प्रकाश 19 - राना थारु नयाँ नियमछुटकाराको गीत 1 जब शक्तिशाली स्वर्गदूत मसक्डारी, तओ मए स्वर्गसे एक बडो आदमीनको समुह अइसो कहात जैसो सुनो, जो अइसो रहए, “हल्लेलूयाह! मुक्ति, महिमा और शक्ति हमर परमेश्वरके हएं। 2 बाको प्रसंसा करओ काहेकी बाके सब इन्साफ सत्य हएं। बा महा वेश्याके दण्ड दइ हए, काहेकी बो संसारके आदमीनके पाप करन लगाइ, और फिर परमेश्वर बोको खुनको बद्ला लइ, काहेकी बाके दास बो बैयर द्वारा मारे गए।” 3 बे फिरसे एकऔ चोटी जोडसे चिल्लाएके कहीं, “हल्लेलूयाह! बेबिलोन सहरके नष्ट करन बारो आगीसे आन बारो धुवाँ कभी फिर बन्द नाए होबैगो।” 4 और बे चौबिसौ धर्मगुरु और बे चार जिन्दा प्राणी घुपटा पणके, सिंहासनमे बिराजमान भओ परमेश्वरके अइसे कहिके दण्डवत् करीं, “आमेन, हल्लेलूयाह!” 5 और तओ मए कोइके मस्कत सुनो, और अइसो लागो, कि जा अबाज परमेश्वरको सिंहासनसे आओ रहए। बा कही, “हे हमर परमेश्वरके सेवक और तुम जो बाको डर मानत हओ, चहुँ साधारण पदके होओ या चहुँ महत्तोपूर्ण पदके होओ, बाको आदर करओ। परमेश्वरको प्रसंसा करओ!” 6 तओपिच्छु, मए जो सुनो बो बहुत जद्धी आदमीनको चिल्लाओभओ अबाज कता लागत रहए। जा अबाज बडो झरनासे गिरो भओ पानी कता और गर्जनको अबाज कता रहए। बे कहीं, “हल्लेलूयाह! काहेकी हमर सर्बशक्तिमान परमेश्वर राजा हए। 7 हम रमामएं और गजब खुसी होमएं, और बाके महिमा देमएं! काहेकी जो थुमा हए बाको बेहा होन बारो हए। और बाकी दुलहीन बाके ताहीं तयार हए। 8 अब बोके बहुत अच्छो मुलायम कपडाको लत्ता पैँधनके दइ हए, जो पबित्र और शुद्ध हएं और थुमाके द्वारा दइ हए, जौनको बिश्वासीनके भलो कामनको प्रतिक हए।” 9 तओ बो स्वर्गदूत मोसे कही, “जा लिख, थुमाको बेहाको भोजमे निउतो पान बारे धन्यके हएं।” बो मोसे फिरसे कही, “जे बात जो परमेश्वर कही हए, सत्य हएं।” 10 जब मए जा बात सुनो तओ मए बो आदमीके अग्गु घुपटा पणो, जौन मोके जे बात बतानडटो रहए। काहेकी मए बाकी आराधना करन जानडटो रहओं। बा मोसे कही, “मिर आराधना मत् कर। तोके परमेश्वरएको आराधना करन पणैगो, काहेकी मए फिर तेरेकता परमेश्वरको दास हओं और येशू ख्रीष्टके प्रभुके रुपमे स्वीकार करोभओ तोही कता बिश्वासी ददाभइया हओं। बो सत्य, जो येशू प्रकट करी रहए, बो सत्य आदमीनके परमेश्वरको बचन परचार करन लायक बनातहए।” सेतो घोडा और बोको सवारी 11 तओ मए स्वर्ग खुलो देखो और हुवाँ एक सेतो घोडा रहए। बक उपर सवार होन बारो परमेश्वरको बिश्वासयोग्य और सच्चो सेवक कहोजात हए। परमेश्वरके दृष्टिमे सही भए अनुसार बा बाके दुश्मनको इन्साफ और युद्ध करैगो। 12 बाकी आँखी आगिको ज्वाला कता उजियारो रहए, और बा बहुत मुकुट लगाए रहए। बामे एक नाउँ लिखो रहए, पर बाके इकल्लो बो नाउँको अर्थ पता रहए। 13 बा खुनमे डुबाओ भओ लत्ता पैँधे रहए, और बाको नाउँ “परमेश्वरको बचन” रहए। 14 स्वर्गके बहुत सेना बाके पिच्छु-पिच्छु लागे रहएं। बे फिर सेतो घोडामे सवार रहएं और बे सेतो मलमलको कपडा लगाए रहएं, जोमे एकौ दाग नाए रहए। 15 बाको मुँहुँमे एक पैनो तरबार निक्रो रहए, जोसे बा सब जाति-जातिनके हराए देहए। बा एक लोहाको डण्डा लैके सब आदमीनके उपर राज करैगो। और जो बाको अधिकारके स्वीकार नाए करैगो, बा उनके पुरा रुपमे दण्ड देहए। बा सर्बशक्तिमान परमेश्वरको डरौनो प्रकोपके उइसीयए छोड देबैगो, जैसे एक रसको कुण्डा मैसे अंगुरको रसा बहात हए। 16 बाको लत्ता और दहिना जाँघमे “राजनको फिर राजा और प्रभुनको फिर प्रभु” लिखो हए। 17 तओ मए एक स्वर्गदूतके सूर्यमे ठाणो भओ देखो। बे बुट्टी खान बारे सबए चिरैंयन्के जो बादरमे बहुत उपर उणत रहएं, उनके जोडसे चिल्लाएके बुलाइ और अइसे कही, “आओ, परमेश्वरद्वारा तुमर ताहीं तयार करोगओ बडो भोजमे इकट्ठा होबओ। 18 आओ और राजनको, कप्तानको, शक्तिशाली सिपाहीनको, घोडा और बोमे बैठन बारेनको बुट्टी खाओ। तुम सब मरे भए आदमीनको अर्थात् कमैया और स्वतन्त्र, साधारण और महत्तोपूर्ण आदमीनको बुट्टी खाए सकत हओ।” 19 तओ मए समुन्दरसे आओ भओ राक्षस, और पृथ्वीके राजा और बिनको सेना आएभए देखो। बे घोडामे बैठेभए और बोके सेनाके बिरुद्ध युद्ध करन इकट्ठा भए मए देखो। 20 तओ बो राक्षस और बोके सँगमे दुस्रो राक्षस फिर पक्णोगओ, बो झुठो अगमबक्ता राक्षसको तरफसे अचम्मोके चिन्हा दिखाइ और सबए आदमीनके धोखा दइ, जौन राक्षको छाप लगाए रहएं, और जौन बोको मूर्तिके आराधना करे रहएं। जे दुनौ आगी और गन्धकको कुण्डामे जिन्दए फेँकेगए। 21 तओपिच्छु घोडामे बैठो भओ बो आदमी बोको मुँहुँसे निक्रो भओ तरबार इस्तमाल करके औ सबके मारी। तओ बादरमे उणन बारे चिरैंया तबतक लहासको बुट्टी खाइं जब तक उनको पेट नाए भरोगओ। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation