प्रकाश 9 - राना थारु नयाँ नियमपाँचौँ तुरही 1 तओ पाँचौँ स्वर्गदूत अपन तुरही फुँकी, और मए एक तारा बादरसे पृथ्वीमे गिरनडटो देखो, जो ताराके कुन्जी दओगओ जौन गहिरो कुण्डा खोदन सिकत हए, जौनको गहिराइको कोइ अन्त नाए हए। 2 बो गहिरो कुण्डा खोली, और बो कुण्डा मैसे आगिको बडो भठ्ठासे निक्रो भओ धुवाँ कता आओ, और बो कुण्डाको धुवाँ सूर्य और वायुमण्डल अँध्यारोसे छैगओ रहए। 3 बो धुवाँसे पृथ्वीमे टिंण्हा निक्रे, और बिनके आदमीनके डसनको शक्ति दओगओ रहए, जैसे बिछी आदमीनके डसत हए। 4 जैसे कोइ बिछीके डसनसे पिरात होतहए, उइसीयए जे टिंण्हाके पाँच महिनातक बे आदमीनके नुक्सान पहुँचानको अनुमति दओगओ रहए, जौनको माथोमे परमेश्वरको मोहरको छाप नाए रहए। पर उन्हएं नए त पृथ्वीको जंगलको, नए कोइ पेणको और नए कोइ रुखाको नुक्सान पहुचानको रहए। 5 और बे टिंण्हनके आदमीनके मारनको अनुमति फिर नाए रहए, उन्हएं सिरफ पाँच महिनातक बिनके पिडा देनको अनुमति रहए। जैसे बिछीके डसनसे बहुत पिडा होतहए उइसीयए पिडा टिंण्हा डसनसे होत रहए। 6 बे पाँच महिनामे आदमी मरनको तरिका ढुणंगे, पर बे मरनाए पामंगे। बे मरनके इच्छा करंगे, उन्हएं मरनको कोइ तरिका नाए मिलैगो। 7 जे टिंण्हा घोडा कता दिखात रहएं, जो युद्धमे जानके ताहीं तयार रहएं। बे अपने मुणमे कुछ पैँधे रहएं जो सोनोको मुकुट जैसो दिखात रहए। उनको मुँहुँ आदमीनको मुँहुँ कता रहएं। 8 उनको बार, बैयरके बार कता लम्बे रहएं। उनको दाँत बघटाके दाँत कता मजबुत रहएं। 9 अपनी छातीमे बे लोहाके बनेभए कबच पैँधे रहएं। जब बे उणत रहएं, तओ बे अइसे अबाज निकारत रहएं, जैसे कोइ घोडा लडाइमे जान बारो रथके तानत पेती करत हएं। 10 उनको बिछीन कता पुँछ और खिल रहएं। बे अपनी पुँछके खिलसे पाँच महिनातक आदमीनके कष्ट पुगानमे सक्षम रहएं। 11 एक राजा हए, जो उन्हएं नियंत्रित करत हए। बो बहे शैतानको दूत हए, जौन गहिरो कुण्डाके खोली रहए। हिब्रू भाषामे बक नाउँ एबाड्डोन हए, और ग्रीक भाषामे बक नाउँ अपोल्लियोन हए, जोको अर्थ हए, “जौन नाश करत हए।” 12 पाँच महिना पिच्छु जा बिपत्ति खतम हुइजाबैगी। पर जाके पिच्छु फिरसे दुई औ बिपत्ति आन बारी हएं। 13 जाके पिच्छु, छैठौँ स्वर्गदूत अपन तुरही फुँकी। जब बो जाके बजाई, तओ मए परमेश्वरके अग्गु धुप जलान बारो सोनोको बेदीके चारौ कोनोसे मए एक अबाज सुनो। 14 और बो अबाज तुरही फुँकन बारो छैठौँ स्वर्गदूतसे कही, “अब बे चार शैतानको दूतनके खोल्देओ, जो यूफ्रेटिस नाउँ भओ बडो नदीयाके किनारे बंधे हएं।” 15 जहेमारे बे चार शैतानको दूतके खोलो गओ। बे पहिलीयएसे तयार रहएं, और उनके कहोगओ रहए, कि जा समय, जा दिन, जा महिना और जा सालके ताहीं आसरा करएं, और अब जा समय आइगओ रहए। उनके, संसारके एक हिस्सा आदमीनके मारनको रहए। 16 हुवाँ घोडाको सवारमे सैनिकको एक बहुत बडी फौज इकट्ठा भइ, जौनको गिन्ती मए बीस करोड सुनो। 17 बे घोडा और उनके सवार, जौननके मए दर्सनमे देखो, बे अइसे दिखात रहएं: उनकी लोहाके बने भओ कबचमे अग्नि कता लाल, गाढो निलो और गन्धकके कता पेरे रहएं। घोडनको मुण बघटाको मुण कता दिखात रहएं, उनके मुँहुँसे आगी, धुँवा और गन्धक निक्रत रहएं। 18 पृथ्वीके सब आदमी मैसे एक तिहाइ आदमीनके जे तीन भयानक बिपत्तिनके द्वारा मारे गए, जो घोडनको मुँहुँसे निक्रत रहएं अर्थात्: आगी, धुवाँ और गन्धक। 19 पर बे घोडनके ठिन आदमीनके मारनके ताहीं दुई अलग चीज रहएं, एक त बो जो उनके मुँहुँसे निक्रत रहएं, दुस्री उनकी पुँछनमे रहए। काहेकी उनके पुँछ साँप कता रहएं, उनमे आदमीनके काटनके ताहीं मुण रहए। 20 और बाँकीके आदमी, जो बे हानिकारक घोडनके द्वारा नाए मारे गए, बे अपनी सोनो, चाँदी, पितर, पत्थर और लकणीकी मूर्तिके पुजा करनके नाए छोडीं, जो बे बनाइ रहएं। जे मूर्ति नए देख पातहएं, नए सुनपात हएं और नए नेँगपात हएं। बे भुतनके फिरसे आराधना करनके नाए छोडीं। 21 उनको हत्या करन बारो, मन्तुर करन बारो, व्यभिचार करन बारो और चोरी करन बारो काम छोडके परमेश्वर घेन नाए घुमीं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation