यूहन्ना 14 - राना थारु नयाँ नियम

चेलनके येशूको हौसला

¹ येशू चेलनसे कही, “तुम दुख मत् मानओ। तुम अपन भरोसा परमेश्वरमे करओ और मोएमे फिर करओ।

² मिर दौवा परमेश्वरके घरमे बैठन बारे बहुत ठिहा हएं और मए तुमर ताहीं ठिहा तयार करन डटो हओं। अगर उइसो नाए हुइतो कहेसे मोके तुमर ताहीं जा बात कहानए नाए पणतो।

³ तुमर ताहीं ठाउँ तयार करके मए घुमके आमंगो और तुमके मेरे सँग रहानके ताहीं अपने ठिन लैजामंगो, ताकी जहाँ मए रहामओं हुवाँ तुम फिर रहाबओ।

⁴ जहाँ मए जात हओं, तुम बो ठाउँमे जान बारो डगर जन्त हओ।”

येशू इकल्लो एक डगर

⁵ थोमा येशूसे कही, “हे प्रभु, तुम कहाँ जात हओ, बो हमके पता नाए हए कहेसे तुम जान बारो ठाउँकी डगर हम कैसे पता पएहएं?”

⁶ येशू बिनके जबाफ दइके कही, “मए बो डगर और सच्चाई हओं, जो जीबन देतहए। मोए बिना कोइ फिर दौवाके ठिन नाए आए पएहए।

⁷ तुम मोके सच्चो रुपसे चिन्ते कहेसे मिर दौवाके चिनजैते। अबसे तुम मिर दौवाके चिन्हैगे काहेकी तुम परमेश्वरके देखडारे हओ।”

⁸ फिलिप येशूसे कही, “हे प्रभु, हमके दौवाके दिखाए देओ, जहेमे हम संतुष्ट हुइ जामंगे।”

⁹ येशू बिनसे कही, “फिलिप! इत्तो दिनतक मए तुमर सँग रहो, तहुँफिर तुम मोके नाए चिनपाए? जौन मोके देखो हए, बो मिर दौवाके फिर देखडारी हए। मोके देखके फिर, तए मोसे काहे दौवाके दिखाएदे कहात हए?”

¹⁰ का तुम बिश्वास नाए करत हओ, कि मए दौवामे हओं और दौवा मोएमे हए? मए तुमसे जे बात अपनएसे नाए कहो हओं पर दौवा मोएमे रहिके बहे करत हए, जो दौवा चाँहत हए।

¹¹ मोके बिश्वास करओ, कि मए दौवामे हओं, और दौवा मोएमे। नत, जो शक्तिशाली चमत्कार मए करो हओं बहीं काम देखके बिश्वास करओ।

येशूके नाउँसे प्राथना

¹² नेहात्तओ मए तुमसे कहात हओं, मोएमे बिश्वास करन बारे मए करोजैसो काम करैगो, और बोसे फिर बडो-बडो शक्तिशाली चमत्कार करैगो काहेकी मए दौवा ठिन जाएरहो हओं।

¹³ तुम मेरे नाउँमे जो माँगैगे, बहे मए देमंगो काहेकी लौंणाके द्वारा दौवाकी महिमा होए।

¹⁴ अगर तुम मेरे नाउँमे जो कुछ फिर माँगैगे कहेसे मए बो देमंगो।

पबित्र आत्माको प्रतिज्ञा

¹⁵ अगर तुम मोके प्रेम करत हओ कहेसे, जो आज्ञा मए तुमके दओ हओं बोके फिर पालन करओ।

¹⁶ मए दौवासे प्राथना करंगो, और परमेश्वर तुमर ताहीं एकजनै सल्लाहकार पठाए देबैगो, और बा सदा दिन तुमर सँग रहाबैगो।

¹⁷ बा बो आत्मा हए जो परमेश्वरके बारेमे सच्चाईके प्रकट करत हए। पर संसार बाके नाए पाबैगो काहेकी संसार बाके नए देखत हए नए चिन्त हए। पर तुम बाके चिन्त हओ काहेकी बा तुमरी सँग रहात हए और बा तुमरी भितर बास करैगो।

¹⁸ “मए तुमके अनाथ नाए छुणेहओं। मए तुमर ठिन घुमके आमंगो।

¹⁹ जल्दीयए संसार मोके फिरसे नाए देखपएहए, पर तुम मोके देखैगे काहेकी मए फिरसे जिन्दा हुइ जामंगो। और जहेमारे तुम फिर जिन्दा रहाबैगे।

²⁰ जब मए मारके जिन्दा हुइके लौटके आमंगो तओ तुम जान लेबैगे, कि मए मिर दौवामे हओं और तुम मोएमे और मए तुमरमे हओं।

²¹ जौन मिर आज्ञाके जान्त हए और बोके पालन करत हए कहेसे बो मोके प्रेम करत हए, और जो मोसे प्रेम करैगो बोके मिर दौवा फिर प्रेम करैगो, और मए फिर बोके प्रेम करंगो, और मए अपनए बोमे दिखाइ पणंगो।”

²² यहूदा इस्करियोत नाए, बल्कि औरो यहूदा कहान बारो चेला येशूसे कही, “हे प्रभु, काहे तुम हमर ठिन इकल्लो अपनएके प्रकट करैगे, और संसारके आदमीके ठिन काहे प्रकट नाए होबैगे?”

²³ येशू बाके जबाफ दइके कही, “जौन मोके अपनए कता प्रेम करैगो, बो मिर बचनको शिक्षाके पालन करैगो कहेसे मिर दौवा बाके प्रेम करैगो, और हम बोके ठिन आमंगो, और बोके सँग रहामंगे।

²⁴ जो मोके प्रेम नाए करत हए, बो मिर बचनके आज्ञापालन नाए करत हए और जो बचन तुम सुनत हओ बे मए अपनएसे नाए कहो हओं पर मोके पठान बारो दौवासे आओ हए।”

²⁵ “तुमरी सँग रहात पेती मए तुमसे जे बात कहो हओं।

²⁶ पर सल्लाहकार, अर्थात् पबित्र आत्मा, जौनके दौवा मेरे ठिहाके लेनके ताहीं पठाबैगो, पबित्र आत्मा तुमके सब बात सिखाबैगो, और जो कुछ मए तुमसे कहो हओं, पबित्र आत्मा तुमके सब बातको याद करबाबैगो।”

येशूको शान्तिको उपहार

²⁷ “मए तुमके शान्ति देत हओं जौन शान्ति मोएमे हए। जा बो शान्ति नाए हए जो संसार देतहए, तुम दुखी मतहोबओ और मतडराओ।

²⁸ ‘मए हियाँसे जानडटो हओं और फिरसे तुमर ठिन घुमके आमंगो’ कहिके मए कहो बात त तुम सुनिलए हओ। तुम मोके सच्चो रुपसे प्रेम करेहुइते त मए दौवा ठिन जात पेती तुम खुसी हुइते काहेकी मोसे त दौवा महान हए।

²⁹ और मए जे सब बात होनसे पहिली तुमसे कहीदओ हओं और जे बात पुरा होत पेती तुम मोएमे बिश्वास करैगे।

³⁰ मेरे ठिन तुमसे बात करनके ताहीं जद्धा समय नाए हए, काहेकी संसारको सासक शैतानको शक्ति आनडटो हए। और बोको शक्ति मोके कुछु नाए कर्पएहए।

³¹ मए उइसीयए करत हओं, जैसे दौवा मोके आज्ञा देत हए। ताकी संसारके आदमीनके पता चलए, कि मए दौवासे प्रेम करत हओं। उठओ, अब हम जा ठिहासे जामएं।”