2 कोरिन्थी 5 - राना थारु नयाँ नियमहमर स्वर्गीय घर 1 काहेकी हम जानत हएं, अगर पृथ्वीमे हमर सँग भओ अस्थायी शरीर नष्ट भओ कहेसे स्वर्गमे अनन्ततक रहान बारो परमेश्वरको दओ भओ हमर घर हए, जो हातसे नाए बनाओ गओ हए। 2 नेहात्तओ हम जा शरीरमे रहानमे दुखि हएं और हम स्वर्गीय घर कता शरीर पानमे गजब इच्छा करत हएं। 3 काहेकी जब हम बो स्वर्गीय शरीर प्राप्त करत हएं, तओ हम बिना शरीरके नाए रहामंगो। 4 काहेकी हम जा शरीरमे रहातए चिन्तासे हम सुस्केरा डारतहएं। और हम जे शरीरसे छुटकारा पान नाए चाँहत हएं, पर परमेश्वर हमके स्वर्गीय शरीर देबए कहिके हम चाँहत हएं, ताकी जे शरीर मरनके बाद अनन्त जीबनमे बदल पाबए। 5 अब हमके नयाँ शरीरके ताहीं तयार करन बारो परमेश्वरए हए, जौन पक्का करनके ताहीं हमके बैनाके रुपमे पबित्र आत्मा दइ हए। 6 जहेमारे हमके पुरो भरोसा हए। हम जानत हएं, कि हम जब तक शरीरमे रहात हएं, तबतक हम प्रभुसे दुर होत हएं, जो स्वर्गमे हए। 7 परमेश्वरके देखके नाए, बल्कि हम बामे बिश्वास करके जीइत हएं। 8 हममे पुरो भरोसा हए, हम मरके जा शरीरसे अलग हुइके प्रभु सँग रहान हम चाँहत हएं। 9 जहेमारे चहुँ हम बाके सँग स्वर्गमे होमएं, चहुँ हम जा धर्तीमे होमएं, बाके प्रसन्न करन हमर लक्ष्य होत हए। 10 काहेकी हम सब एक दिन ख्रीष्टको न्याय-आसनके अग्गु खडा होन पणैगो। सब जनै जा शरीरमे होत पेती अच्छो या खराब, जो-जैसो काम करी हएं, बहे अनुसारको फल पामंगे। मेलमिलापको सेवा 11 जहेमारे प्रभुको भय मानके हम आदमीनके सच्चाईमे बिश्वास करन बिन्ती करत हएं। और परमेश्वर हमके पुरा रुपमे जानत हए। और मए आसरा करत हओं, कि तुमर बिबेकमे तुम हमके अच्छेसे चीन्हत हओ। 12 तहुँफिर हम अपनो तारिफ तुमर अग्गु नाए करत हएं, बल्कि हम अपने बारेमे तुमके गर्व करनको मौका देत हएं। ताकी तुम उनके जबाफ दइ पाबओ, जो आदमीके ह्रदयके बातमे नाए, पर बाहिरी काममे घमण्ड करत हए। 13 अगर, हमर होश ठिकानामे नाए हए, कहिके कोइ कहात हए कहेसे जा परमेश्वरके ताहीं हए, और अगर हम होसमे हएं कहेसे औरे आदमी कहात हएं कहेसे जा तुमर ताहीं हए। 14 ख्रीष्टको प्रेम हमके मजबुर बनातहए, काहेकी हमके जा निश्चय हए, कि सबए आदमीनके ताहीं एक जनै मरोके कारणसे सबए आदमी मरे। 15 ख्रीष्ट सबएके ताहीं मरो, ताकी जीइन बारे आदमी अब उइसो अपनएके खुस बनानके ताहीं इकल्लो नाए जिमएं, पर बे ख्रीष्टके ताहीं जिइमएं। ख्रीष्ट उनके ताहीं मरो और परमेश्वर बाके फिरसे जिन्दा करके पठाइ। 16 जहेमारे अबसे हम कोइके, आदमीको दृष्टिकोणसे नाए देखंगे। हम ख्रीष्टके एक समयमे आदमीके दृष्टिकोणसे देखे रहएं, पर अबसे बाके उइसे नाए देखंगे। 17 जहेमारे अगर कोइ ख्रीष्टमे बिश्वास करत हए कहेसे बो नयाँ स्वभाब पाइहए। पुरानो बितिगओ हए, देखओ नयाँ स्वभाब आइगओ हए। 18 जा सब परमेश्वरसे भओ हए, जौन हमके ख्रीष्टद्वारा अपने सँग फिरसे मेलमिलापमे लाइ, और बा हमके अपने बीचमे और आदमीनके बीचमे मेलमिलाप करान बारो सेवा दइ हए। 19 अर्थात् ख्रीष्टको करोभओ सब काम द्वारा परमेश्वर संसारको सबए आदमीनके मेलमिलापमे लानके ताहीं एक डगर बनान डटो रहए और आदमीनको पापको लेखा नाए लैके मेलमिलाप करनके बारेमे बाको सन्देशके परचार करनके ताहीं हमके सौँपदइ हए। 20 जहेमारे हम ख्रीष्टके राजदूत हएं, और परमेश्वर आदमीनके हम द्वारा बाको सन्देश स्वीकार करनके बिन्ती करनडटो हए। ख्रीष्टके पक्षमे हम तुमके बिन्ती करत हएं, कि तुम परमेश्वर सँग मेलमिलापमे आबओ। 21 ख्रीष्टमे पाप नाए रहए, परमेश्वरके नजरमे हम धर्मी बनन सिकएं कहिके ख्रीष्ट हमर पापको दण्ड लइ। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation