प्रेरित 3 - राना थारु नयाँ नियम

एक लंगणा आदमी अच्छो भओ

¹ पत्रुस और यूहन्ना दुपहारके तीन बजे प्राथनाके समयमे मन्दिरमे जात रहएं।

² एक आदमी जो जल्मतको लंगणा रहए बोके मन्दिरको फाटकमे लैजात रहएं। रोजदिन बोके जा फाटकके किनारे बैठाओ जात रहए, जा फाटकके सुथ्रो फाटकके नाउँसे चिन्हो जात रहए। जौन-जौन आदमी फाटक भितर जात रहएं, बो लंगणा हुवाँ बैठके बिनसे भिख माँगे करत रहए।

³ जब बो पत्रुस और यूहन्नाके मन्दिरमे घुसत देखी तओ उनसे बो भिख माँगी।

⁴ पत्रुस और बप्तिस्मा देन बारो यूहन्ना सुधए बोके घेन देखीं और पत्रुस बोसे कहीं, “हमर घेन देख!”

⁵ जा सुनके बो कुछु पएहओं कहिके आसरामे उनके देखी।

⁶ तओ पत्रुस कही, “सोनोचाँदी मिर ठिन नाएहए, पर जो मिर ठिन हए, बहे मए तोके देहओं। नासरतके येशू ख्रीष्टके नाउँमे उठ और नेँग!”

⁷ पत्रुस बोको दहिना हात पकणके बोके उठाइ। और तुरन्त बोको टाँगमे और गोलीगाँठामे तागत आइगओ।

⁸ और इक्बरी उठके ठाणिगओ और नेँगन लागो, और नेँगत और कुदत और परमेश्वरको स्तुति करत बिनके सँग मन्दिरके आँगनमे चलोगओ।

⁹ तओ सब आदमी बोके नेँगत-कुदत देखके और परमेश्वरको प्रसंसा करत देखके,

¹⁰ आदमी बोके, “मन्दिरको सुथ्रो फाटकमे भिख मागत बैठन बारो जहेहए” करके चिनीं, और बोके उपर भओ बातमे आदमी अचम्मो मानीं और चकान लागे।

मन्दिरमे पत्रुसको सन्देश

¹¹ बो अच्छो भओ आदमी सोलोमन कहान बारो पखाहोमे पत्रुस और यूहन्नाके पिच्छुपिच्छु लागो देखके सबए आदमी अचम्मो मानके दौरके आए।

¹² जा देखके पत्रुस आदमीनसे कही, “इस्राएल देशके आदमी, तुम जा बातमे काहे अचम्मो मानत हओ? हमर अपनो शक्ति और भक्तिसे हम जाके नेँगन बारो बनाए कता, तुम हमर घेन अचम्मो मानके काहे देखतहओ?

¹³ अब्राहाम, इसहाक और याकूबको परमेश्वर, हमर पुर्खाको परमेश्वरए अपनो सेवक येशूके आदर करी, पर तुम बाके मारनके ताहीं यहूदी अगुवनको हातमे सौँपदए, और जब पिलातस बाके छोडनके बिचार करी, तओ तुम बोके अग्गु अस्वीकार करे।

¹⁴ पर तुम येशूके अस्वीकार करे, जो पबित्र और धर्मी रहए। और तुम चाहे, कि एक ज्यानमाराके तुमर ताहीं छोडो जाए।

¹⁵ और जीबनको स्रोतके तुम मारे, जौनके परमेश्वर बाके मरे मैसे जिन्दा बनाइ, और हम जा बातके साक्षी हएं।

¹⁶ ख्रीष्ट येशूके नाउँमे बिश्वासके कारण जा आदमीके तुम जानत हओ, जोके तुम जा समय देख रहेहओ, जाके बल दओगओ हए। जा आदमी येशूके नाउँमे और ख्रीष्ट येशूमे बिश्वासके द्वारा बहुत अच्छो हुइगओ हए, जैसेकी तुम अपनए देखरहे हओ।”

¹⁷ “मेरे बिश्वासी ददाभइया, मोके पता हए, कि तुम और तुमर अगुवा येशूके अन्जानमे मारे। काहेकी तुमके पता नाए रहए, कि बा ख्रीष्ट रहए।

¹⁸ ख्रीष्टके दुख भोगन पणैगो और मरन पणैगो करके परमेश्वर सब अगमबक्तनके द्वारा जा बातके सत्य करके दिखाइ हए।

¹⁹ जहेमारे पाप करन छोडके परमेश्वर घेन घुमओ, ताकी तुमर पाप क्षमा करे जाएं, तओ परमेश्वरके तरफसे आत्मिक समर्थको समय आबैगो।

²⁰ और बा येशूके पठाबैगो जो ख्रीष्ट हए, जौनके बा हमर ताहीं पहिलीएसे छानी हए।

²¹ येशूके स्वर्गमे, बो समय तक रहानके जरुरी हए जब तक बे सब चिजनके परमेश्वर नयाँ नाए बनाए देए। बहुत समय पहिले परमेश्वर आदमीनके जा बात कहानके ताहीं पबित्र अगमबक्तनके द्वारा अइसे करनके प्रतिज्ञा करी।

²² मोशा कही रहए, ‘परमप्रभु परमेश्वर मोके पठाओ कता, बा तुमर बिश्वासी ददाभइयनके बीचमे मोही कता एक जनै अगमबक्ता तुमर ताहीं पठाबैगो। बो तुमसे जो-जो कहाबैगो बे सब बात तुमके सुनन पणैगो।’

²³ पर अगमबक्ताकी बात नाए सुनन बारे आदमी, परमेश्वरके आदमीनसे अलग करो जएहए और परमेश्वर उनके नाश करैगो।

²⁴ शमूएलसे लैके बोसे पिच्छुके सबए अगमबक्ता फिर जेहीँ बातनके बारेमे परचार करी रहएं।

²⁵ तुम सब बेहीं अगमबक्तनको और बहे करारके सन्तान हओ, जौन करार परमेश्वर तुमर पुर्खा अब्राहामसे अइसो करके बाँधी रहएं, ‘तेरे लौंणाके द्वारा पृथ्वीके सब परिवार आशिष पामंगे।’

²⁶ परमेश्वर अपने सेवकके मरो भओ मैसे उठाएके सबसे पहिले तुम्हएं आशिष दइ। ताकी बा तुम्रे मैसे सब जनैके तुमर पापी जीबनके छोडके परमेश्वरके घेन घुमानमे तुमर मदत कर पाबए।”