प्रेरित 4 - राना थारु नयाँ नियम

यहूदी सभाघरके अग्गु पत्रुस और यूहन्ना

¹ पत्रुस और यूहन्ना आदमीनके सँग मस्कत रहएं, तब्ही यहूदी पुजारी, मन्दिरके कप्तान और सदुकीनको समुह उनके ठिन आए।

² बे दिक्काने रहएं, काहेकी दुई चुनेभए चेला आदमीनके सिखात रहएं, कि जो आदमी मरिगओ हए परमेश्वर बाके फिर जिन्दा करदेबैगो, जैसे बा येशूके मरो भओ मैसे फिर जिन्दा करी।

³ तओ बे उनके पकणीं, और दुस्रे दिनतक थानामे धरेरहे, काहेकी बो बेरा संझा हुइगओ रहए।

⁴ तओ बचन सुनन बारे मैसे येशूमे बहुत बिश्वास करीं, और हुवाँ जम्मा मिलाएके लगभग: पाँच हजार लोग आदमी रहएं जो येशूमे बिश्वास करन बारे हुइगए।

⁵ दुस्रे दिन भोरभए उनको यहूदी अगुवनको समुह, पुर्खा और मोशाको नियम कानुन सिखान बारे महाट्टर यरूशलेम सहरमे एक ठाउँमे जमा भए।

⁶ जा सभामे भए आदमी हन्नास कहान बारो प्रधान यहूदी पुजारीके भेँट करीं और बोके नातेदार पणन बारे कैयाफा, यूहन्ना, अलेक्जेन्डर और हन्नासके घरानाके औ आदमी फिर जमा भए रहएं।

⁷ बे पत्रुस और यूहन्नाके बीचमे ठणबाएके पुँछन लागे, “जा आदमीके अच्छो करनके ताहीं कौन तुमके शक्ति और अधिकार दइ?”

⁸ तओ पबित्र आत्मासे भरके पत्रुस बिनसे कही, “आदमीनके सासक और यहूदी अगुवनको समुहओ,

⁹ हम एक कमजोर आदमीको भलाइ करेहएं और आज हमसे पुछो जाए रहो हए, कि बो कैसे अच्छो भओ।

¹⁰ तुम सबए और सारा इस्राएल देशके आदमीनके पता होए, कि जा नासरत गाउँमे रहान बारो येशू ख्रीष्टके नाउँमे करोगओ हए। बहे येशू ख्रीष्टके तुम क्रूसमे टाँग दएरहओ, पर परमेश्वर बोके मरे मैसे फिरके जिन्दा करी। आज बाके नाउँके द्वारा जा आदमी तुमर अग्गु अच्छो हुइके ठाणो हए।

¹¹ ख्रीष्ट येशू बो पत्थर हए, जौनके तुम राजमिस्त्री इन्कार करे रहओ, बहे पत्थर जगको मुख्य पत्थर बनो।

¹² और येशू बाहेक औ कोइमे मुक्ति नाए हए, काहेकी येशूको नाउँ बाहेक बादर तरे औ कोइ नाउँ नाए दइ हए, जौनके द्वारा हम मुक्ति पान सकएं।”

येशूको नाउँके ताहीं चेलनको धम्की

¹³ जब बे पत्रुस और यूहन्नाको हिम्मत देखीं और जे, अनपड और साधारण आदमी हएं करके पता पाइं, तओ बे अचम्मो मानिगए। तओ पत्रुस और यूहन्ना फिर येशूके सँगमे रहात रहएं करके बे पता पाइं।

¹⁴ पर बो अच्छो भओ लंगणाके पत्रुस और यूहन्ना सँग ठाणो देखके बे उनसे कुछु नाए कहीपाइं।

¹⁵ तभीमारे बे पत्रुस और यूहन्नाके, यहूदी सभाघरसे बाहिर जानके आज्ञा करीं और बे मिलके अइसे सल्लाहा करन लागे,

¹⁶ “जे आदमीनके अब हम का करएं? काहेकी नेहात्तओ जिनसे एक चमत्कारको काम भओ हए करके यरूशलेम सहरमे रहान बारे सबके पता हुइगओ हए, और हम जाके इन्कार नाए करपएहएं।

¹⁷ पर जा बात आदमीमे नाए फैलए करके ‘येशूके बारेमे अबसे कुछु बात फिर कोइसे मत् बुलियओ’ कहिके हमएं उनके चेतावनी देन पणैगो।”

¹⁸ तओ पत्रुस और यूहन्नाके बुलाएके अब उप्रान्त येशूके नाउँमे मत् बुलियओ और कोइ शिक्षा मत् दियओ करके कडा चेतावनी दइ।

¹⁹ तओ पत्रुस और यूहन्ना बिनके जबाफ दइके कहीं, “तुमर कही बात मानएं, कि परमेश्वरकी कही बात मानएं, परमेश्वरके अग्गु का ठिक हए? तुम अपनए बिचार करओ।

²⁰ काहेकी हम त अपन आँखीसे देखी और कानसे सुनी बात कहे बिना हम चुप नाए बैठंगे।”

²¹ बिनके सजाय देनके कोइ उपाए नाए हुइके बिनके औ जद्धा धमकाएके छोडदइं, काहेकी जो घटना घटो रहए बहेके ताहीं सब आदमी परमेश्वरके आदर करत रहएं।

²² काहेकी जौन आदमी चमत्कारको काम द्वारा अच्छो भओ रहए, बोको उमर चालिस बर्षसे जद्धा रहए।

सहास पानके ताहीं चेलनको प्राथना

²³ पत्रुस और यूहन्ना छुटके अपन सँगीनके ठिन आए, और जो कुछ मुखिया यहूदी पुजारी और यहूदी अगुवनको समुह कही रहएं, बे सब बात बिनके बताए दइं।

²⁴ जब बे जा सुनीं, तओ बे एक सँग परमेश्वर घेन उँचो अबाज निकरके कहीं, “हे प्रभु, तुम बहे हओ जौन बादर, पृथ्वी, समुन्दर और बिनमे भए सबए चीज बनाए।

²⁵ जौन, पबित्र आत्मासे अपन सेवक हमर पुर्खा दाऊदके मुँहुँसे कही, ‘गैर-यहूदी काहे दिक्कात हएं, और देश-देशके आदमी काहे बिना कामको षड़यन्त्र बनात हएं?

²⁶ मुक्ति देन बारो ख्रीष्ट प्रभु और बाके अभिषेक करेभए आदमीके बिरोधमे पृथ्वीके राजा एकजुट भए, और सासक एक ठाउँमे इकट्ठा हुइगए।’

²⁷ काहेकी नेहात्तओ तुमर द्वारा अभिषेक करोभओ पबित्र सेवक येशूके बिरुद्धमे राजा हेरोद और पन्तियस पिलातस फिर गैर-यहूदी और इस्राएल देशके आदमीनके सँग जा सहरमे इकट्ठा भए।

²⁸ पर बे बहे करीं जो तुमर सामर्थ्य और इच्छासे पहिलीए तयार करलै रहए, कि होनए पणो।

²⁹ अब हे प्रभु बिनको धम्कीके सुनओ और तुमर सन्देशके सहाससे परचार करन अपने सेवकनके शक्ति देओ।

³⁰ और अच्छो करनके ताहीं अपनो हात बढाओ ताकी चमत्कारी चिन्हा और चमत्कारको काम तुमर पबित्र सेवक येशूके द्वारा करे जाएं।”

³¹ जब बे प्राथना करडारीं तओ जहाँ बे जमा भए रहएं, बो ठाउँ हालिगओ। और बे सब जनै पबित्र आत्मासे भरिगए और बे परमेश्वरको बचन हिम्मतसे सुनातए रहे।

बिश्वासीनको साझा सम्पति

³² “बिश्वास करन बारेनको समुह, सबए एक ह्रदय और एक आत्माके रहएं, और बे मैसे एकफिर अपन सम्पति ‘जा मिर हए’ करके नाए कहात रहएं, पर बिनके सँगमे भओ सब चीज साझा रहए।

³³ बे चुनेभए चेला बडो शक्तिसे ‘प्रभु येशू मरके जिन्दा भओ’ कहिके गवाही देतरहे, और बिनके सबके उपर बडो अनुग्रह रहए।

³⁴ बिन मैसे कोइके कुछु चीजको कमी नाए पणत रहए, काहेकी जित्तो जनै जग्गाजमिनके और घरके मालिक रहएं, बे सब बेँच-बेँचके बोको रुपैया ल्यात रहएं,

³⁵ और बो रुपैयाके चुनेभए चेलनके दइ देत रहएं और जौन-जौनके जो-जो चीजको कमी पणत रहए, बोके अनुसार सबएके बाँटदेओ करत रहएं।

³⁶ योसेफ नाउँ भओ एक आदमी रहए। बो लेबी घरानाको रहए और साइप्रसके टापूसे रहए। चुनेभए चेला बोसे बारनाबास कहिके बुलात रहएं, जौनको अर्थ हए, एक अइसो आदमी जो दुस्रेनके उत्साहित करत हए।

³⁷ बे अपन जमिन बेँचके रकम ल्याइं और आदमीनके बाँटनके ताहीं चुनेभए चेलनके दइ दइं।”