2 कोरिन्थी 6 - राना थारु नयाँ नियम

¹ हम परमेश्वरए सँग काम करत हएं और जहे हैसियतसे तुमके बिन्ती करत हएं, तुम परमेश्वरको अनुग्रह पाएके अब बो व्यर्थ होन मतदेओ।

² काहेकी पबित्र-शास्त्रमे परमेश्वर कहात हए, “ठिक समयमे मए तिर पुकारा सुनो, और उद्धारको दिनमे मए तोए मदत करो।” सुनओ, ठिक समय अभए हए, उद्धारको दिन अभइयए हए।

पावलको कठिनाइ

³ परमेश्वरके साझेदारके रुपमे, हमर सेवामे दोष नाए मिलए कहिके हम कोइको फिर डगरमे बाधाको कारण नाए बनंगे।

⁴ पर जे सबए बातमे हम परमेश्वरके सच्चे सेवक हएं कहिके दिखात हएं; धर्यतासे कष्ट, कठिनाइ, और आफत बिपत सहिके,

⁵ कुटाइ-चुटाइमे, कैदमे, हुलदङमे, मेहेनतमे, निँधानोमे, भुँखेमे,

⁶ शुध्दतामे, ज्ञानमे, धैर्यमे, दयामे, पबित्र आत्माको अगुवाईमे, सच्चो प्रेममे,

⁷ बाको सत्य बचनमे और परमेश्वरको शक्तिमे, हम धार्मिकताके हथियार दाहिना हातमे आक्रमणके ताहीं और दिब्रा हातमे रक्षाके ताहीं प्रयोग करत हएं,

⁸ आदमी हमर प्रसंसा करनमे या बे हमके घृणा करनमे, आदमी दुस्रे जनैके हमर बारेमे अच्छे नाए हएं कहिके कहानएमे, हम इमान्दार हएं। पर बे कहात हएं कि हम झुटो हएं।

⁹ कोइ आदमी हमके नामी मानत हएं, पर कोइ आदमी हमके अन्जान मानत हएं। मरे कता होएसे फिर हम जिइए हएं, सजाय पाएसे फिर मारे नाए गए हएं।

¹⁰ हमके बहुत दुख होएसे फिर रोज खुसी हएं। हम गरीब होएसे फिर बहुतनके आत्मिक धनी बनात हएं। कुछु नाए होएसे फिर हमर ठिन सब कुछ हए।

¹¹ कोरिन्थ सहरमे रहान बारे बिश्वासीउ, हम तुमके स्पष्टसे कहिदए हएं, हम तुमके पुरो हृदयसे प्रेम करत हएं।

¹² हम तुमर ताहीं अपनो प्रेम नाए लुकाए हएं। बरु तुम हमर ताहीं अपनो प्रेम लुकाए हओ।

¹³ अब जाको बदलामे मए अपनुवए बालकन हानी कहात हओं, कि तुम फिर अपनो पुरा हृदयसे प्रेम करओ।

बिश्वासी और गैर-बिश्वासी

¹⁴ ख्रीष्टमे बिश्वास नाए करन बारेनके सँग सहभागी मतहोबओ। काहेकी धर्म और दुष्ट कामके बीचमे कोइ मेल नाए होत हए। उजियारो और अंधियारोको कोइ सम्बन्ध नाए होत हए।

¹⁵ ख्रीष्ट और शैतानको बात कैसे मिलसकत हए? बिश्वास करन बारे और नाए करन बारेनको फिर बातए नाए मिलत हए।

¹⁶ मूर्तिनसे परमेश्वरको मन्दिरसे का सम्बन्ध? काहेकी हम जीवित परमेश्वरके मन्दिर हएं, जैसे परमेश्वर पबित्र-शास्त्रमे कही हए, “मए बे आदमीनके सँग रहामंगो, और उनके बीचमे नेँगघुम करंगो; और मए उनको परमेश्वर होमंगो, और बे मेरे आदमी होमंगे।”

¹⁷ जहेमारे परमप्रभु पबित्र-शास्त्र द्वारा कहात हए, “बे गैर-बिश्वासीनके बीचसे निकरके आओ जो परमेश्वरको आज्ञापालन नाए करत हए; बिनके बीचसे तुम अलग रहाओ, अशुद्ध चीजसे दुर बैठओ, और मए तुमके ग्रहण करंगो।

¹⁸ मए तुमर दौवा होमंगो, और तुम मिर लौंणालौंणीया होबैगे; जा सर्बशक्तिमान परमप्रभु परमेश्वरको बचन हए।”