनके उपर परमेश्वरको क्रोध आतहए और जहाँ नियम कानुन नैयाँ हुवाँ नियम कानुनको कोइ उलंघन फिर नाए होत हए। 16 जहेमारे आदमी बिश्वासके द्वारा परमेश्वरको प्रतिज्ञा प्राप्त करीं। अइसो जाकेमारे होत हए, ताकी बाचा अनुग्रहसे प्राप्त होबए। तओ अब्राहामके सारे सन्ताननके बो बाचा प्राप्त हुइ सकत हए। जा सिरफ उनके ताहीं इकल्लो नाए जो मोशाको नियम कानुनके अधिन रहात हएं बल्कि हर बे आदमीनके ताहीं हए जो अब्राहाम जैसो बिश्वाससे जितो हए, जो हम सबजनैको पुर्खा हए। 17 पबित्र-शास्त्र कहात हए कि, “मए तोके बहुतसे जातिनको पुर्खा ठहिराओ हओं।” परमेश्वरकी दृष्टिमे अब्राहाम हमर दौवा हए। अब्राहाम बहे परमेश्वरमे बिश्वास करी, जो मरे भएनके जिन्दा करत हए और बे चिजनके फिर अस्तित्वमे लात हए जौनको अस्तित्व नाए हए। 18-19 परमेश्वर अब्राहामसे कही, कि बोके बहुत बंश होंगे, पर अब्राहाम देखी, कि सन्तान उत्पन्न करनके ताहीं बो बहुत बुढो रहए, काहेकी बो लगभग सओ सालको हुइगओ रहए। सारा फिर अब सन्तान उत्पन्न नाए करपबैया रहए। पर जबकी सब कुछ जा दिखात रहए, कि बहुत जातिनको दौवा नाए बन पएहए, तहुँफिर बो अपने बिश्वासमे कमजोर नाए भओ। बो बिश्वास करतए रहो और अपनो आसरा कभीनाए खोइ। 20 अब्राहाम परमेश्वरके प्रतिज्ञाके बारेमे कुछ शंखा करी, पर अपनो बिश्वासमे बलियो हुइके परमेश्वरके महिमा दइ। 21 काहेकी अपनो करोभओ प्रतिज्ञा परमेश्वर नेहात्तओ पुरा करैगो कहिके बोके पता रहए। 22 बोको बिश्वासके कारण, परमेश्वर बोके धर्मी घोषित करी। 23 और जा बचन, “बिश्वास द्वारा अब्राहाम धर्मी घोषित भओ,” जा केवल अब्राहामके ताहीं इकल्लो नाए लिखोगओ, 24 बल्कि हमर ताहीं फिर लिखोगओ हए, जौन हमर प्रभु येशूके मरे मैसे फिरसे जीबन देन बारो परमेश्वरमे बिश्वास करी हएं। जहे बिश्वासके कारणसे हम फिर परमेश्वरके अग्गु धर्मी घोषित करेजामंगे। 25 येशू हमर अपराधके ताहीं मारोगओ, और परमेश्वर हमएं अपने सँग धर्मी घोषित करनके ताहीं येशूके फिरसे जिन्दा करी। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation