प्रकाश 17 - राना थारु नयाँ नियम

बैयर आदमी और राक्षस

¹ बे सात कटोरा लेन बारे स्वर्गदूत मैसे एक जनै मेरे ठिन आएके कही, “इतए आ, मए तोके दिखामंगो कि परमेश्वर कैसे बो महा वेश्याके दण्ड देबैगो, जो एक अइसो ठिहामे बैठतहए जहाँ बहुत नदिया हएं।”

² बोके सँग पृथ्वीके राजा व्यभिचार करी रहएं और बो सारा मानब जातिनके अपन जाण-दारुमे दरोहा बनाए दइ। जोको मतलब जा हए, कि बोको ब्यबहार गजब खराब हए, जौन ब्यबहार बो सरा मानब जातिनके सिखाइ हए।

³ और पबित्र आत्माको मदतसे स्वर्गदूत मोके जंगली इलाकामे लैगओ। मए हुवाँ एक बैयरके देखो, जो एक राक्षसके उपर बैठी रहए जो राक्षस लाल रंगको रहए। बोको सात मुण और दश सिंग रहएं। बोको शरीर बिनको नाउँसे तुपो रहए, जौन परमेश्वरके बदनाम करत हएं।

⁴ बो बैयर बैजनी और लाल रंगको चमकन बारो कपडा लागए रहए। बो अपनी शरीरके सोनोको गहना, महिंगो पत्थर और महिंगो मोतिसे सजाए रहए। अपने दहिना हातमे बो दारुसे भरो भओ एक सोनोको कटोरा पक्णे रहए, जो घिनौनो काम और खराब यौन ब्यवहारके जनात हएं।

⁵ बक माथेमे एक नाउँ लिखो रहए: जोको एक गुप्त अर्थ रहए। जा अइसे रहए, “मए बडो सहर बेबिलोन हओं। मए सब वेश्यनकी अइया हओं और संसारके सब घिनौनो चिजनको स्रोत हओं।”

⁶ और मए देखो, कि बो बैयर परमेश्वरके पबित्र आदमीनको खुन पिइके दर्हुया कता नसा हुइगइ रहए। काहेकी बे येशूमे बिश्वासयोग्यतासे येशूको अनुशरण करे रहएं। जा देखके मोके बहुत अचम्मो लागो।

बैयर आदमी और राक्षसको अर्थ

⁷ तओ बो स्वर्गदूत मोसे कही, “अचम्मो मत् मानए। बो बैयर और बोके बोकन बारो सात मुण और सिंह भओ राक्षसको रहस्य मए तोके बतामंगो।

⁸ बो राक्षस जौनके तए अभए देखो, एक समयमे जिन्दा रहए, पर अब जिन्दा नाए हए; बो गहिरो कुण्डासे बाहिर आन बारो हए और परमेश्वर बोके पुरा रुपसे नष्ट करदेबैगो। पृथ्वीमे रहान बारे आदमी जौनको नाउँ परमेश्वर संसारको सृष्टि करनसे पहिले जीबनको किताबमे लिखो नाए रहए, बे सब अचम्मो मानंगे, जब बे जा राक्षसके देखंगे। एक समयमे बो जिन्दा रहए; अब बो जिन्दा नाए हए पर अब बो फिरसे लौटके आबैगो।

⁹ जा बुझनके ताहीं तुम्हएं बुद्धिको जरुरत हए। बो राक्षके सात मुण, सहरके सात पहाडनके जनात हए, जहाँ जा बैयर राज्य करत हए।

¹⁰ बिन मैसे पाँच जनै त मरिगए हएं, और उन मैसे एक जनै हबए राजा हए, और अन्तिम बारो अबतक आओ नाए हए। पर अब बो आबैगो, तओ थोडी समयके ताहीं इकल्लो शासन करैगो।

¹¹ बो राक्षस जो एक समय रहए पर अब नाए हए, बो आठौँ राजा हए। पर बो आठौँ राजा, पहिले बारे सात राजन मैसे एक हए। और अन्तमे बो राजाके नेहात्तओ सदाके ताहीं सजाय दओ जाबैगो।

¹² तुम पहिले देखेभए बे दश सीङ, दश राजाके जनात हए जौन अभए शासन करन सुरु नाए करीहए। बे दश राजनके, राक्षस सँग मिल्के शासन करन बारो अनुमति दओगओ हए। पर बिनको शासन थोडी समयके ताहीं इकल्लो होबैगो।

थुमाके ताहीं विजय

¹³ जे दश राजनको एकए उदेश्य हए, और बे अपनो शक्ति और अधिकार राक्षसके देमंगे।

¹⁴ बे थुमाके बिरुद्धमे युद्ध करंगे, पर थुमा उनके हराए देबैगो, काहेकी बा प्रभुनको प्रभु और राजनको फिर राजा हए। बा अपनो बुलाएभए, चुनेभए और विश्वासयोग्य आदमीनके सँग बिनके हराए देबैगो।”

¹⁵ बो स्वर्गदूत मोसे कही, “जौन नदिया पहिले तए देखो रहए और जोमे बो बैयर बैठी रहए, बो सारा संसारके आदमीनके, फरक जातिनके और सब भाषनके जनात हए।

¹⁶ बो समय आबैगो जब राक्षस बे दश राजनके सँग जो बक सँग हएं, बो महा व्यश्याके घृणा करंगे जो राक्षस उपर बैठी हए। बे बोमे हमला करंगे, बोके नंगा करदेहएं, बे बक बुट्टीको भाग खाए जामंगे, और बाँकी रहेभएनके बे जलाए देमंगे।

^17-18 बो बैयर जोके तए देखो रहए, बो एक बहुत बडो सहर हए जो पृथ्वीमे सब राजनमे शासन करत हए। जे सब चीज बो बैयरके भओ रहए, काहेकी परमेश्वर अपने उदेश्य पुरा करनके ताहीं उनको मनके निर्देशन करीहए। जहे कारण हए, कि बा अपनो अधिकार राक्षसके दइदइ हए ताकी बो शासन करए, जबतककी बो सब पुरा नाए हुइजाए जो परमेश्वर कही रहए।”