इफिसियों 3 - राना थारु नयाँ नियमपावल गैर-यहूदी आदमीनके ताहीं परचारक 1 जहे कारणसे, मए पावल, तुमर ताहीं प्राथना करत हओं। मए जेलमे हओं काहेकी मए ख्रीष्ट येशूके ताहीं काम करत हओं, जोकी गैर-यहूदीनके ताहीं अच्छो समाचारके परचार करनके हए। 2 तुम नेहात्तओ सुने हओ, कि जा काम जो परमेश्वर मोके तुमर मदत करनके ताहीं बाकी अनुग्रहसे दइ हए। 3 जैसेकी मए छोटकरीमे तुमके पहिले लिखो रहओं, परमेश्वर अपनए मोके बो गुप्त योजनाके प्रकट करी। 4 जब तुम चिट्ठी पढैगे, तुमके जा फिर पता चलैगो, कि मए नेहात्तओकमे ख्रीष्टको रहस्यमय योजनाके बारेमे कित्नो अच्छेसे सम्झत हओं। 5 जा गुप्त योजना, बितोगओ पुस्तनके आदमीनके नाए बताओ गओ रहए, पर अब बा पबित्र आत्माके माध्यमसे अपने पबित्र चुनेभए चेला और अगमबक्तनके जा योजनाको खुलासा करी हए। 6 और रहस्य जा हए, कि येशू ख्रीष्टके सँग हमर सम्बन्धके कारण अच्छो समाचारसे यहूदीनको समुह कता गैर-यहूदी फिर बहे आशिषन्के पामंगे, और बे एकए शरीरके सदस्य हएं और परमेश्वरको करोभओ बाचन्के हिस्सेदार हएं। 7 और बाको शक्तिशाली काम अनुसार परमेश्वर मोके सेँतएमे अपनो अनुग्रह दइ, जो परमेश्वरको अनुग्रह और बडी शक्तिसे मोके काम दओगओ हए, और मोके अच्छो समाचार फैलानके ताहीं दास बनाओ गओ हए। रहस्य और उदेश्य 8 तहुँफिर मए परमेश्वरके सब पबित्र आदमीनके ताहीं सबसे कम महत्वपूर्ण हओं। परमेश्वर, अनुग्रहके द्वारा मोके जा मौका दइ, कि मए गैर-यहूदीनके अच्छो समाचार परचार करपामओं कि ख्रीष्ट असिम आशिर्बादको स्रोत हए। 9 और मए आदमीके सम्झाए सकत हओं, कि बा बे चिजनके कैसे पुरा करीहए जौननके बा पहिलीएसे करनके फैसला करी रहए। जा बहुत समय पहिले प्रकट नाए भओ रहए। काहेकी परमेश्वर, जो हर चीजको निर्माण करन बारो हए, जाके लुकाएके धरे रहए। 10 अब परमेश्वरको उदेश्य, मण्डलीके प्रयोग करके बाको बहुत मेलको ज्ञान, बे सब आत्मनके उपर प्रकट कर्नो हए, जौनको अधिकार और शासन अनदेखी संसारमे हए। 11 परमेश्वर अपनो अनन्त योजनाके अनुसार अइसे करी, और जाके हमर प्रभु येशू ख्रीष्टके माध्यमसे पुरा करी। 12 ख्रीष्ट सँग हमर सम्बन्धको कारण और बाके उपर हमर बिश्वासके कारणसे, अब हम परमेश्वरको उपस्थितिमे हिम्मत और आत्माबिश्वाससे आएसकत हएं। 13 जहेमारे मए तुमसे बिन्ती करत हओं कि जो दुख तुमर ताहीं मोके हुइ रहो हए, उनके कारण हार मत् मानओ, बल्कि तुमके सम्मानित महसुस करनके चाहो, कि मए तुमर ताहीं जे बातन्को कष्ट सहनके तयार हओं। एफिससको मण्डलीनके ताहीं प्राथना 14 जहे कारणसे, दौवा परमेश्वरके अग्गु मए प्राथना करत हओं, 15 बा बहे हए जो सबए बिश्वासीनको परिवारको दौवा हए जो स्वर्ग और पृथ्वीमे हएं। 16 मए प्राथना करत हओं, कि बाकी महिमाकी धन अनुसार शक्तिसे तुमके जा दान देबए और बाको आत्मा तुमके शान्ति देबए ताकी तुम अपनी आत्मामे मजबुत होबओ। 17 तुमके अपने दिलन्मे मजबुत होनचाहो, ताकी जब तुम ख्रीष्टमे बिश्वास करओ तओ बा तुमर दिलमे रहाए। मए प्राथना करत हओं, कि परमेश्वरके ताहीं और एकदुस्रेके ताहीं तुमर प्रेम तुमके मजबुत बनाबए और तुमके गिरनसे बचाबए। 18 और परमेश्वरके सब आदमीनके सँग, तुम जा जन पाबैगे, कि ख्रीष्ट हमके कित्नो प्रेम करत हए। बा हमके बहुत प्रेम करत हए, सिमासे फिर बाहेर। 19 तुम जान सकत हओ, कि ख्रीष्ट हमके कित्नो प्रेम करत हए ताकी परमेश्वर तुमके अपनो स्वभाबसे भर पाबए। 20 अब मए प्राथना करत हओं, कि परमेश्वर सक्षम हए। और बो हमर ताहीं बासे मागन या सोंचनसे फिर जद्धा काम कर सकत हए, बाको शक्तिके कारण जो हमर भितर काम करत हए। 21 बाको महिमा मण्डलीमे और ख्रीष्ट येशूमे सदा दिन बहुत पुस्तातक होतए रहाबए। आमेन। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation