प्रकाश 5 - राना थारु नयाँ नियम

खलरीको चिट्ठी और थुमा

¹ और जो सिंहासनमे बैठो रहए, मए बाके दहिना हातमे एक खलरीको चिट्ठी देखो, जो भितर और बाहेर दुनौ पार लिखो रहए। और बोके सात मोहर लगाएके बन्द करोगओ रहए।

² फिर मए एक शक्तिशाली स्वर्गदूतके देखो जो उँचो शब्दसे जा परचार करत रहए “जा खलरीको चिट्ठीको मोहर तोणन और जाके खोलनके अधिकार कौनक ठिन हए?”

³ पर स्वर्गमे, पृथ्वीमे और पृथ्वी तरे कोइ बो खलरीको चिट्ठीके खोलन या बो खलरीको चिट्ठीमे जो लिखो रहए बोके देखनको लायक नाए निक्रो।

⁴ तओ मए बहुत जोर-जोडसे रोओ, काहेकी बो खलरीको चिट्ठीके खोलन या खलरीको चिट्ठीमे जो लिखो रहए बोके देखनको लायक कोइके नाए मिलो।

⁵ जामे धर्मगुरु मैसे एक जनै मोसे कही, “मतरोए! देख, बो जो यहूदाको कुलको बघटा कहोजात हए, राजा दाऊदको जर शैतानके उपर बिजय पाइहए! और जहेमारे, बो खलरीको चिट्ठीको सात मोहरनके तोणनके और जाके खोलनके लायक हए।”

⁶ फिर मए चार जिन्दा प्राणीनके और चौबिस धर्मगुरुनके बीच सिंहासनके ढिँगै एक थुमाके ठाणो देखो, थुमामे बलिदानको चिन्हा रहए। बक सात सिंग और सात आँखी रहएं; जे परमेश्वरके सात आत्मा हएं जो पुरो पृथ्वीमे पठाए गए हएं।

⁷ थुमा अग्गु आएके, बाके दहिना हातमे जो सिंहासनमे बैठो रहए, बो खलरीको चिट्ठीके लैलै।

⁸ जब बा खलरीको चिट्ठीके लैलै, तओ बे चारौ जिन्दा प्राणी और चौबिसौ धर्मगुरु थुमाके अग्गु झुकीगए; और सब धर्मगुरु एक बिणा और सोनोसे बनो भओ कटोरा पक्णे रहएं। कटोरा धुपसे भरो भओ रहए जो बो धुपको सुगन्ध बे आदमीनको प्राथनाको चिन्हा हए जो परमेश्वरके हएं।

⁹ और बे अइसे करके थुमा अर्थात् येशू ख्रीष्टके बारेमे गान लागे, “तुम जा खलरीको चिट्ठीको मोहरके तोणन और जाके खोलनके लायक हओ। काहेकी तुमके मारडारोगओ रहए और अपनो मृत्युके खुनसे तुम संसारके हर कुल, भाषा, आदमी और जातिसे परमेश्वरके ताहीं आदमीनके छुटकारा दए।

¹⁰ तुम उनके राजा बनाए, तुम उन्हएं पुजारी बनाए जो हमर प्रभु परमेश्वरको आराधनाको काम करत हएं, और बे पृथ्वीमे राजन कता राज्य करंगे।”

स्वर्गदूतसे थुमाको प्रसंसा

¹¹ जब मए फिरसे देखो, तओ अचानकसे मए लाखओं-लाख स्वर्गदूतनकी अबाज सुनो, उनकी गिन्ती नाए करोजाए सकत रहए। बे चार जिन्दा प्राणी और बे चौबिस जनै धर्मगुरु, सबए बो राजाके सिंहासनके आसपिस रहएं।

¹² बे जोड-जोडसे अइसे कहानडटे रहएं, “बा थुमा जोके मार दओगओ रहए, बा महिमाको लायक हए। बाको अधिकार महान हए। बाको बुद्धि गहिरी हए। बा बहुत शक्तिसाली हए और बा बहुत धनवान हए। आओ हम बाको आदर करएं। आओ हम बाको स्तुति करएं।”

¹³ फिर मए स्वर्ग, पृथ्वीमे, पृथ्वीके तरे, समुन्दरके सब रचेभए चिजनके और सबकुछके जो उनमे हएं, जा कहात सुनो, “आओ हम बाकी महिमा करएं, जो सिंहासनमे बैठो हए। आओ हम थुमाको महिमा करएं। आओ हम हमेसाके ताहीं बाको आदर करएं और बाके सम्मान देमएं, काहेकी बा सबसे जद्धी शक्तिसाली हए।”

¹⁴ तओ चारौ जिन्दा प्राणी, “आमेन” कहीं। और बे धर्मगुरु घुपटा पणके आराधना करीं।