प्रकाश 12 - राना थारु नयाँ नियम

बैयर आदमी और अजिंगर

¹ जब बो खतम हुइगओ, तओ हुवाँ एक बादरमे भओ अचम्मोको चिन्हा देखो जाए सकत रहए। काहेकी जोनीमे एक बैयर देखा पणी, जौन अइसो लत्ता पैँधे रहए, जो सूर्य कता चम्कत रहए। बो अपनी मुणमे एक मुकुट पैँधे रहए जोमे बाह्र तारा रहएं।

² बो बैयर बच्चा पान बारी रहए, और बच्चाके जनम देनको समय आइगओ। और बो जनम देनको पिडाके कारण चिल्लात रहए।

³ बादरमे एक और चिन्हा दिखाइ दइ, एक बहुत बडो अजिंगर रहए, जो शैतान हए। जौनके सात मुण और दश सिंग रहएं, और बक मुणमे सात मुकुट रहएं।

⁴ और बक पुँछ बादर तरेको तिस्रो भागके तानके पृथ्वीमे डारदइ, और बो अजिंगर बैयरके अग्गु ठाणीगओ, ताकी बक बच्चाके जन्मतए खीना खाए जाए।

⁵ तओ बो बैयर, जम्मए जातिके लोहोको डण्डासे शासन करन बारो लौंणाके जन्म दइ, और बक लौंणाके खाए नाए पाइ। काहेकी बक लौंणाके तुरन्त छिनलओगओ और परमेश्वरको सिंहासनमे लाओगओ।

⁶ और बो बैयर एक जंगली इलाकामे भागगइ, जहाँ परमेश्वर बहेके ताहीं तयार करी रहए, कि बो हुवाँ एक हजार दुई सव साठी दिनतक पाली जाबए।

अजिंगरके स्वर्ग मैसे बाहिर फेँको गओ

⁷ परमेश्वरके मुख्य दूत मैसे एक, जौनको नाउँ मिखाएल हए, अपने अधिनमे आन बारे औ स्वर्गदूतनके सँग अजिंगरके बिरुद्ध हमला करी। और अजिंगर और बक दूत मिखाएलके बिरुद्ध लडाइ लडी,

⁸ अजिंगर युद्ध हारिगओ। अजिंगर और बक अधिनमे आन बारे दूत स्वर्गसे बाहेर निकारेगए।

⁹ जहेमारे अजिंगर और बक अधिनमे आन बारेनके पृथ्वीमे फेँको गओ। जा बडो अजिंगर बहे हए, जो बहुत समय पहिले साँपके रुपमे दिखाइ दइ रहए, जोसे शैतानको दूत या दोष लगान बारो फिर कहोजात हए। जा बहे हए जो जा संसारके आदमीनके धोखा देत आओ हए।

¹⁰ फिर मए स्वर्गसे जा बडो सब्द आत सुनो, “अब हमर परमेश्वर अपने आदमीनके बचाबैगो! अब बा अपनो शक्तिके इस्तमाल करैगो और राजाके रुपमे राज्य करैगो! अब बोको ख्रीष्ट संसारमे अपनो अधिकारको दाबी करैगो! काहेकी रातदिन हमर बिश्वासी ददाभइयनके दोष लगातए शैतान अब हमर परमेश्वरको उपस्थितिमे नाए ठाणैगो। बोके स्वर्गसे बाहिर फेँको गओ हए।

¹¹ और हमर बिश्वासी, शैतानके हराए दइ हएं। बे, बोके थुमाको खुनको शक्तिसे हराए दइ हएं, जो उन्हएं उनको पापनके छुणानके ताहीं मरोगओ रहए। बे बोके हराए दइं, काहेकी बे जा स्वीकार करतए रहे, कि थुमा उनको परमेश्वर रहए। हियाँतककी, उन्हएं सतावगओ और मारोगओ, पर बे अपनो बो स्वीकारसे पिच्छु नाए हटे।

¹² जहेमारे तुम सब जो स्वर्गमे रहात हओ, तुम्हएं आनन्दित होनके चाहो। पर तुम जो पृथ्वीमे और समुन्दरमे रहात हओ, तुम भयानक रितिसे पिडित होबैगे। काहेकी शैतान तुमर ठिन तरे गओहए, और बोको मन गुस्सासे भरोहए। काहेकी बो जानत हए, कि बोके ठिन काम करनके ताहीं जद्धा समय नैयाँ।”

¹³ जब अजिंगर समझ लइ, कि मए पृथ्वीमे गिरो गओ हओं, तओ बो अजिंगर लौंणा जन्मान बारी बो बैयरके पिछा करी।

¹⁴ पर परमेश्वरके द्वारा बो बैयरके चिल्हरियाको दुई बडे पख्ना दओगओ, ताकी बो बैयर बहे ठिहामे उणजाए जो जंगली इलाकामे बक ताहीं तयार करोगओ रहए। और हुवाँ साढे तीन सालतक बो बैयरको पालन पोषण करोगओ, ताकी अजिंगर बोके ठिन नाए पुगपाबए।

¹⁵ तओ अजिंगर बो बैयर घेन अपनो मुँहुँसे नदिया कता पानी निकारी, ताकी बहिया बोके बहाए लैजाए।

¹⁶ पर ठिक बहे समय हुवाँकी धर्ती फटीगइ और हुवाँ सबए पानी जो अजिंगरके मुँहुँसे निक्रो रहए, जमीनमे चलो गओ, और बैयरके मदत करी।

¹⁷ परिमाण स्वरूप, अजिंगर बो बैयरसे बहुत गुस्साइगओ। जहेमारे बो बैयर सन्ताननके बिरुद्ध युद्धको घोषणा करदइ। अर्थात् बे आदमीनके बिरुद्ध, जो परमेश्वरकी प्रतिज्ञानके पालन करत हएं और येशूके द्वारा सिखाओ गओ सच्चो शिक्षाके पालन करनमे मजबुत बने रहात हएं।

¹⁸ तओ बो अजिंगर चलोगओ और समुन्दरके किनारे ठाणीगओ।