प्रकाश 2 - राना थारु नयाँ नियम

एफिसस सहरको मण्डली

¹ येशू मोसे अइसेफिर कही, “एफिसस सहरके मण्डलीके स्वर्गदूतके जा सन्देश लिख: मए बहे हओं, जो सात ताराके अपने दहिना हातमे लएहओं, और सात सोनोके दियनके बीचमे नेँगत हओं। जो मए तोसे कहात हओं बोके सुन:

² मए जान्त हओं, कि तए का करत हए, तए कैसे कडा मेहेनत करत हए और कभी हार नाए मानत हए। और मए जा फिर जान्त हओं, कि तए बुरे आदमीनको झुठी शिक्षनके नाए सहिपात हए। तए बे आदमीनके जाँचो हए जो कहात हएं, कि बे चुनेभए चेला हएं। पर बास्ताबमे बे नाए हएं, और तए जानो, कि बे झुठे हएं।

³ मए जानत हओं, कि तए मोएमे बिश्वास करेके कारणसे धर्यपुर्वक कष्ट सहो हए, तहुँफिर मिरमे तिर बिश्वास मजबुत हए।

⁴ पर तिर बिरुद्धमे मिर जा गुनासो हए: अब तए मोसे उइसे प्रेम नाए करत हए जैसो प्रेम तए मोसे तओ करत रहए जब तए सुरुको चोटी मोएमे बिश्वास करो रहए।

⁵ जहेमारे याद कर, कि तए सुरुवातमे मोसे कैसे प्रेम करत रहए, और अब तए मोसे उइसे प्रेम नाए करत हए। जहे बातमे पाप करन छोडके परमेश्वर घेन घुम, और मोसे अइसीयए प्रेम करन सुरु कर, जैसे तए सुरुवातमे मोके प्रेम करत रहए। अगर तए नाए बदलैगो, तओ मए तिर ठिन आमंगो और जहाँ तिर दिया धरो हए, बोके हुवाँसे हटाएके तोके दण्ड देमंगो।

⁶ पर एक अच्छी बात हए जो तए करत हए। बो जा हए, कि तए निकोलाइटसके द्वारा सिखाओ भओ दुष्ट कामनसे घृणा करत हए, ठिक उइसीयए जैसे मए घृणा करत हओं।

⁷ हरकोइ, जो मिर सन्देशके सम्झन चाँहत हए, बोके बे बातके ध्यानसे सुनन पणो जो परमेश्वरको पबित्र आत्मा मण्डलीनसे कहात हए: ‘बे आदमी जो बुराइके हराए देत हएं, उनके मए जीबन देन बारो पेणसे फल खानको अधिकार देमंगो, जो पेण परमेश्वरको स्वर्गको बगियामे हए।’”

स्मुर्ना सहरको मण्डली

⁸ येशू मोसे अइसेफिर कही, “और स्मुर्ना सहरके मण्डलीके स्वर्गदूतके जा सन्देश लिख: महीँ बा हओं, जो सब चिजनके सुरु करो हओं। महीँ बा हओं, जो सब चिजनके अन्त करंगो और मए एक चोटी मरिगओ रहओं, पर अब मए जिन्दा हुइगओ हओं, और सदादिन जिन्दा रहामंगो। मए जो कहात हओं बोके सुन:

⁹ मए जानत हओं, कि तोके सतावगओ हए और तए गरीब हए। पर आत्मिक मामलामे तए बहुत धनवान हए। मए बे आदमीनके बारेमे जान्त हओं, जो दाबि करत हएं कि बे यहूदी हएं, पर बे सच्चे यहूदी नाए हएं। बे तेरे बातके बदनाम करत हएं, पर बास्ताबमे बे बहे समुहके सदस्य हएं जो शैतानको हए।

¹⁰ बे दुखसे मत् डराए जो तोके मिलंगी। शैतान तुम मैसे कुछ आदमीनके पकणबाबैगो और तुमके जेलमे डार देबैगो, ताकी बे तुमर जाँच कर्पामएं। तुम दश दिनतक बहुत कष्टको महसुस करैगे। पर मोएमे बिश्वास करन कभु मत् छुणियओ, चहुँ तुमके मरनके पणए। काहेकी तुमके तुमर जितको पुरुस्कारके रुपमे कभी नाश नाए होन बारो जीबन देमंगो।

¹¹ हर कोइ, जो मिर सन्देशके सम्झन चाँहत हए, बोके बे बातके ध्यानसे सुनन पणो जो परमेश्वरको पबित्र आत्मा मण्डलीनसे कहात हए। ‘बे आदमी जो बुराइके हराए देत हएं, उनके बो दण्डमे सामिल नाए करोजाबैगो जोकी दुस्रो मृत्यु हए।’”

पर्गामम सहरको मण्डली

¹² येशू मोसे अइसेफिर कही, “पर्गामम सहरके मण्डलीके स्वर्गदूतके जा सन्देश लिख: मए बहे हओं जौनके सँग दुनौ घेन पैनो धार बारो तरबार हए। जो मए तोसे कहात हओं बोके सुन:

¹³ मए जानत हओं, कि तए शैतानको सिंहासनके अधिनमे हए, पर अइसो होतए-होत तए मोएमे अपनो बिश्वासके मजबुत करो हए, और तए मिर शिक्षनके नाए छोडो हए। हियाँतककी, तहुँफिर नाए छोडो, जब बहुत समय पहिले एन्टिपासको हत्या करोगओ रहए। बो मिर बचनके परचार करनमे बिश्वासयोग्य रहए, जहेमारे बोके तेरे सहरमे मारडारीं जो शैतानके अधिनमे हए।

