2 कोरिन्थी 4 - राना थारु नयाँ नियममट्टीको बर्तनमे धन 1 जहेमारे परमेश्वरको कृपा द्वारा हमर सँग परमेश्वरको बचन परचार करन बारो सेवा भओके कारणसे हम हरेस नाए खात हएं। 2 हम सरम लागन बारे काम और लुकी-छिपी करन बारो काम नाए करत हएं। हम छलकपट वा परमेश्वरको बचनमे मिलाओट करन बारो काम फिर नाए करत हएं। पर हम परमेश्वरके अग्गु सत्य इकल्लो सिखात हएं और जा सत्य हए कहिके हर आदमी गवाही देन सिकंगे। 3 अगर हमर परचार करन बारो अच्छो समाचार लुको हए कहेसे, जा नष्ट होन बरेनके ताहीं फिर लुको हए। 4 और जा संसारको देवता, शैतान बे गैर-बिश्वासीनको बुद्धिन्के अन्धरा बनाए दइ हए, ताकी बे ख्रीष्टको महिमाके बारेमे अच्छो समाचारसे आओ भओ ज्योति देख पामएं, जौन परमेश्वर कैसो हए कहिके दिखात हए। 5 काहेकी हम अपनो परचार नाए करत हएं, पर “येशू ख्रीष्टए प्रभु हए” कहान बारो बात परचार करत हएं, और हम येशूके खातिर तुमर कमैया हएं। 6 जहेमारे कि परमेश्वर कही, “अँध्यारोसे ज्योति चमकए।” और बहे परमेश्वर हमर हृदयमे ज्योति जैसो हमके समझ दइ, ताकी हम परमेश्वरको महिमाके देख पामएं जो येशू ख्रीष्टमे प्रकट होत हए। 7 और अब हमर हृदयमे हमर सँग भओ जो ज्योति चमकन डटो हए, बो शक्ति हमर नैयाँ बल्कि परमेश्वरको हए। काहेकी हम अपनए बहुमुल्य धन भओ कमजोर मट्टीके बर्तन कता हएं। 8 हम चारौ घेनसे दुख त भोगत हएं, पर संकटमे नाए पणत हएं। अन्योलमे त हएं, पर दुखी नाए होत हएं। 9 सताओ त जात हएं, पर त्यागे नाए जात हएं। प्रहार करके ढल त जात हएं, तहुँफिर नष्ट नाए होत हएं। 10 हम सब दिन अपनो शरीरके येशूको मृत्युको सम्झना कर्बात हएं। ताकी येशू कैसे जीबन बिताइ कहिके हमर शरीरके काम द्वारा हम दुस्रे आदमीनके दिखाए पामएं। 11 काहेकी हम जिन्दा हएं तहुँफिर येशूके ताहीं सब दिन मृत्युके खतरामे हएं, ताकी येशूको जीबन हमर मरणसील शरीरमे प्रकट होबए। 12 पर जाको अर्थ जा हए, कि हम लगातार मृत्युको सामना कर रहे हएं। पर जाको परिणाम जा हए, कि तुमके अनन्त जीबन प्राप्त भओ हए। 13 पर हम परचार करन निरन्तरता देमंगे, काहेकी हम फिर पबित्र-शास्त्रको लेखक कता बिश्वास करे हएं, धर्मशास्त्रको लेखक कही रहए, “मए परमेश्वरमे बिश्वास करत हओं, जहेमारे मए बोलो।” 14 काहेकी हम जानत हएं, कि प्रभु येशूके मृत्युसे जिन्दा करबान बारो हमके फिर येशू सँग जिन्दा करैगो और येशू ख्रीष्टए हमके तुमर सँग परमेश्वरके अग्गु ठाणके लैजाबैगो। 15 काहेकी हम जो सहे हएं, जे सब दुख तुम्रिए ताहीं भए हएं। ताकी जैसे बहुतसे-बहुत आदमी पता पामएं, कि परमेश्वरको अनुग्रह कित्नो महान हए, उइसीयए परमेश्वरको महिमाके ताहीं बहुत आदमी बाके धन्यबाद दइ पामएं। 16 जहेमारे हम हरेस नाए खात हएं। हमर बाहिरी मनुष्यत्व नाश होतए जातहए, तहुँफिर हमर आत्मा दिनए-दिन नयाँ होत जातहए। 17 हमर दुख अभौफिर थोरीए हएं और लम्बो समय तक नाए रहाबैगो। काहेकी बे दुख अनन्त महिमाके ताहीं होत हए, जौन हम कल्पना करन सिकनसे फिर जद्धा होत हए। 18 हम दिखान बारी बातके नाए, बल्कि नाए दिखान बारी बात देखत हएं, काहेकी दिखान बारी बात क्षणिक होत हएं, पर अदृश्य बात अनन्ततक रहात हएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation