लूका 1 - राना थारु नयाँ नियम

लूकाको उदेश्य

¹ बहुत जद्धा माननीय थियोफिलस, हमरे बीचमे भए घटनाके बारेमे एक विवरण सँग्रह लिखनके ताहीं बहुत आदमी कोसिस करी हएं।

² बे ठिक बहे लिखीं, जो हमके बे आदमीनसे बताओ गओ रहए। जौन बे येशूको सेवकाइके सुरुसे देखी रहएं, और जौन पिच्छु परमेश्वरको बचनको सेवक बनिगए।

³ माननीय थियोफिलस, मए फिर जे सब बातके ध्यानसे जाँच करो हओं। और मोके जा अच्छो लागो, कि मए तुमर ताहीं जा घटनाके क्रम अनुसार लिखो।

⁴ मए हियाँ जाकेमारे कहात हओं, ताकी तुमके हरेक बो बातकी पुरा सच्चाई पता चलए, जौन आदमीनसे तुमके बताओगओ हए।

जकरिया और एलीशिबा

⁵ जब राजा हेरोद, यहूदिया परदेशमे राज्य करत रहए, तओ अबियाको दलको जकरिया नाउँ भओ, एक जनै यहूदी पुजारी रहए। बोकी बैयरको नाउँ एलीशिबा रहए। और बो फिर इस्राएल देशको एक पुजारी, हारूनको पिढीसे रहए।

⁶ और बे दुनए परमेश्वरके अग्गु धर्मी रहएं, और परमप्रभुको सब आज्ञा और धार्मिक बिधि-बिधानमे निर्दोष हुइके नेँगत रहएं।

⁷ पर बिनको कोइ सन्तान नाए रहए, काहेकी एलीशिबा बाँझी रहए, और बे दोनए बुढे हुइगए रहएं।

स्वर्गदूतसे यूहन्नाको जनमकी भबिष्यबाणी

⁸ एक दिन जकरिया परमेश्वरके अग्गु यरूशलेमके मन्दिरमे, यहूदी पुजारीको रितीरिबाजको काम करत रहए, काहेकी बो हप्ता जकरियाको समुहके पुजारी, सेवा करत रहएं।

⁹ तओ यहूदी पुजारीको रितीरिबाजके अनुसार चिट्टा डरात यरूशलेमको मन्दिर भितर घुसके धुप पजारनको काम जकरियाके पणो।

¹⁰ और धुप पजारन बेरा आदमीको सारा भिड बाहिर यरूशलेमको मन्दिरके आँगनमे परमेश्वरसे प्राथना करत रहए।

¹¹ परमप्रभुको एक स्वर्गदूत धुप-वेदीको दहिना घेन ठाणो दिखाइ दइ।

¹² और जकरिया बोके देखके घबणियाइ गओ, और बहुत डराइगओ।

¹³ पर स्वर्गदूत जकरियासे कही, “मत डराए जकरिया, तेरो परमेश्वर तिर प्राथना सुनलैहए, और तेरी बैयर एलीशिबा तिर ताहीं एक लौंणा जन्माबैगी, और तए बोको नाउँ बप्तिस्मा देन बारो यूहन्ना धरीए।

¹⁴ तोके खुसी और आनन्द होबैगो, और बहुत आदमी बोको जनम्मे खुसी होमंगे काहेकी बो पैदा भओ हए।

¹⁵ काहेकी बो प्रभुके अग्गु महान होबैगो; और बो दारु और कुछु फिर नसा लगन बारी चीज नाए पिबैगो, और पहिलीसे अपनी अइयाके गरबसे बो पबित्र आत्मासे भरो होबैगो।

¹⁶ और बो इस्राएल देशके बहुत आदमीके बिनके प्रभु परमेश्वरके घेन घुमए लेबैगो।

¹⁷ बप्तिस्मा देन बारो यूहन्ना एक अइसो आदमी होबैगो, जौनके सँग परमेश्वरको वक्ता एलियाको आत्मा और शक्ति होबैगो। बो प्रभुको डगर तयार करैगो। और दौवाको मन लौंणालौंणीयाके घेन होबैगो; अनाज्ञाकारी आदमीके, परमेश्वरको ज्ञानके स्वीकार करन बारो बनाबैगो; और प्रभुके ताहीं एक योग्य प्रजा तयार करैगो।”

¹⁸ तओ जकरिया स्वर्गदूतसे पुँछी, “जा मए कैसे जानंगो, कि हमर सँग अइसो होबैगो? मए बुढो हुइगओ हओं; और मेरी बैयर फिर बुढी हुइगइ हए।”

¹⁹ स्वर्गदूत जकरियासे कही, “मए गब्रिएल हओं, मए परमेश्वरके अग्गु ठाणो रहात हओं। तिर सँग बात करन और जा अच्छो समाचार परचार करनके ताहीं मए पठाओ गओ हओं।

²⁰ और देख जौन दिनतक जा बात पुरा नाए हुइहए, बो बेरा तक तए गुँगो होबैगो, और मसक नाए पबैगो। काहेकी तए मिर, बो बचनमे बिश्वास नाए करो, जौन बचन ठिक समयमे पुरा हुइहए।”

²¹ जकरियाको आशिर्बाद लेनके ताहीं मनै मन्दिरके आँगनमे असियात रहएं, और मन्दिरमे बोके देर हुइगओ देखके बे हैरान हुइगए।

²² जब बो बाहिर निकरके आओ, तओ बिनसे मसकी नाए पाइ, और बो यरूशलेमको मन्दिरमे दर्शन देखिहए, कहिके बे बुझलैं। बो बिनके इसारा करन लगो और बो, गुँगो रहातए रहो।

²³ जब यरूशलेमको मन्दिरमे एक पुजारीके रुपमे बोको सेवाको हप्ता खतम हुइगओ, तओ बो यरूशलेम सहरसे अपन घर गइ भओ।

²⁴ कुछ दिनके पिच्छु बोकी बैयर एलीशिबा गरबबती भइ; और पाँच महिनातक दुस्रे पता नाए पामएं करके लुक्के घरमे बैठी।

²⁵ एलीशिबा कही, “प्रभु मिर उपर भलो काम करीहए, बा मिर उपर अनुग्रह करीहए। और आदमीके अग्गु मिर बाँझोपनाके दुर करीहए।”

स्वर्गदूत मरियमके अग्गु प्रकट

²⁶ जब एलीशिबाको पेटमे छय महिनाको बच्चा रहए, तओ परमेश्वर गब्रिएल स्वर्गदूतके गालील परदेशको नासरत गाउँमे पठाइ।

²⁷ बो, एक कन्या-लौंणीयाके ठिन गओ जौनको मंगनी राजा दाऊदके घरानाको योसेफ कहान बारो एक आदमीसे भओ रहए। बो कन्याको नाउँ मरियम रहए।

²⁸ और स्वर्गदूत बोके ठिन जाएके कही, “तोके अभिबादन, परमेश्वर तिर उपर बहुत बढो कृपा करीहए! प्रभु तिरसँग हए।”

²⁹ तओ बो जा बचनके सुनके बहुत घबणियाइ गइ, और सोँचन लागी, कि जा अभिबादनको अर्थ का हए।

³⁰ स्वर्गदूत बोसे कही, “मतडराबए मरियम, काहेकी तए परमेश्वरसे कृपा पाओ हए।

³¹ और देख, तए गरब होबैगो, और एक लौंणा जन्माबैगो; तए बाको नाउँ येशू धरीए।

³² बा महान होबैगो, और परमप्रधानको लौंणा कहोजाबैगो, और परमप्रभु परमेश्वर बाके बक पुर्खा, राजा दाऊद जैसो राजा बनाबैगो।

³³ और बा याकूबके पिढीके उपर सदादिन राज्य करैगो; और बाको राज्यको कभी फिर अन्त नाए होबैगो।”

³⁴ मरियम स्वर्गदूतसे कही, “जा कइसे होबैगो, मए हबए एक कन्या हओं।”

³⁵ स्वर्गदूत बोके जबाफ दइके कही, “पबित्र आत्मा तिरमे आबैगो, और परमप्रधानको शक्तिको छाहीं, तिर उपर पणैगो; जहेमारे तिरसे जनम लेन बारो लौंणा पबित्र होबैगो, बा परमेश्वरको लौंणा कहोजाबैगो।

³⁶ सुन, तिर नातेदार एलीशिबा फिर, बुढेम गरब रहए, और जो बाँझी कहीगइ रहए, हबए बक पेटमे छय महिनाको बच्चा हए।

³⁷ परमेश्वर सब चीज कर सिकतहए, कुछु फिर बाके ताहीं असम्भब नाएहए।”

³⁸ तओ मरियम कही, “देखओ, मए परमप्रभुकी दासी हओ, जैसी तुम कहेहओ, उइसी मिर सँग होबए।” तओ स्वर्गदूत बोके ठिनसे चलोगओ।

मरियम और एलीशिबाकी भेँट

³⁹ कुछ दिनके पिच्छु मरियम यहूदिया परदेशको पहाडी क्षेत्रको एक गाउँमे गइ।

⁴⁰ और जकरियाके घरमे घुसके एलीशिबाके अभिबादन करी।

⁴¹ जब एलीशिबा मरियमको अभिबादन सुनी, तओ बोको गरबको बालका उछलपणो। और एलीशिबा पबित्र आत्मासे भरीगइ।

⁴² एलीशिबा चिल्लाएके कही, “बैयरन मैसे तए धन्यकी हए, और बो बालका धन्यको होबैगो, जोके तए जनम देहए।

⁴³ मए तोके हियाँ भेँटके अपनएके सम्मानित महसुस करत हओं, मिर प्रभुकी अइया मोसे भेँटनके ताहीं आइ हए!

⁴⁴ और देख, मए तिर अभिबादन सुनतएखिना, गरबमे भओ मिर बालका आनन्दसे उछलपणो।

⁴⁵ और तए धन्यकी हए, काहेकी तए बिश्वास करो, कि प्रभु जो तोसे कही हए, बा बोके पुरा करैगो।”

मरियमकी स्‍तुतिगान

⁴⁶ तओ मरियम कही, “मए परमप्रभुको स्‍तुतिगान करत हओं,

⁴⁷ और मए मिर उद्धार करन बारो परमेश्वरमे आनन्दित हओं,

⁴⁸ काहेकी बा अफ्नी दासीकी दिनतामे कृपा-दृष्टि करीहए, देखओ, अब उप्रान्त सबए पिढीके आदमी मोके धन्यकी काहमंगे।

⁴⁹ काहेकी परमेश्वर, जो शक्तिशाली हए, बा मिर ताहीं महान काम करीहए। बाको नाउँ पबित्र हए।

⁵⁰ परमेश्वरको दया, पिढीसे पिढीतक बे आदमीके उपर बनी रहात हए, जौन परमेश्वरसे डरात हएं,

⁵¹ परमेश्वर अपनो महान सामर्थ्यके उपयोग महान काम करनके ताहीं करत हए। बा घमण्डीन्के तितरबितर करत हए।

⁵² बा सासकन्से बिनको शासन करन बारो अधिकार छिन लेतहए, और नम्रन्के सम्मान देतहए।

⁵³ भुखानेन्के परमेश्वर अच्छी चीजसे तृप्त करीहए, और धनीके परमेश्वर खाली हात पठाइ हए।

⁵⁴ बा हमर पुर्खासे करो अपन बाचा याद करीहए, अपन सेवक इस्राएल देशके आदमीनके सहयोग करनके आओ हए,

⁵⁵ बा अब्राहामके और बोके सारे पिढीके हमेसाके ताहीं दया दिखानके ताहीं याद करीहए।”

⁵⁶ मरियम एलीशिबा सँग लगभग: तीन महिना बैठके अपने घरमे लौटी।

बप्तिस्मा देन बारो यूहन्‍नाको जनम

⁵⁷ अब एलीशिबाको बच्चा होनको बेरा आओ, और बो एक लौंणा जन्माइ।

⁵⁸ परमप्रभु बोके उपर बडो दया दिखाइ हए करके एलिशिबाके परोसी और नातेदार बोके सँग रमाइं।

⁵⁹ आठौ दिनमे बे बालकाको खतना करन आए। और बालकाको नाउँ बोको दौवाको नाउँ जैसो जकरिया धरन चाँहत रहएं।

⁶⁰ और बालककी अइया एलीशिबा कही, “नाए, जाको नाउँ बप्तिस्मा देन बारो यूहन्ना होबैगो।”

⁶¹ बे एलिशिबासे कहीं, “तिर नातेदारमे अइसो नाउँ भओ, कोइ नाए हए।”

⁶² तओ बे बालकको दौवासे इसारा करके पुछीं, “तए जाको नाउँ का धरन चाँहत हए?”

⁶³ और जकरिया एक लिखन बारी पाटी मँगाइ और बोमे लिखदइ, “जाको नाउँ बप्तिस्मा देन बारो यूहन्ना हए” और बे सब छक्क पणिगए।

⁶⁴ तओ जकरियाको मुँहुँ और जिभ तुरन्त खुलीगओ; और जकरिया मस्कन लागो, और परमेश्वरको प्रसंसा करन लागो।

⁶⁵ और उनके सब परोसी डराइगए; और जे सब बात यहूदिया परदेशके पहाडी मुलुकभर फैलीगओ।

⁶⁶ और सुनन बारे सब अपने-अपने मनमे बिचार करीं, “जा लौंणा कैसो होबैगो?” काहेकी प्रभुको सामर्थ्य बालकाके सँग रहए।

जकरियाको स्‍तुतिगान

⁶⁷ और बोको दौवा जकरिया पबित्र आत्मासे शक्ति पाएके अगमबाणी बोलन लागो,

⁶⁸ “धन्य हए प्रभु, इस्राएल देशको परमेश्वर! बा अपने प्रजाके ठिन आओ हए, और बिनको उद्धार करीहए।

⁶⁹ और बा हमरे ताहीं शक्तिशाली मुक्ति देन बारो पठाइ हए, जो परमेश्वरको दास राजा दाऊदको पिढी हए।

^70-71 बहुत पहिले, प्रभु अपन पबित्र अगमबक्तासे कही, कि बा हमके हमर शत्रुसे और बे सब शक्तिसे उद्धार करैगो, जौन हमसे घिणना करत हएं।

⁷² बा हमर पुर्खान्के दया दिखानके, और अपनो पबित्र करार याद करनके ताहीं आओ हए।

^73-74 बा हमरे पुर्खा अब्राहामसे कसम खाएके, बाचा करीभइ बचन पुरो करके, बा हमएं हमरे शत्रुसे छुणाबैगो, ताकी हम बिना डरसे जीवित परमेश्वरको सेवा करपामएं।

⁷⁵ जब तक हम जिमंगे तबतक पबित्रतामे और धार्मिकतामे बाके अग्गु बाको सेवा कर पामएं।

⁷⁶ बो बालका परमप्रभु परमेश्वरको अगमबक्ता कहोजाबैगो, काहेकी बो परमप्रधानको डगर तयार करैगो।

⁷⁷ बो अपन आदमीनके पाप क्षमा द्वारा उद्धारको बारेमे ज्ञान देबैगो।

⁷⁸ जा हमर परमेश्वरको कोमल दयासे होबैगो; जैसी दिन हमके प्रकाश देनके ताहीं चम्कत हए, उइसीयए येशू फिर हमरे ठिन स्वर्गसे आबैगो।

⁷⁹ और अन्धकारमे और मौतकी छाहीँमे बैठन बारेके प्रकाश देबैगो। जहे प्रकाश हमके जीबनमे मार्गदर्शन करैगो, जौन हमके परमेश्वरके सँग शान्ति देतहए।”

⁸⁰ और बो बालका बप्तिस्मा देन बारो यूहन्ना बढतए और बलियो होतए गओ, और इस्राएल देशके आदमीके बीचमे शिक्षा देनके दिनतक जंगली इलाकामे रहो।