2 कोरिन्थी 9 - राना थारु नयाँ नियम1 यरूशलेम सहरके बिश्वासीनके ताहीं दओगओ रुपैयाके बारेमे तुमके लिख्तए रहानके जरुरी नाए हए। 2 काहेकी तुममे, देन बारी चीजमे कित्नो उत्सुकता हए कहिके मए जानत हओं। जाके बारेमे माकेडोनिया परदेशके बिश्वासीनके अग्गु तुमर गर्व करतए मए कहो रहओं, कि पोर सालसे तुम अखैया परदेशके आदमी तयारी कर रहेहओ। तुमर जोससे बिन मैसे बहुतसेनके जोसिलो बनाइ हए। 3 पर तुम यरूशलेम सहरके बिश्वासीनके उपहारके रुपमे रुपैया देनके ताहीं तयार रहीयो, और मए जो कहो हओं बहे अनुसार तुम तयार रहाओ कहिके मए तीतस और दुस्रे दुई जनै बिश्वासी ददाभइयनके पठाएरहो हओं। 4 अगर माकेडोनिया परदेशके कुछ बिश्वासी मिर सँग आए और तुम उपहारके रुपमे रुपैया नाए दइपाए कहेसे तुमर बिश्वास लायकता द्वारा हम सरममे पणजामंगे, पर तुमके फिर बहुत सरम लगैगो। काहेकी हम तुमर उपर बहुत भरोसा करे रहएं। 5 जहेमारे तुमर प्रतिज्ञा करोभओ आदरमे रुपैयाको ब्यवस्था पहिलीए मिलानके ताहीं मोसे अग्गु बिश्वासी ददाभइयनके तुमर ठिन पठानके मए आवश्यक मानो। तभीमारे जा रुपैया जबरजत्ती नाए, बल्कि राजीखुसीसे दओगओ भेँटीके रुपमे तयार होबए। खुल्ला मनसे दान देनो 6 जा बात याद करओ, “थोरी बोन बारो थोरीए कटनी करत हए और प्रसस्तसे बोन बारो प्रसस्तसे कटनी करत हए।” 7 जौनके जित्का देन मन लगत हए, उत्कए देबओ। चित्त दुखाएके कोइके करकापमे पणके मतदेओ काहेकी परमेश्वर त खुसीसे देन बारेनके प्रेम करत हए। 8 परमेश्वर तुमर जरुरतसे जद्धा आशिष देन सिकत हए, ताकी तुमरसँग रोजए दिन सबए बातको आशिष प्रशस्त होए, और तुम सब असल कामके ताहीं प्रशस्त करके दइ पाबओ। 9 पबित्र-शास्त्रमे अइसो लिखो हए, “परमेश्वर गरीब आदमीनके खुल्ला मनसे देतहए, बाको धार्मिकता सदा दिन बनो रहाबैगो।” 10 परमेश्वर किसानके ताहीं बीज उपलब्ध कर्बात हए और खाना खानके ताहीं भोजन देतहए। ठिक उइसियए तरिकासे परमेश्वर तुमर स्रोत बढाए देबैगो और तुमर ताहीं खुल्ला मनसे प्रसस्त बाली उत्पादन करदेबैगो। 11 तुम सबए तरिकासे आशिषित होबैगे, और जहेमारे तुम रोजए खुल्ला मनसे देन सक्षम हओ। जब हम आवश्यकतामे पणेभए आदमीनके तुमर खुल्ला मनसे दओ भओ दान देमंगे, तओ बे परमेश्वरके धन्यबाद देमंगे। 12 काहेकी तुमर दानसे ख्रीष्टको पबित्र जनको खाँचो पुरा होबैगो। इत्कए इकल्लो नाए बल्कि जासे परमेश्वरके लगातार धन्यबाद चढाओ जाबैगो। 13 जा देन बारो सेवा तुम सत्य हओ कहिके प्रमाणित करत हए और बहुत आदमी परमेश्वरको प्रसंसा करत हएं। काहेकी तुम ख्रीष्टको अच्छो समाचार सत्य हए कहिके बिश्वास करत हओ। और तुम गरीब बिश्वासीनके और औ बिश्वासीनके खुल्ला मनसे दइके जाके पालन करत हओ। 14 बे तुमर ताहीं परमेश्वरसे प्राथना करंगे। बे तुमके प्रेम करत हएं काहेकी बे जानत हएं, कि परमेश्वर तुमर उपर अनुग्रह करीहए। 15 आबओ, कोइ फिर पुरा रुपमे ब्याख्या नाए करपान बारो बाको बरदानके ताहीं परमेश्वरके धन्यबाद देमएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation