प्रकाश 18 - राना थारु नयाँ नियम

बेबिलोन सहरको पतन

¹ तओपिच्छु मए एक औ स्वर्गदूतके स्वर्गसे तरे आत देखो। बोके ठिन बडो अधिकार रहए और बोको बडो महिमामय ज्योतिके कारण जम्मए पृथ्वी उजियारो भओ।

² बो शक्तिशाली अबाज निकारके अइसे कही: “अब नाश हुइगओ! बेबिलोनको बो प्रख्यात सहर अब नाश हुइगओ। आज हर मेलके भुत हुवाँ रहानके ताहीं चले जामंगे, और जा अशुद्ध और घृणित राक्षसको बासस्थान होबैगो।

³ जा जाकेमारे होबैगो, काहेकी बो बैयर जोकी बेबिलोन सहर हए, हर एक राज्यके सब जातिनके बो दारु पिबाइ, जोकी बक मूर्तिनको पुजा हए। सारा पृथ्वीको राजा बक घिनौने काममे सामिल भए हएं। पृथ्वीके ब्यपारी बो बैयरकी महिंगी-महिंगी चिजनकी इच्छनके कारण धनी बनिगए हएं।”

⁴ तओ मए स्वर्गसे अइसो कहात दुस्रो अबाज सुनो: “हे मेरे आदमी, बो सहरसे बाहिर निकरजाबओ। बे आदमीन सँग पाप मत् करओ, ताकी जो दण्ड बे पामंगे बो तुमर उपर नाए आबए। और बक बिपत्ति तुमके भोगन नाए पणए।

⁵ काहेकी बक पाप बहुत हएं जैसेकी बोको पापको कटघुरा स्वर्गतक पुग्गओ हए, और परमेश्वर बोको करोभओ गलत कामके नाए भुलैगो।

⁶ जहेमारे मए कहात हओं, बो सहरके फिर उइसिए करओ, जैसे बो दुस्रे आदमीनके सँग करीहए। बोको सब बुरे कामनके ताहीं बक दुई गुणा जद्धा लौटाए दे। बो सहरके ताहीं दुई गुणा शक्तिशाली दुखकी तयारी कर, जैसो दुखसे बो दुस्रे आदमीनके सँग अत्याचार करी रहए।

⁷ तए बोके नेहात्तओ बहुत पिडा और दुख दिबाबैगो, जो बोको बिलासी जीबन और बोको अपने प्रति घमण्डके बराबर हए। बो अपनएसे कही, ‘मए एक रानी कता आदमीनके उपर राज्य करंगो। मए एक बिधवा नाए हओं, और मए बिधुवापनको दुखको अनुभव कब्ही नाए करंगो।

⁸ जहेमारे अचानक बोके उपर बिपत्ति आए पणैगी। इक्बरी बिमारी और मृत्यु, शोक और अनिकाल बोमे एकए सँग आए जामंगे। और बोके आगीमे भसम करोजाबैगो, काहेकी प्रभु परमेश्वर शक्तिसाली हए, और बा बोके दण्ड देबैगो।’”

बेबिलोनके ताहीं बिलाप

⁹ बो सहरसे व्यभिचार करन बारे और बो सहरमे सुख-बिलासमे रमान बारे धर्तीके राजा, बो जलो भओ धुवाँ देखके बोके ताहीं रोमंगे और बिलौना करंगे।

¹⁰ उन्हएं डर हए, कि बे फिर बाको दण्डमे फसजामंगे। तभीमारे बे दुर ठाणके अइसे कहामंगे, “हे बडो सहर, तए शक्तिशाली बेबिलोन! परमेश्वर तोके दण्ड देहए, औ जद्धा दण्ड देहए।”

¹¹ पृथ्वीके ब्यपारी बो सहरके ताहीं रोमंगे और बिलौना करंगे, काहेकी अब कोइ नाए हए जो बो समानके खरिदैगो, जो बे बेँच रहे हएं।

¹² उनको समान बहुत मेलके रहएं। बोमे सोनो, चाँदी, गहना और मोती रहएं। बोमे मलमलके कपडा रहएं, जो महिंगे डोरा, चम्कन बारे लाल और बैजनी लत्तासे बनाए गए रहएं। और बोमे सुगन्ध देन बारे कट्ठासे बनी भइ चीज, हथियाके दाँतसे बनी भइ चीज रहएं, और अन्य चीज रहएं जो महिंगी कट्ठा, पितर, लोहा और सिङ्गमरमरसे बनी भइ रहएं,

¹³ और दालचिनी, मसला, महाँकन बारो धुप, मूर्र, सेतो-धुप, अंगुरको रसा, और जैतूनको तेल, मैदा और गेहुँ, गैयाँ-भैँसिया, भेंणा, घोडा और रथके आदमी नाए खरिदत हएं। और जौन आदमी समान किनत हएं और बेँचत हएं, बे अब आदमीनके गुलाम बनानके ताहीं बेँचत हएं।

¹⁴ ब्यपारी बोसे कहामंगे, “बे सब चीज जौनके तए चाँहत रहए, अब बे नाए हएं। बे सब मिठे सुगन्ध बारे चीज, जो तोके मन पणत रहएं, बे सब चीज जो तए अपनो शरीरके सुन्दर बनानके ताहीं इस्तमाल करत रहए, बे सब खोइगए हएं, बे अब कब्ही नाए मिलंगी।”

¹⁵ जे समानके ब्यपारी, जौन बो सहरमे व्यपार करके धन कमाइ रहएं, बोके उपर पणन बारो दुखके डरसे दुरए ठाणके अइसे कहात बे बडो सोरसे रोमंगे, और बिलौना करंगे,

¹⁶ “तए बडो सहर, परमेश्वर तोके दण्ड देहए, औ जद्धा दण्ड देहए! तए जो मलमल बैजनी और चम्कन बारो लाल कुर्ता लगाएके सोनो, गहना और मोतीसे सम्हरो रहए।”

¹⁷ बेबिलोन अपनो सब सम्पति अचानक गुमाइ। और सबए जहाजके कप्तान, और जहाजमे यात्रा करन बारे सबए आदमी, और नैयाँ चलान बारे, और समुन्दरमे कम करके अपने जिबिका चलान बारे बे व्यापारी बेबिलोनसे बहुत दुर ठाणेके देखतए रहे।

¹⁸ और जब बे बो आगीसे निक्रन बारो धुवाँ देखंगे, जौन सहरके जलात हए, बे चिल्लाएके अइसे कहामंगे, “जा बडो सहर कता औ कोइ दुस्रो सहर नाए हए।”

¹⁹ और बे अपनो दुख दिखानके ताहीं अपने मुणमे धुधर डारीं और रोतए और बिलौना करतए अइसे करके चिल्लाइं, “परमेश्वर तुमके दण्ड देहए! जो बो बडो सहरको सम्पतिके कारण पानीजहाजनके सबए मालिक धनी भए रहएं। और अब कुछ समयमे जामे भए सब चीज गाइब हुइगए।

²⁰ तुम जो स्वर्गमे बैठत हओ, बोके सँग भओ बातमे आनन्द मनाबओ! हे पबित्र आदमी, चुनेभए चेला और अगमबक्ता आनन्द मनाबओ। काहेकी परमेश्वर बेबिलोन सहरके बे बातनके ताहीं दोषी ठहिराइ हए, जो काम बा तुमर सँग करीहए।”

बेबिलोन सहरको बिनाशको अन्तिम अवस्था

²¹ जाके पिच्छु एक शक्तिशाली स्वर्गदूत बडो चकिया जैसो एक पत्थर उठाइ, और अइसे कहिके बोके समुन्दरमे फेँकी, “जैसी जा पत्थर समुन्दरमे फेकोजात हए, और फिरसे जा नाए मिलैगो। उइसियए, बडो सहर बेबिलोन फिर एकए चोटीमे नास हुइ जाबैगो, और जा दुबरा नाए बनोजबैगो।

²² हे बेबिलोन सहर, तोएमे फिरसे कभी फिर बिणा बजान और गीत गानको स्वर सुनाइ नाए देबैगो। हुवाँ बसुली या तुरही बजाओ भओ सुनाइ नाए देबैगो। अइसियए कोइ फिर अच्छो कारिगर नाए होबैगो। और चकिया पिसनको अबाज फिर सुनाइ नाए देबैगो।

²³ फिरसे कभी फिर आदमी तोएमे एक दियाको उजियारोके चम्कत नाए देखंगे। फिरसे कभी फिर बेहा होन बारे एक लोग और बैयरकी अबाज नाए सुनंगे। हुवाँके ब्यपारी पुरे संसारमे सबसे शक्तिसाली रहएं। और संसारके सब जाति हुवाँके जादुगरनसे छले गए।

²⁴ परमेश्वर बेबिलोन सहरके जा कारणसे सजाय दइ, काहेकी बो सहर अगमबक्तनके, पबित्र आदमीनके और संसारमे भए सबए आदमीनके मारनको दोषी रहएं।”