2 थेसलोनिकी 2 - राना थारु नयाँ नियम

दुष्ट आदमी

¹ हे मेरे बिश्वासी ददाभइयओ, हम अपने प्रभु येशू ख्रीष्टके दुबारा लौटनेके बारेमे, और बो समयके बारेमे कुछ लिखन हए, जब हम एकए सँग ख्रीष्टसे मिलंगे।

² अगर तुम सुनत हओ, कि प्रभुको दिन पहिलीयएसे आइगओ हए, तओ तुम मत् घबणीयाबओ या मतडराओ। काहेकी कोइ अइसो एक भबिष्यबाणीके रुपमे या एक सन्देशमे या एक कोइ चिट्ठीमे कहे सकत हए, जैसेकी बो हमरे घेनसे आओ हए।

³ पर तुम बे सब गलत बातमे बिश्वास मत् करओ, जो आदमी येशू ख्रीष्टके आनके बारेमे तुमके बताए रहे हएं। प्रभु येशूके लौटके आनसे अग्गु बो दुष्ट आदमी प्रकट नाए भएतक, एक अइसो समय आबैगो जब बहुत आदमी परमेश्वरको बिरुद्धमे बिरोध करंगे।

⁴ बो दुष्ट आदमी परमेश्वरको बिरोध करैगो और दुस्रे सब चीजके जौनके आदमी आराधना करत हएं, और परमेश्वरके रुपमे बुलात हएं। और बो अपनएके जे सबसे बडो मानैगो। हियाँतककी दुष्ट आदमी परमेश्वरको मन्दिरमे बैठैगो। और बो, आदमीके ठिन अपनएके परमेश्वर हओं कहिके कएहए।

⁵ नेहात्तओ तुमके याद हुइहए, कि जब मए तुमरसँग रहओं तओ मए तुमके घरीघरी जा बतात रहओं।

⁶ अब बो दुष्ट आदमी अभएतक नाए दिखाइ पणो हए, काहेकी कुछ अइसो हए, जो बोके रोकत रहात हए। नेहात्तओ तुमके याद हुइहए, कि बा एक हए, जो बोके रोक रहो हए। जहेमारे, जब बो समय आबैगो, जो परमेश्वर चुनी हए, तओ बो दुष्ट आदमी दिखाइ पणैगो।

⁷ काहेकी बो दुष्ट आदमीको शक्ति संसारमे गोप्य रुपमे काम कररहो हए। पर हुवाँ एक हए, जो दुष्ट कामको शक्तिके रोक रहो हए। तबतक परमेश्वर दुष्ट आदमीके रोके रएहए, जब तक दुष्टके जा डगरसे नाए हटाव जएहए।

⁸ तओ दुष्ट आदमी दिखाइ पणैगो, पर पिच्छु प्रभु येशू जब आबैगो, तओ बा एक हुकुमके द्वारा जो बाको मुँहुँसे निकरत हए और अपना आनको महिमासे दुष्ट आदमीके नाश करैगो।

⁹ दुष्ट आदमी शैतानको शक्तिके सँग आत हए बो सब मेलके झुठे चमत्कारको चिन्हा और अदभुत काम करैगो जोसे आदमी जा सोँचत लगंगे, कि जा परमेश्वर कररहो हए।

¹⁰ और बो दुष्ट आदमी हर मेलके खराब काम करैगो। और बेहीं आदमीके धोखा देबैगो जो परमेश्वरके द्वारा नाश करेजामंगे। काहेकी बे आदमी बो सत्यतामे बिश्वास करनसे अस्वीकार करत हएं, जौन सत्यता बिनके बचाए सिकत हए।

¹¹ और जहेमारे परमेश्वरके द्वारा आदमीनमे कुछ अइसो शक्ति दओ जाबैगो, जो उनके सच्चाईसे दुर लैजात हए ताकी उनके दुष्ट आदमी जो बतामएं बहे बातमे बिश्वास करएं।

¹² और परमेश्वर बे सब आदमीनको न्याय करैगो, जो येशू ख्रीष्टको सच्चो सन्देशमे बिश्वास नाए करत हएं और दुष्टके कामके प्रेम करत हएं।

मुक्तिके ताहीं छनेभए

¹³ हे मेरे बिश्वासी ददाभइयओ, हमके लगातार परमेश्वरके धन्यबाद देन पणो काहेकी परमेश्वर तुमके प्रेम करत हए। काहेकी परमेश्वर संसारको सृष्टिसे पहिले तुमके चुनलै, ताकी तुमके बचाए पाबए। बा पबित्र आत्माके कामके द्वारा जो तुमके पबित्र बनातहए और तुमर द्वारा येशू ख्रीष्टके बारेमे सच्चो सन्देशमे बिश्वास करनके द्वारा उद्धार करैगो।

¹⁴ परमेश्वर बहे अच्छो समाचारके प्रयोग करी, जौनको हम तुमके बचानके बुलाओट देनके ताहीं तुमर बीचमे परचार करे, ताकी तुम हमरे प्रभु येशू ख्रीष्टको महिमामे सहभागी हुइ पाबओ।

¹⁵ जहेमारे हे मेरे बिश्वासी ददाभइयओ, बिश्वासमे स्थिर रहाओ; और बेहीं सन्देशमे बिश्वास करत रहाओ, जो हम तुमके सिखाए रहएं जब हम तुमरसँग रहएं या जब हम चिट्ठी पठाए रहएं।

¹⁶ हम अपनए हमर प्रभु येशू ख्रीष्टसे और हमर दौवा परमेश्वरसे प्राथना करत हएं, जो हमसे प्रेम करत हएं, और जौन अपनो अनुग्रहसे हमके कभी फिर अन्त नाए होन बारो प्रोत्सहान और मजबुत आसरा दइ हए।

¹⁷ मए प्राथना करत हओं, के बे तुमर मनके उत्सहासे भरएं, और जो अच्छो हए, बोके हमेसा करतए रहानके ताहीं तुमके मजबुत करएं।