कलस्सी 1 - राना थारु नयाँ नियम

शुभकामना

¹ परमेश्वरको इच्छा द्वारा मए पावल और हमर बिश्वासी भइया तिमोथीसँग मिलके जा चिट्ठी लिखरहे हएं, मए येशू ख्रीष्टसे चुनो भओ चेला हओं।

² ख्रीष्टमे, बे पबित्र और भरोसायोग्य बिश्वासी ददाभइयाके नाउँसे जो कलस्से सहरमे रहात हएं। मए प्राथना करत हओं, कि हमर दौवा परमेश्वर और प्रभु येशू ख्रीष्ट तुमके अनुग्रह और शान्ति देबए।

धन्यबादको प्राथना

³ जब हम तुमर ताहीं प्राथना करत हएं, हम अपने प्रभु येशू ख्रीष्टको दौवा, परमेश्वरके धन्यबाद देत हएं।

⁴ काहेकी हम सुनेहएं, कि ख्रीष्ट येशूके उपर तुमर बिश्वास हए, और सब पबित्र आदमीसे प्रेम करत हओ।

⁵ तुमर बिश्वास और प्रेम तुमर आसरामे अधारित हए, जो तुमर ताहीं स्वर्गमे धरो हए, जौनको बारेमे तुम पहिलीयए सुनडारे हओ, जब आदमी सुरुमे तुमर ठिन आए, और तुमके येशूके बारेमे अच्छो समाचार सुनाइं, जोकी परमेश्वरको सच्चो सन्देश हए।

⁶ जो तुमर ठिन पुगोहए, और जैसे पुरो संसारमे फैलरहो हए। और बहुतसे आदमी बिश्वासी हुइरहे हएं, उइसीयए जौन दिनसे तुम बो सन्देशके सुने, परमेश्वरको अनुग्रहके बारेमे सच्चो सन्देशके पुरो रुपसे बुझे, जा तुमर बीचमे अइसियए हुइ रहो हए, जब तुम पहिलो चोटी सन्देश सुने।

⁷ बहेको सन्देश तुम और हमर सँग काम करन बारो सँगी इपाफ्राससे सिखे हओ। बो हमरे बदलामे तुमर अग्गु ख्रीष्टको काम करन बारो बिश्वासयोग्य प्यारो भइया हए।

⁸ बो हमके, औ आदमीके प्रति तुमर प्रेमके बारेमे बताइ हए, जौन पबित्र आत्मा तुमके दइहए।

आत्मिक उन्नतिके ताहीं प्राथना

⁹ जहेमारे जौन दिनसे जा बात हम सुनेहएं, हम तुमर ताहीं रोज प्राथना करत आनडटे हएं, कि परमेश्वरको आत्मा तुमके बुद्धि और समझ देबए, और परमेश्वर तुमके सम्पूर्ण रुपसे बाको इच्छा बुझनके ताहीं मदत करए।

¹⁰ हम प्राथना करत हएं, कि तुम प्रभुके आदर देन बारो जीबन जिइ पाबओ, और सब बातमे प्रभुके खुसी बनाए पाबओ। और तुम लगातार सब मेलके अच्छे काम कर पाबओ, और तुम परमेश्वरके बारेमे औ जद्धा जान पाबओ।

¹¹ परमेश्वरको बडो शक्तिको भण्डारसे आओ भओ, शक्ति पाएके तुम मजबुत होबओ, कहिके मए प्राथना करत हओं। ताकी तुम धैर्य और आनन्दसे अपन दुख सहिपाबओ।

¹² और दौवा परमेश्वरके धन्यबाद करत रहाबओ, और स्वर्गके राज्यमे बाको पबित्र आदमीनके मिलन बारो चीज तुमके फिर मिलन बारो लायक बनाइ हए।

¹³ काहेकी बा हमके शैतानके शक्तिसे छुणाएके अपनो प्रिय लौंणाके राज्यमे लाइ हए।

¹⁴ बाको लौंणाको बलिदानसे परमेश्वर हमके छुटकारा दइ हए, अथवा हमर पाप क्षमा करीहए।

ख्रीष्टमे मेलमिलाप

¹⁵ कोइ परमेश्वरके नाए देख पातहए, पर जब परमेश्वरको लौंणा आदमी बनो, बा आदमीनके परमेश्वरके अग्गु प्रकट करी। और परमेश्वरसे सृष्टि भओ सब चीजके उपर बाके ठिन सबसे बडो अधिकार हए।

¹⁶ काहेकी जा ख्रीष्ट रहए, जौन सब चीज परमेश्वरके सँग मिलके सृष्टि करी रहए, बादर होए या पृथ्वी, देखन बारी होए या नाए देखन बारी, चहुँ सिंहासन होए या राजा, चहुँ प्रधानता होए या अधिकार जे सब ख्रीष्टद्वारा और ख्रीष्टके आदर देनके ताहीं बनाए गए हएं।

¹⁷ और कुछु फिर चीज सृष्टि होनसे पहिले ख्रीष्ट रहए, और सब चीज ख्रीष्टमे मिलके काम करत हएं।

¹⁸ जैसे आदमी अपन मुणसे शरीरके नियन्त्रण करत हए, उइसी ख्रीष्ट अपन मण्डलीके नियन्त्रण करत हए, बहे सुरु हए, और मरे भए मैसे जीइ उठन बारो मैसे पहिलो हए, ताकी सब बातमे बहे बडो होबए।

¹⁹ काहेकी दौवा परमेश्वरको खुसी जहेमे हए, कि परमेश्वरको पुरो सृष्टि ख्रीष्टमे बास करए।

²⁰ और परमेश्वर अपनो लौंणाके पठानके फैसला करी, जौन अपनो खुन बहाएके क्रूसमे मरो। परमेश्वर अपनएमे और सब चीजके बीचमे मेलमिलाप करन अइसो करी। अइसियए, परमेश्वर अपने सँग और बादरमे भए, सब बात और पृथ्वीमे भए सबके बीच शान्ति बनाइ।

²¹ एक समय तुम परमेश्वरसे दुर रहओ। खराब चीज सोँचके खराबए काम करके तुम परमेश्वरके दुश्मन रहओ।

²² पर परमेश्वर अपनो लौंणा ख्रीष्टके आदमी बनाइ, और हमर पापको मोल तिरनके ताहीं क्रूसमे मरो, ताकी तुमके अपने अग्गु पबित्र, शुद्ध और निर्दोष बनाएके मेलमिलाप करए।

²³ तुमर बिश्वास ख्रीष्टमे मजबुत होन पणैगो, जैसेकी एक घर बलियो जगमे बनो होतहए। जो हमरे सँग आसरा हए, और जो अच्छो समाचारमे हम बिश्वास करत हएं, बो आसराके मत् छोडओ, जौनके बारेमे बादरके तरे भए सबके परचार करोगओ हए, और मए पावल, जहे अच्छो समाचार सुनान बारो सेवक भओ हओं।

मण्डलीके ताहीं पावलको मेहेनत

²⁴ अब मए तुमर ताहीं, दुख भोगनमे खुसी मनामंगो, और आदमीके भोगन बारे दुख बहुत हएं, और ख्रीष्टको भोगो भओ दुख जैसो मए मण्डलीके ताहीं अपनो शरीरमे दुख भोगरहो हओं, जौनके पुरा करन जरुरी हए।

²⁵ परमेश्वर मोके नियुक्त करी, ताकी तुमके बाको सन्देश पुरा रुपमे सम्झाए पामओं। तभीमारे मए मण्डलीको सेवक बनिगओ।

²⁶ अर्थात् बो रहस्यके, जौन युग-युगसे और बितो भओ पुस्तासे गुप्त रहए, पर अब परमेश्वरके बे पबित्र आदमीनमे प्रकट भओ हए।

²⁷ बिनके सब गैर-यहूदीनके ताहीं धरो भओ बडो रहस्यकी बातके खोलदेनो परमेश्वरको योजना हए। रहस्य ख्रीष्ट अपनए हए, जो तुमर भितर हए। ख्रीष्टको महिमाके ताहीं हमर सिरफ एकए आसरा हए।

²⁸ जहेमारे हम सब आदमीके ख्रीष्टके बारेमे सुनात हएं। सबके ख्रीष्टमे बलियो बनाएके परमेश्वर ठिन पुगान हम सब किसिमके ज्ञान बुद्धिसे आदमीके होसियार करतए बिनके शिक्षा देत हएं।

²⁹ जाके पुरा करनके ताहीं मए बहुत मेहेनत और संघर्ष करत हओं। बो शक्तिको प्रयोग करतए, जो शक्ति मोके ख्रीष्ट देतहए, और जौन शक्ति मोएमे काम करत हए।