प्रकाश 7 - राना थारु नयाँ नियम

एक लाख चवालिस हजार जनैके उपर मोहर

^1-2 जाके पिच्छु, मए चार स्वर्गदूतनके संसारके चारौ कोनेमे ठाणेभए देखो। बे स्वर्गदूत परमेश्वरसे, संसारके नुक्सान पुगान बारो शक्ति प्राप्त करीं, चहुँ बे समुन्दरमे होएं या जमिनमे। बे संसारके चारौ कोनोसे ब्यारके रोक दइं, ताकी समुन्दरमे, जमिनमे और रुखामे ब्यार नाए चलए। मए एक औ स्वर्गदूतके अगार घेनसे प्रकट होत देखो। बोके ठिन परमेश्वरके घेनसे एक मोहर रहए जो हमेसा जिन्दा हए। बो स्वर्गदूत उँची अबाजसे बे चार स्वर्गदूतनके चिल्लाई और कही:

³ “जब तक हम अपने परमेश्वरके दासनके माथोमे मोहरको छाप नाए लगाए देएं ताकी बे बेहीं बिपत्तिसे पिडित नाए होमएं, तबतक पृथ्वी, समुन्दर और रुखनके नुक्सान मत् पुगैयओ।”

⁴ जब स्वर्गदूत मोहरको छाप लगाएडारीं, तओ कोइ मोके बताइ, कि बे आदमी जौननके माथेमे स्वर्गदूत परमेश्वरको मोहरको छाप लगाइं, उनकी संख्या एक लाख चवालीस हजार रहए। जे आदमी इस्राएल देशके सबए बाह्र कुलसे आए रहएं।

⁵ स्वर्गदूत यहूदाके कुलसे बाह्र हजार आदमीमे मोहरको छाप लगाइं: रुबेनके कुलसे बाह्र हजार जनैके, गादको कुलसे बाह्र हजार जनैके,

⁶ आशेरको कुलसे बाह्र हजार जनैके, नप्तालीको कुलसे बाह्र हजार जनैके, मनश्शेको कुलसे बाह्र हजार जनैके।

⁷ शिमियोनके कुलसे बाह्र हजार जनैके, लेबीके कुलसे बाह्र हजार जनैके, इस्साखारको कुलसे बाह्र हजार जनैके,

⁸ जबूलूनको कुलसे बाह्र हजार जनैके, योसेफके कुलसे बाह्र हजार जनैके, बेन्यामीन कुलसे बाह्र हजार जनैनके मोहर लगाइं।

सेतो लत्ता लगान बारेनको बडी भिड

⁹ जाके पच्छु मए देखो, कि आदमीनको एक इतनी बणी भिड रहए, कि कोइ फिर बे सबके नाए गिनपैतो। बे संसारके हर जाति, कुल, राष्ट्र और भाषासे रहएं। बे सिंहासन और थुमाके ठिन ठाणे रहएं। बे सेतो लत्ता पैँधे रहएं और सबए आदमी अपने-अपने हातमे, खजुरिक हँगा पक्णे रहएं, जोकी सम्मानको चिन्हा रहए।

¹⁰ और जोडसे चिल्लात कहीं: “आओ हम अपने परमेश्वरकी स्तुति करएं, जो सिंहासनमे बैठो हए और आओ हम बाकी फिर स्तुति करएं जौनके थुमा कहोजात हए, काहेकी बहे हएं जौन हमएं हमर पापके न्यायसे बचाइ हए।”

¹¹ सब स्वर्गदूत सिंहासनके चारौ घेन और धर्मगुरुनके और चार जिन्दा प्राणीनके चारौ घेन ठाणे रहएं। बे सब सिंहासनके अग्गु घुपटा पणे और परमेश्वरके आराधना करीं। बे कहीं,

¹² “आमेन! हमर परमेश्वर, हम हमेसा तुमर महिमा करत हएं, तुमके धन्यबाद और सम्मान देत हएं! हम मान्त हएं, कि तुम पुरा रितिसे ज्ञानवान हओ, और शक्तिसाली हओ, जो हमेसाके ताहीं सब कामनके करनमे योग्य हओ! आमेन!”

¹³ जामे धर्मगुरुन मैसे एक जनै मोसे पुछीं, “जे सेतो लत्ता पैँधेभए कौन हएं? और कहाँसे आए हएं?”

¹⁴ और मए बोसे कहो, “हे स्वामी, मए नाए जानत हओं पर तए जानत हए।” बो मोसे कही, “जे सेते लत्ता पैँधेभए आदमी बेहिं हएं, जौनको मृत्यु कष्टको भयानक समयमे भओ रहए। जे बे आदमी हएं, जौन थुमाके खुनसे अपनएके सफा बनाए लइ हएं।”

¹⁵ जहेमारे, “बे परमेश्वरको सिंहासनके अग्गु ठाणे हएं, और बे हर समय दिनरात परमेश्वरके महापबित्र ठाउँमे बाकी सेवा करत हएं। और बिनको सुरक्षा बाके द्वारा करोजात हए, जो सिंहासनमे बैठो हए, काहेकी बा हुवाँ उनके सँग हए।

¹⁶ बे अबसे कभु भुँखे और प्यासे नाए होमंगे; और अब बे सूर्यसे या कोइ फिर गरमाहटसे जलाए नाए जामंगे।

¹⁷ काहेकी थुमा, जो सिंहासनके बीचमे हए, उनकी रेखदेख करैगो। उइसीयए, जैसे एक बकरेहेरा अपने भेंणाके रेखदेख करत हए। और बा उन्हएं ताजा पानी पिनके ताहीं लैजाबैगो जो आदमीनके जीबन देतहए। और परमेश्वर उनकी आँखीसे सब आँसु पोँछ डारैगो।”