यूहन्ना 12 - राना थारु नयाँ नियम

बेथानियामे येशू

¹ यहूदीनको निस्तार तेवहारके छय दिन अग्गु येशू फिरसे बेथानिया गाउँमे आओ। बहे गाउँमे येशू लाजरसके मरो भओ मैसे जिन्दा करी रहए।

² जब येशू आओ तओ खुसीसे मार्था और मरियम बाके ताहीं खाना तयार करीं। और मार्था येशूको सम्मान करनके ताहीं सेवा करत रहए। और लाजरस येशूके सँग खानु खान बारो मैसे एक रहए।

³ बहे बेरा मरियम लगभग आधो लिटर शुद्ध जटामासीको तेल येशूके पाउँमे अख्नाइ, और अपन बारसे बाको टाँग पोँछी, और जटामसीको तेलसे पुरो घर महाकीगओ।

⁴ तओ येशूको चेला मैसे एक जनै, बाके पकणान ढुँणन बारो यहूदा इस्करियोत कही,

⁵ “जा जटामसीको तेल तीन सओ चाँदीको सिक्कामे बेँचके जा रकम गरीबके दएसे हुइजैतो, काहे नाए दए?”

⁶ पर यहूदा इस्करियोत गरीबके प्रेम करके अइसो नाए कही रहए, पर चुट्टाके कारणसे अइसो कही रहए और रुपैयाकी थैली बहेके धरन दओगओ रहए और बो थैलीसे रुपैया निकारे करत रहए।

⁷ येशू कही, “हुइगओ, बोसे कुछ मत् कहाओ! बो पहिलीयए मोके दफ्नानके तयारीके ताहीं अइसो करी हए।

⁸ काहेकी गरीब त सब दिन तुमर सँग रएहएं, पर मए त सब दिन तुमर सँग नाए रएहओं।”

लाजरसके मारनके षडयंत्र

⁹ जब यहूदीन मैसे साधारण आदमी सुनिं, कि येशू हुवाँ हए। तओ आदमीको एक बणी भिड बो ठिहामे आइ। बे केबल येशूके नाए बल्कि लाजरसके फिर देखन आए रहएं, जौनके येशू मरो भओ मैसे जिन्दा करी रहए।

¹⁰ जहेमारे मुखिया यहूदी पुजारी लाजरसके फिर मारनके ताहीं फैसला करीं।

¹¹ काहेकी लाजरसके मारे बहुतसे आदमी, यहूदी अगुवनके अस्वीकार करके येशूमे बिश्वास करन लागे रहएं।

यरूशलेममे येशूको स्वागत

¹² आन बारो कलके दिन यहूदीनके निस्तार तेवहारमे आइभइ बणी भिड येशू यरूशलेम सहरमे आत हए, करके सुनीं।

¹³ बे आदमी खजुरियाक हँगा लैके बाके स्वागत करत चिल्लान लागे, “होसन्ना! प्रभु परमेश्वरको नाउँमे आन बारो इस्राएल देशको महाराजा कित्नो धन्यको हए!”

¹⁴ तओ यरूशलेम सहरमे पुगतए येशू गदहाको एक बछ्रा उपर चढके आओ। जैसे पबित्र-शास्त्रमे फिर अइसो लिखो रहए,

¹⁵ “हे सियोनकी लौंणीया, मत् डराए। देख, तेरो राजा गदहाको बछ्राके उपर सवार हुइके आएरहो हए!”

¹⁶ येशूके चेला जा बात पहिले नाए समझ पाइं, पर जब येशूको महिमा प्रकट भओ, तओ बिनके समझमे आओ, कि जो कुछ फिर येशूके सँग भओ, बो ठिक रहए, जैसो कि पबित्र-शास्त्रमे कहोगओ रहए।

¹⁷ तओ भिडके आदमी, जौन बो बेरा बाके सँग रहएं, जा गवाही देन लागे, कि बा लाजरसके चिहान मैसे बुलाइ, और बोके जिन्दा करदइ।

¹⁸ बहुतसे आदमी येशूके मिलनके ताहीं आए, काहेकी बे जा शक्तिशाली चमत्कारके बारेमे सुनी रहएं।

¹⁹ जहेमारे फरिसीनको समुह एक-दुस्रेनसे कहान लागे, “देखओ, हम कछु नाए करपए हएं। बक देखओ, पुरा संसार बाके पिच्छु चलदइ हए।”

अपनी मृत्‍युको बारेमे येशूकी भबिष्यबाणी

²⁰ हुवाँ पर कुछ, ग्रीक भाषा मस्कन बारे फिर रहएं, जो यहूदीनको निस्तार तेवहारको समयमे आराधना करनके ताहीं यरूशलेम सहरमे आए रहएं।

²¹ बे गालील परदेशके बेथसेदा गाउँके रहान बारे फिलिपके ठिन आएके अइसे कहिके बिन्ती करीं, “देखओ सँगी, हम येशूके भेँटन चाँहत हएं।”

²² फिलिप जाएके अन्द्रियाससे कही, और अन्द्रियास और फिलिप, दोनौ जाएके येशूके जा बात सुनाए दइं।

²³ जा बातमे येशू बिनके जबाफ दइ, “बो समय आइगओ हए, कि आदमीको लौंणाको महिमा, प्रकट होए।

²⁴ नेहात्तओ, मए तुमसे कहात हओं, गेहुँको दाना मट्टीमे पणके नाए मरो कहेसे बो उइसीयए रहात हए। पर अगर मट्टीमे पणके दाना मरिगओ कहेसे बो बहुत फरा फरात हए।

²⁵ उइसीयए करके, अपनो प्राणके बहुत प्रेम करन बारो बो खोए देतहए। पर अपनो प्राणके जा संसारमे तुच्छ मानन बारे कभी फिर नाश नाए होन बारो जीबनके ताहीं बो सुरक्षित रखात हए।

²⁶ कोइ मिर सेवा करहए कहेसे बो मिर चेला बननके ताहीं मिर पिच्छु लागए, तओ जहाँ मए हओं हुवाँ मिर चेला फिर हुइहए। अगर कोइ मिर सेवा करहए कहेसे दौवा परमेश्वर बोके आदर करैगो।

²⁷ अब मिर प्राण बहुत दुखी हुइगओ हए, और मए का कहामओं? ‘हे दौवा परमेश्वर, हुइहए कहेसे मोके जा दुखके समयसे बचाओ?’ पर मए जहेक ताहीं जा संसारमे आओ ताकी मए दुख सहामओं।

²⁸ हे दौवा परमेश्वर, प्रकट करओ, कि तुम कित्नो महान हओ।” तओ स्वर्गसे अइसो एक अबाज आओ, “मए प्रकट करो हओं, कि मए कित्नो महिमामय हओं, और मए जाके फिरसे प्रकट करंगो।”

²⁹ हुवाँ ठाणे भए आदमीको भिड जा अबाज सुन्त रहएं और कहीं, “जा बादर गरजो हए!” औ दुस्रे आदमी कहीं, “बाके सँग स्वर्गदूत बोली हुइहए!”

³⁰ पर येशू बिनके जबाफ दइके कही, “जा अबाज तुमके मदत करनके ताहीं बोलोगओ हए, मिर ताहीं नाए हए।

³¹ अब येशूके द्वारा जा संसारको सासक शैतानकी शक्तिके न्याय करनको समय आइगओ हए।

³² और जब मए जा संसारसे उठाओ जामंगो, तओ सब आदमीनके अपने घेन लामंगो।”

³³ अइसे कहिके येशू जा बताइ दइ, कि बा कैसे मरन बारो रहए।

³⁴ जा बातमे भिड बासे पुछी, “हमर पबित्र-शास्त्रमे हम जा बात सुनेहएं कि ‘ख्रीष्ट त सदाकाल बचो रहाबैगो’ फिर तुम काहे कहात हओ, कि आदमीको लौंणाके पृथ्वीसे ऊँचाए लैजानके जरुरी हए? जा कौन आदमीको लौंणा हए?”

³⁵ येशू बिनसे कही, “हबए थोरी देरतक उजियारो (येशू) तुमर सँग हए। उजियारो तुमरे सँग रहानतक तुम नेँगघुम करओ, ताकी अंधियारो तुमके नाए तोपए। अगर कोइ अंधियारोमे नेँगघुम करत हए कहेसे, बो नाए जान्त हए, कि बो कहाँ जाएरहो हए।

³⁶ जब तक उजियारो तुमर सँग हए, तबतक तुम उजियारोमे बिश्वास करओ, और तुम उजियारोके सन्तान बनओ।” जा बात कहिके, येशू हुवाँसे चुप्पएसे गइ भओ, और उनसे दुर रहो।

भबिष्यबाणी पुरा होनो

³⁷ येशू आदमीनके अग्गु इतनो शक्तिशाली चमत्कार करके दिखाइ, तहुँफिर आदमी बाके उपर बिश्वास नाए करीं।

³⁸ जा जहेमारे भओ, ताकी अगमबक्ता यशैया जो कही रहए बो नेहत्तओ हुइजाए। बो कही: “हे परमप्रभु, हमर शिक्षामे कोइ बिश्वास नाए करो हए, और कोइ नाए सम्झत हए, कि जा परमप्रभुको करो शक्तिशाली चमत्कार प्रकट भओ हए।”

³⁹ जहेमारे बे बिश्वास नाए करपाइं, काहेकी यशैया फिर दुस्रो चोटी अइसे कही,

⁴⁰ “परमेश्वर उनकी आँखीनके अन्धरा करदइ, ताकी बे नाए देख पामएं, और बिनको मन कठोर करदइ, ताकी बे समझ नाए पामएं। नत बे मिर घेन घुमजैते और मए उनके चंगाइ करदेतो।”

⁴¹ यशैया जा बात जाकेमारे कही, कि बो येशूकी भबिष्यकी महिमा देखी, और यशैया बाके बारेमे बात करी।

⁴² तहुँफिर बहुत यहूदी अगुवा येशू उपर बिश्वास करीं। पर फरिसीनको समुह डरके मारे बे जा बात कोइसे फिर नाए कहीं काहेकी औ आदमी जा बात पता पैते कहेसे फरिसीनको समुहके, यहूदी सभाघरसे निकार दित्ते।

⁴³ काहेकी बिनके त परमेश्वरसे जद्धा आदमीनसे पान बारो प्रसंसा अच्छो लगत रहए।

उजियारोमे नेँगनो

⁴⁴ येशू भिडके चिल्लाएके कही, “मोके बिश्वास करन बारे मोए उपर नाए, बल्कि मोके पठान बारो परमेश्वरमे बिश्वास करत हएं।

⁴⁵ और जौन मोके देखत हए, बो मोके पठान बारो परमेश्वरके देखत हए।

⁴⁶ संसारको उजियारो महीँ हओं। मोए उपर बिश्वास करन बारो कोइ फिर अंधियारोमे नाए रहाबए करके मए संसारमे आओ।

⁴⁷ अगर कोइ मिर बात सुनके बोको पालन नाए करत हए कहेसे मए बोके दोषी नाए ठहिरामंगो। काहेकी मए संसारके आदमीनके दोषी ठहिरानके ताहीं नाए, बल्कि संसारके बचानके ताहीं आओ।

⁴⁸ मिर बात सुनके फिर बिश्वास नाए करहए कहेसे बोके ताहीं एक जनै न्याय करन बारो हए। जौन बात कहो बहे बात अन्तके दिनमे न्याय करैगो।

⁴⁹ काहेकी मए अपन इच्छासे नाए बोलत हओं, पर मिर दौवा जो मोके पठाइ हए, बहे मोके अढाइ हए, कि मए का कहाओं और कैसे कहाओं।

⁵⁰ मए जान्त हओं, कि बाको आज्ञा कभी फिर नाश नाए होन बारो जीबन देतहए। बहेमारे, मए तुमके बेहीं बात बतात हओं जो दौवा परमेश्वर मोसे कही हए।”