¹⁴ पर तिर बिरुद्धमे मिर जा गुनासो हए: काहेकी तए बे आदमीनको बिरोध नाए करत हए, जो तेरे मण्डलीमे झुठे शिक्षा देत हएं, जैसे अगमबक्ता बालाम बितो भओ समयमे शिक्षा दइ रहए। बालाम अगमबक्ता, राजा बालाकके सिखाइ, कि इस्राएल देशके आदमीनके पाप करनके ताहीं उक्सानके का करनके पणैगो। बो उनके मूर्तिनको बलि चढाओ भओ खानु खान और अनैतिक रुपसे जीइनके सिखाइ।

¹⁵ उइसीयए, तिर बीच कुछ आदमी हएं जो निकोलाइटस समुहको शिक्षनको पालन करत हएं।

¹⁶ जहेमारे पाप करन छोडके परमेश्वर घेन घुम, अगर तए अइसो काम करन बन्द नाए करैगो, तओ मए जल्दीए आमंगो और बे आदमीनके बिरुद्ध बो तरबारसे लडंगो, जो मिर मुँहुँसे निक्रत हएं, जो मिर बचन हए।

¹⁷ हर कोइ, जो मिर सन्देशके सम्झन चाँहत हए, बोके बे बातके ध्यानसे सुनन पणो, जो परमेश्वरको पबित्र आत्मा मण्डलीनसे कहात हए: बे आदमी जो बुराइके हराए देत हएं, मए उन्हएं बहे मन्न मैसे कुछ चीज देमंगो, जो चीज लुको हए। मए उन मैसे सबके एक सेतो पत्थर देहओं, जोमे एक नयाँ लिखो भओ होबैगो। जौन आदमी बोके पाबैगो, बोके छोडके कोइ फिर बो नाउँके नाए समझ पाबैगो।”

थिआटीरा सहरको मण्डली

¹⁸ येशू मोसे अइसेफिर कही: थिआटीरा सहरके मण्डलीके स्वर्गदूतके जा लिख: जा सन्देश परमेश्वरको लौंणासे हए। जौनको आँखी आगीको ज्वाला कता हए और जौनक पाउँ आगीको भट्टीमे निख्रो भओ फूलके बर्तन कता रहएं। जो मए तोसे कहात हओं बोके सुन:

¹⁹ मए पता हए, कि तए कैसे कडा मेहेनत करत हए, तए एकदुस्रेनके प्रेम करत हए और तिर बिश्वास मोएमे मजबुत हए। और मोके पता हए, कि तए एकदुस्रेनके कैसे मदत करत हए, तोएमे सहानको क्षमता हए। मोके पता हए, कि तए पहिले मोएमे बिश्वास करो समयसे अभए जे अच्छे काम करनडटो हए।

²⁰ पर तिर बिरुद्धमे मिर जा गुनासो हए: तए बो बैयर ईजेबेलके झुठो शिक्षा फैलान देतहए। बो कहात हए, “मए एक अगमबक्ता हओं” पर बक शिक्षा मेरे आदमीनके यौन पापमे भाग लेन और मूर्तिके बलि चढाओ भओ खानु खान लगात हए।

²¹ मए बक पक्षताप करनके समय दओ, पर बो बे अनैतिक कामके करन बन्द करनसे इन्कार करी।

²² जहेमारे, मए बक बिमार करदेहओं। और जौन बक सँग व्यभिचार करत हएं, मए उनमे भयानक कष्ट लामंगो, जब तक बे बक सँग कररहे अनैतिक काम करन बन्द नाए करहएं।

²³ मए बक शिक्षाके मानन बारेनके मारदेहओं। और सब मण्डली पता पएहएं, कि मए बहे हओं जौन सबको मन और ह्रदय जाँच करत हए, और मए तुम सबके तुमर करोभओ काम अनुसार प्रतिफल देहओं।

^24-25 पर थिआटीरा सहरमे तुम बाँकी आदमी बो झुठो शिक्षाके नाए माने हओ। तुम बे बातनके स्वीकार नाए करेहओ जौनके बे कहात हएं, “बहुत महत्त्वपूर्ण चीज जो शैतान देतहए।” मए तुमसे कहात हओं, कि मए औ कुछ महत्त्वपूर्ण आदेश तुमके नाए कहामंगो, जा बाहेक कि तुम मोएमे मजबुत हुइके बिश्वास करे रहाओ जब तक मए नाए अएहओं।

²⁶ जौन आदमी बुराइके हराए देतहए और मिर आज्ञाके अन्त तक पालन करेरएहए, मए उनके जाति-जातिमे शासन करन बारो अधिकार देमंगो।

²⁷ मए उन्हएं राज्य करनको बहे अधिकार देमंगो जैसे मिर दौवा मोके दइ हए। उनको राज्य लोहा कता मजबुत होबैगो जो टुटत नाए हए, और उनके दुश्मन टुटेभए बर्तन कता नाश हुइ जामंगे।

²⁸ मए बोके अपनी जितके दिखानके ताहीं सुबेरेको तारा फिर देमंगो।

²⁹ हरकोइ जो मिर सन्देशके सम्झन चाँहत हए, बोके बे बातके ध्यानसे सुनन पणो जो परमेश्वरको पबित्र आत्मा मण्डलीनसे कहात हए: