इफिसियों 5 - राना थारु नयाँ नियम

प्रेममे चलओ

¹ तुम परमेश्वरके प्यारे बच्चा हओ, जहेमारे तुमर ब्यबहार बाके स्वभाबके अनुसार होबए।

² ख्रीष्टको उदाहरणके पालन करके दुस्रेन्के प्रति प्रेमसे भरो भओ जीबन जीबओ, जौन तुमसे प्रेम करी और तुमर पापनके उठानके ताहीं अपनएके बलिदान करके दइदइ। और परमेश्वर जा कामसे खुसी रहए, काहेकी बो बलिदान बाके ताहीं सुगंधित धुपके समान रहए।

³ ख्रीष्टके पबित्र आदमी भओके कारणसे तुमर अग्गु व्यभिचार, लोभ, लालच और सब मेलके अशुद्ध बातको नाउँ फिर नाए लेनके हए।

⁴ और कोइ फिर लाज लागन बारो बात कर्नो, व्यर्थ बातचित कर्नो और अस्लिल मजाकमे हँसनो तुमर मुँहुँमे सोभा नाए देतहए, काहेकी जा तुमर ताहीं ठिक नाए हए, पर तुमके परमेश्वरके धन्यबाद देन चाहो।

⁵ तुमके पता होनए पणैगो, कि व्यभिचार करन बारे, अशुद्ध और लोभी आदमी परमेश्वर और ख्रीष्टको राज्यमे हक नाए पाबैगो। लालची आदमी एक मूर्तिपुजकके समान हए जो जा संसारकी चिजनके आराधना करत हए।

⁶ कोइके फिर तुमके जा सुझाब दइके धोखा देन मतदेओ कि बास्ताबमे परमेश्वर बे आदमीनके दण्ड नाए देइगो जो अइसो पाप करत हएं।

⁷ जहेमारे जे पापमय कामन्के काम करनमे उनके साथ मतदेओ।

ज्योतीमे नेँगओ

⁸ तुम अपनए अन्धकारमे रहात रहओ, पर जबसे तुम प्रभुके आदमी बनेहओ, तुम ज्योतीमे हओ। जहेमारे तुमके उइसे आदमीन कता जीइन चाहो जो ज्योतिसे सम्बन्धित हएं।

⁹ काहेकी अगर कोइ आदमी ज्योतिमे हए, तओ बोको बानी अच्छो और धार्मिक होत हए और बोके उपर भरोसा करोजाए सकत हए।

¹⁰ जा सिखनके कोसिस करओ, कि का चीज हए जो परमेश्वरके खुसी करत हए।

¹¹ पापमय कामन्के काम करनमे सहभागी मतहोबओ बल्कि, आदमीनके दिखाबओ, कि जा काम खराब हए।

¹² काहेकी अबिश्वासी, गुप्तमे करेभए कामके बारेमे काहन फिर सरमकी बात हए।

¹³ पर जब दुष्ट आदमी तुमर अच्छो ब्यवहारके देखत हएं तओ उनको खराब ब्यबहार स्पष्ट हुइजात हए, जाको परिमाण स्वरुप बे अपने खराब कामके छोड देमंगे, और तुम्हएं कता अच्छे बन्जामंगे।

¹⁴ जहेमारे अइसो एक कहाइ हए, “हे सुनन बारे जगओ और मरेभएन् मैसे जीइउठओ; तओ ख्रीष्ट तुमके ज्योती देबैगो।”

बुद्धिमे चलओ

¹⁵ जहेमारे साबधानीसे ध्यान देओ, कि तुम कैसे जीबन जिइ रहेहओ, मुरख आदमी कता नाए पर बुद्धिमान हुइके नेँगओ।

¹⁶ और भलो करनके ताहीं हर अबसरके इस्तमाल बुद्धिमानीसे करओ।

¹⁷ जहेमारे मुरख मतहोबओ पर जा जानन्के ताहीं कोसिस करके बुद्धिमानी बनओ, कि प्रभु तुमसे का कर्बान चाँहत हए।

¹⁸ और दारु पिइके दरोहा बने मत् रहाओ काहेकी जा आदमीनके असभ्य, अनियंत्रित तरिकासे ब्यबहार करनको कारण बन्त हए बल्कि, पबित्र आत्माके तुम्हएं नियंत्रित करनके देओ।

¹⁹ अगर तुम पबित्र आत्माके नियंत्रणमे हओ कहेसे तुम अइसे करैगे: जब तुम इकट्ठा होइगे, तओ तुम भजन, स्तुतिगान और अन्य गीत गाबैगे जो पबित्र आत्मा हमके देतहए।

²⁰ और जो कुछ हमर प्रभु येशू ख्रीष्ट करीहए बे सब चीजके ताहीं रोज हमर दौवा परमेश्वरके, सब बातके ताहीं धन्यबाद देओ।

²¹ हम ख्रीष्ट प्रती को भक्ति करेके कारण एक-दुस्रेके अधीनमे बैठओ।

लोगा-बैयर सम्बन्धी उपदेश

²² बैयरओ, अपने लोगाके अधिनमे अइसे रहाओ जैसे तुम प्रभुके अधिनमे राहत हओ।

²³ काहेकी लोगा बैयरकी शिर हए, जैसेकी ख्रीष्ट मण्डलीको शिर हए; और ख्रीष्ट अपनए मण्डलीको उद्धारकर्ता हए, जोकी बाको अपनी शरीर हए।

²⁴ जैसी मण्डली ख्रीष्टके अधीनमे हए, उइसीयए बैयर फिर सब बातमे अपने-अपने लोगाके अधीनमे रहामएं।

²⁵ हे लोगओ, अपनी-अपनी बैयरके प्रेम करओ, जैसी ख्रीष्ट फिर मण्डलीके प्रेम करके हमर ताहीं अपनो जीबनके दइदइ।

²⁶ ख्रीष्ट मण्डलीनके पबित्र बनानके ताहीं अपनो बचनसे और बप्तिस्माको पानीसे धोएके शुद्ध बनाइ।

²⁷ बा अपनी मण्डलीनके ताहीं फिर मरिगओ ताकी बा अपने सब आदमीनके सिद्ध बनाए पाबए और बे सबके अपने उपस्थितिमे लाए पाबए, जौनन्मे कोइ दोष या पाप या कोइ औ खराब बात नाए हुइहए; बल्कि, बे पबित्र और सिद्ध होमंगे।

²⁸ अइसियए, लोगा अपनी-अपनी बैयरके अपने शरीर कता प्रेम करएं, जो अपनी बैयरके प्रेम करत हए, बो अपनएके फिर प्रेम करत हए।

²⁹ काहेकी कोइ फिर अपने शरीरके हेल्हा नाए करत हए पर अपनो शरीरके पालन पालनपोषण करत हए, जैसे ख्रीष्ट मण्डलीनको पालनपोषण करत हए।

³⁰ काहेकी हम सबए बिश्वासी ख्रीष्टके शरीरके अंग कता हएं।

³¹ जैसेकी पबित्र-शास्त्र कहात हए, “जहेमारे पुरुष अइयादौवाके छोडके अपनी बैयरसँग मिलो रहात हए, और बे दुनए एक शरीर होमंगे।

³² जा एक मुल्यवान और गम्भीर शिक्षा हए जोसे हम हियाँ समझ सकत हएं। और मेरे ताहीं, मए जाको तुलना, ख्रीष्ट और मण्डलीनसे करत हओं।

³³ पर जा तुममे फिर लागु होत हए, कि तुम मैसे हर आदमी अपने बैयरसे अपनए कता प्रेम करए, और बैयर फिर अपने लोगाको आदर करएं।”