2 यूहन्ना 1 - राना थारु नयाँ नियमप्राचिननके तरफसे चुनेभएनके अभिबादन 1 मए, यूहन्ना मण्डलीको अगुवा जा चिट्ठी परमेश्वरके द्वारा चुनीभइ बो बैयर और बक लौंणालौंणीयाके लिखरहो हओं, मए तुमके सच्चो रुपसे प्रेम करत हओं। मए इकल्लो नाए, बल्कि सत्यके चिनन बारे सब तुमके प्रेम करत हएं। 2 हम तुमसे प्रेम करत हएं, काहेकी हम सत्य शिक्षामे बिश्वास करत हएं, और हम बो शिक्षाके सदिमानके ताहीं थामे रहात हएं। 3 दौवा परमेश्वर, और बाको लौंणा, येशू ख्रीष्टके तरफसे अनुग्रह, दया और शान्ति होबए। और जे सब चीज हमरे ताहीं हएं जौन सत्य पालन करत हएं और एकदुस्रेसे प्रेम करत हएं। ख्रीष्टको आज्ञामे चल्नो 4 मए बहुत आनन्दित भओ, जब मए जा सुनो, कि तुमर कुछ लौंणालौंणीया सत्यके पालन करके जिनडटे हएं, जौनके हमर दौवा परमेश्वर हमएं करनके कही हए। 5 अब हे बैयर आदमीउ, मए तुमसे बिन्ती करत हओं, कि हमके एकदुस्रेसे प्रेम करन चाहो। जा कोइ नयाँ आज्ञा नाएहए, बल्कि बहे आज्ञा हए, जौनके हम बहे समयसे जानत हएं जब हम ख्रीष्टके अनुसार जीबन जीइनके सुरु करे। 6 सच्चो प्रेम बहे हए, जब हम परमेश्वरकी आज्ञाके पालन करतए काम करत हएं। बहे समयसे, जब तुम ख्रीष्टके अनुसार जीबन जीइनके सुरु करे, बहे समयसे तुम सुने हओ, कि परमेश्वर आज्ञा दइ हए, कि तुमके हमेसा एकदुस्रेसे प्रेम करत रहान पणो। ख्रीष्ट बिरोधीको धोखासे होसियार 7 मए जा जहेमारे कहेरहो हओं, काहेकी बहुत आदमी जो झुठी शिक्षा दइके दुस्रेनके धोखा देत हएं, बे संसारमे हर ठिहामे गए हएं। बे कहात हएं, कि येशू ख्रीष्ट एक आदमीके रुपमे जा संसारमे नाए आओ। अगर कोइ आदमी अइसो कहात हए, बो आदमी ख्रीष्ट बिरोधी हए, जो हमेसा आदमीनके धोखा देतहए। 8 जहेमारे तुमके होसियार रहानके चाहो, कि कहुँ जे आदमी तुमके धोखा नाए देमएं। ताकी परमेश्वरको सेवाके ताहीं तुमर द्वारा करेगए कोसिस बेकाममे नाए जाएं, पर तुमके बे सब आशिष मिलैगो, जौनको प्रतिज्ञा परमेश्वर तुमसे करीहए। 9 बे आदमी जो सच्चो शिक्षासे भणकजात हएं, और ख्रीष्टको शिक्षा जैसो नाए करत हएं, बे परमेश्वरके सँग संगतीमे नाए हएं। जो कुछ ख्रीष्ट सिखाइ हए, बोके लगातार पालन करत रहाओ, और दौवा परमेश्वर, बाको लौंणा येशू ख्रीष्टके सँग संगतीमे रहे रहाओ। 10 अगर कोइ तुमर ठिन आए, और अगर बो कुछ अइसो शिक्षा दइ रहोहए, जो ख्रीष्टको शिक्षासे अलग हए, बोके घरमे मत् आनके देओ, और बोके नमस्कार करके उत्सहा मतदेओ। 11 काहेकी जो कोइ अइसो आदमीके नमस्कार करके उत्सहा देतहए, बो आदमी फिर बोकेसँग करन बारो बुराइको जिम्मेदार होत हए। अन्तिम अभिबादन 12 औ फिर बहुत बात हएं, जो मए तुमके बतान चाँहत हओं, पर मए अइसे एकए चिट्ठीमे लिखन नाए चाँहत हओं। पर आसरा हए, कि मए तुमर ठिन आमंगो, और तुमसे भेँटके बात करओं, और तओ हम एकए सँग बहुत आनन्दित होमंगे। 13 और तेरी बहिनियाके लौंणालौंणीया, जौननके परमेश्वर चुनी हए, बे तुमके नमस्कार करके पठाइ हएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation