2 कोरिन्थी 2 - राना थारु नयाँ नियम1 जहेमारे हुवाँ आएके तुमके दुख नाए देमओं कहिके मए नाए आनको फैसला करो। 2 काहेकी अगर मए तुमके दुखी बनाओ कहेसे, मेरे द्वारा दुखित बनाए गए, तुमर बाहेक और कोइ फिर मोके खुसी नाए बनाए पाबैगो। 3 और मए जो बात लिखो बो जाकेमारे लिखो, कि मए आत पेती जौन आदमीनसे मोके आनन्द मिलनके रहए बिनके द्वारा मए दुखी नाए होमओं। काहेकी, मोके आनन्द हुइहए तओ तुमके फिर आनन्द हुइहए कहिके मिर पक्को बिश्वास हए। 4 काहेकी तुमके दुखी बनानके नाए, बल्कि तुमर घेन भओ मिर प्रशस्त प्रेम तुम जानओ। काहेकी ह्रदयके बहुत पिडा और बेदनामे बहुत आँसु बहातए मए जा चिट्ठी तुमके लिखो रहओं। पापको क्षमा 5 अगर कोइ दुखको कारण हए कहेसे बो मेरे ताहीं इकल्लो नाए, पर कुछ समय तक तुम सबके ताहीं दुखको कारण भए हओ। मए जाके बारेमे जासे जद्धा और कुछु नाए कहान चाँहत हओं। 6 तुम मैसे बहुत बिश्वासीनको दओ भओ सजाय बोके ताहीं काफी हए। 7 बरु तुम बोके क्षमा करीयओ और सान्त्वना दियओ, नत्की बो बहुतए दुखी होबैगो और पानीमे डुबन डटो आदमी कता हुइ जाबैगो। 8 जहेमारे मए तुमसे बिन्ती करत हओं, कि तुम बोके अभौफिर प्रेम करत हओ कहिके पक्का करओ। 9 जहेमारे तुमके जाँचनके और मिर आदेश माननमे तुम आज्ञाकारी हओ कि नाए हओ, कहिके पता पानके ताहीं मए तुमके लिखो रहओं। 10 जौनके तुम क्षमा करैगे, मए फिर क्षमा करंगो। क्षमा करन बारो बातमे मए पहिलीए निहात्तओ क्षमा करडारो हओं। और तुमर भलाइके ताहीं ख्रीष्टके अग्गु मए क्षमा करो हओं। 11 ताकी शैतान हमर उपर मौका नाए पाबए, काहेकी हमके पाप करन लगान बारो सबए योजना बोके पता हए। नयाँ करारके सेवक 12 ख्रीष्टको अच्छो समाचार परचार करन त्रोआस सहरमे आत पेती परमेश्वर मोके अच्छो समाचार परचार करन बडो मौका दइ रहए। 13 पर हुवाँ मिर बिश्वासी भइया तीतसके तुमसे खबर नाए लात देखो, तब्ही मोके चिन्ता लागत रहए। जहेमारे त्रोआस सहरके बिश्वासीनसे छुट्टी लैके मए माकेडोनिया परदेशमे तीतसके ढुँणन लौटके आओ। 14 पर परमेश्वरके धन्यबाद होए, काहेकी हमर ख्रीष्ट सँगको सम्बन्धके मारे, परमेश्वर रोज हमके ख्रीष्टके सँग डुरीयात हए। और अब बा हमके मिठो बासना आन बारो धुप कता सब ठाउँमे ख्रीष्टको ज्ञान फैलानके प्रयोग करत हए। 15 काहेकी हम ख्रीष्ट द्वारा परमेश्वरके ताहीं जलाओ भओ धुप कता हएं। और हमसे परचार भओ सन्देश उद्धार पाएभए और नाए पाएभए सब आदमीनमे फैलन डटो मिठो बासना कता हए। 16 एकके ताहीं मृत्युको दुर्गन्ध और दुस्रेके ताहीं जीबनको सुगन्ध। नेहात्तओ कोइ फिर जा अपनए नाए फैलाए पाबैगो। 17 काहेकी तमान आदमी हानी हम परमेश्वरको बचन रुपैयाके ताहीं परचार नाए करत हएं, पर शुद्ध मनसे और ख्रीष्टको अधिकारसे हम परमेश्वरको बचन परचार करत हएं, जा जानके, कि परमेश्वर हमके देखन डटो हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation