2 पतरस 2 - राना थारु नयाँ नियम

झुठे गुरु और उनको बिनाश

¹ बहुत समय पहिले इस्राएलीनके बीचमे देखा पणे झुठे अगमबक्ता कता, झुठे गुरु फिर तुमर बीचमे देखा पणंगे। बे झुठे शिक्षामे फसँगे, जो आदमीनके ख्रीष्टमे बिश्वास करनसे रोकंगे। जे झुठा गुरु, उद्धार करन बारो ख्रीष्टके अपनो मालिकके रुपमे स्वीकार करनके फिर इन्कार करंगे जो बिनको पापको शक्तिसे मुक्त करी। अइसियए बे अचानक अपनएके नष्ट करंगे।

² परमेश्वरके बहुतसे आदमी जे शिक्षनको दुष्ट कामको अनुसरण करत हएं, और बिनको करोगओ कामके कारण आदमी परमेश्वरके तरफ लैजान बारो सत्य डगरके बारेमे बदनाम करंगे।

³ जे गुरु लोभी होमंगे, और तुमसे रुपैया पानके ताहीं तुमके, बनाओ भओ कहानी सुनाएके बे तुमके धोखा देहएं। परमेश्वर बिनके सजाय देबैगो कहिके बहुत पहिले निर्णय करडारी हए, और बा जा करनके तयार हए। बा नेहात्तओ बिनके नष्ट करैगो।

⁴ तुमके पता हए, कि बहुत समय पहिले जब शैतानको दूत परमेश्वरकी बिरुद्धमे पाप करीं, तओ बा उनको करोगओ कामके कारण दण्ड दइ। तओ परमेश्वर बिनके नरकमे फेक दइ। और परमेश्वर उनके न्याय और दण्ड देन दिनतक बिनके बा अंधियारो जेलमे डारदइ।

⁵ तुमके जा फिर पता हए, कि जब बहुत समय पहिलेके आदमी परमेश्वरको डर नाए मानी, बा बिनको करोभओ दुष्ट कामके बेवास्ता नाए करी। बरु बा बिनके दण्ड देनके ताहीं पुरा संसार डुबानके ताहीं बहाड पठाइ, ताकी बे सब नष्ट होएं। पर बा धार्मिकता परचार करन बारो नोआ और औ सात आदमीनके बचाइ।

⁶ तुमके जा फिर पतए हए, कि बहुत समय पहिले सदोम और गमोराके सहारमे बैठन बारे आदमीनके परमेश्वर दोषी ठहिराइ रहए, काहेकी बे गलत काम करी रहएं। बहेमारे बा भुवा नाए होनतक बिनके पुरा रुपम जलाइ। अइसे करके बा जा दिखाइ, कि बाके सँग नाए डरान बारे आदमीनके कैसो होबैगो।

⁷ पर सदोमके नष्ट करनसे अग्गु बा लोतके बचाइ, जो एक धर्मी आदमी रहए, जब बो लोत सहर छोडके गओ तओ परमेश्वर बोके बचाइ। लोत बहुत चिन्तामे रहए, काहेकी सदोम सहरके आदमी बेसर्मी काम करीं।

⁸ लोत बे खराब आदमीनके बीचमे बैठत रहए, और हर दिन बो उनको करेभए गलत काम देखी और बिनको कहो भओ खराब बात सुनी, और बे सब बात लोतके बहुत दुखी बनाइ, काहेकी बो एक धर्मी आदमी रहए।

⁹ परमेश्वर पहिलेके समयमे करेभए जे सब काम हमके जा दिखात हए, कि धार्मि जीबन जीइन बारे आदमी समस्यामे पणत हएं तओ प्रभु परमेश्वर जरुर सुरक्षित करत हए। और हम जा फिर पक्का होन सकत हएं, कि बा सबए आदमीनको न्याय करन बारो दिन नाए आनतक बा दुष्ट आदमीनके लगातार सजाय देबैगो।

¹⁰ बा पक्कए बे झुठे गुरुनके दण्ड देबैगो, जौन अपनो दुष्ट, लाज लगन बारो इच्छा अनुसार करत हएं और बिनके उपर परमेश्वरको अधिकार भओ इन्कार करत हएं। बे हठी और अहंकारी होत हएं। बे स्वर्गमे भए महिमित प्राणीनके बारेमे अपमान करनके डरात नाए हएं।

¹¹ पर जे झुठे गुरुनसे जद्धा बलवान और शक्तिशाली स्वर्गदूत फिर बिनको अपमान नाए करत हएं, जबकी बे परमेश्वरके अग्गु स्वर्गदूतनके दोष लगात हएं।

¹² पर जे झुठे गुरु जंगली जानबर कता हएं। जे जानबर कैसे सोँचत हए करके नाए जानत हएं, और बे केबल पकणके मारन उदेश्यसे इकल्लो बने होत हएं। जे आदमी, जो बिनको दिमाकमे आत हए बहे करत हएं, और बे नाए बुझीभइ बातको फिर अपमान करत हएं। बे नेहात्तओ नष्ट होमंगे।

¹³ बिनको बिनाश बिनको करोभओ नुक्सानीको इनाम हए। बे दिनको उजियारोमे गलत सुखमे सामील होन मन पणात हएं। बे तुमर अग्गु अपमान और दाग हएं। बे तुमरसँग खाना खाएसे फिर बे छल करनके मन पणात हएं।

¹⁴ बे अपना देखेभए सब बैयरसँग व्यभिचार करन चाँहत हएं। बे पाप करन मौका ढुँणन कभु नाए छोडत हएं। बे आदमीनके धोखा देत हएं जौन ख्रीष्टके पुरा रुपमे बिश्वास नाए करत हए और बिनके पापमे डोर्यात हएं। बिनको बहुत बातनको जद्धा इच्छाके कारण, परमेश्वर बिनके सजाय देबैगो।

¹⁵ बे ठिक काम करन बन्द करदइ हएं, और बे बहे गलत काम करन सुरु करी हएं, जो बओरके लौंणा बालाम बहुत समय पहिले करी रहए। बो गलत काम करके रुपैया कमानके मन पणाइ।

¹⁶ पर जौन गलत काम बालाम करी बहेमारे परमेश्वर बोके हप्काइ। बोको गधा मानब भाषा इस्तमाल करके बोली रहए और अगमबक्ता बालामके गलत तरिकासे काम करनसे रोकी रहए।

¹⁷ जे झुठे गुरु सुखेगए पनीको कुँइँयाँ कता हएं। बे बादर कता बिना कामके हएं, जौनके पानी बर्षनसे अग्गु शक्तिशाली हबा उणाएके लैजात हए। परमेश्वर बिनके ताहीं एक ठाउँ तयार करीहए, बो पुरा अंधियारो हए।

¹⁸ जब बे आदमीनके सिखात हएं तओ बे बिना कामके और गर्बके सब्द इस्तमाल करत हएं। बे आदमीनके, अपन शरीरके चाहो भओ लाज लगन बारो काम करन सिखात हएं और बे आदमीनके फिरसे पाप करनके ताहीं धोखा देत हएं, जौन आदमी भर्खर दुष्ट जीबन शैलीके त्यागी हएं।

¹⁹ झुठे गुरु आदमीनसे कहात हएं, कि बे अपना चाहन बारो जो कोइ फिर काम करन स्वतन्त्र हएं। एक हिसाबसे बे अपनए फिर नोकर कता हएं, काहेकी बे अपनुवए पापी स्वभाबसे बिनके पापको काम करन मजबुर करत हएं। काहेकी जौन बात कोइ आदमीके जितत हए बहे बात बोके नोकर बनातहए।

²⁰ येशू ख्रीष्टके, अपनो प्रभु और मुक्तिदाता कहिके चिनहएं तओ आदमी संसारको दुष्टतासे भागंगे। पर अब बे फिरसे गलत काम करनमे सामिल हुइगए हएं, और बे गलत बात अब बिनके अधिनमे करलै हए, तभीमारे अब बे ख्रीष्टके अस्वीकार करदेनके बाद उनको अन्तिम अवस्था, उनको बिश्वासी बननसे पहिलेको अवस्थासे फिर बुरो हुइगओ हए।

²¹ मिर कहाइको अर्थ जा हए, ख्रीष्टके कभी स्वीकार नाए करोभओ आदमीसे जद्धा, ख्रीष्टके त्यागन बारे आदमीनके परमेश्वर कडा दण्ड देबैगो। अगर बे, धर्मी जीबन बितानको डगरको अर्थ का हए कहिके कभी पता नाए पैते तओ बहे ठिक रहए। अब बिनके पता हए, कि का चीज ठिक हए, पर बे चुनेभए चेलनके द्वारा सिखाओ गओ परमेश्वरको आज्ञनके इन्कार करी हएं।

²² बिनको करोभओ काम ठिक जे दुनए कहानी कहो कता हए, “कुत्ता अपना करो भओ उल्टी अपनए खान लग्जात हए।” और “कोइ आदमी सोराके हँदबाए देहए कहेसे फिरसे लौटके बो किचमे लटपटात खेलतहए।”