2 कोरिन्थी 13 - राना थारु नयाँ नियम

आखिरी चिताउनी

^1-2 पबित्र-शास्त्रमे अइसे लिखो हए, “सबए दोष दुई या तीन साक्षीन्के गवाही द्वारा साबित करोजान पणत हए” जब मए दुस्रो चोटीको भेँटमे हुँवए रहओं, मए पापमय क्रियाकलाप करन बारेनके पहिलीयए चेतावनी दइडारो रहओं। पहिलेको चिट्ठीमे तुमके चेतावनी दओ कता फिरसे मए तुमके और औरेनके फिर चेतावनी देत हओं। अब मए तिस्रो चोटी तुमर ठिन आन बारो हओं, अगर बे हबए पाप करन नाए छोडी हएं कहेसे कोइ फिर दण्डसे उमक नाए पामंगे।

³ मए जा कहात हओं, काहेकी तुम जा बातको सबुत मागत हओ, कि ख्रीष्ट मिर माध्यमसे मस्कत हए। जब ख्रीष्ट तुमके सुधारत हए तओ बा कमजोर नाए होत हए, बरु बा तुमर बीचमे अपन शक्ति दिखात हए।

⁴ काहेकी कमजोरीमे ख्रीष्ट क्रूसमे टंगोगओ, पर परमेश्वरको शक्तिमे बा जिन्दा हए। अइसियए ख्रीष्ट कमजोरीमे भओ कता हम फिर कमजोर हएं, पर तुमर सँगको हमर ब्यबहार करनके परमेश्वरको शक्ति द्वारा हम ख्रीष्टएके सँग जिइमंगे।

⁵ तुम बिश्वासमे पक्के हओ कि नाए हओ कहिके अपनए-अपनएके जाँचके देखओ। अपनएके जाँचओ, कि तुमर बिश्वास सच्चो हए कि नाए हए। जाँचमे असफल नाएभए कहेसे येशू ख्रीष्ट तुमरमे हए करके तुमके पता होन रहए!

⁶ मए आसरा करत हओं, कि हम असफल नाएभए हएं करके तुम पता पाबैगे।

⁷ पर हम परमेश्वरमे प्राथना करत हएं, कि तुम कुछु खराबी मत् करओ। तुमर बीचमे हमर सेवाकाइ सफल भओ दिखानके ताहीं नाए, बल्कि अगर हम अपनए असफल दिखाएसे फिर तुम सच्चो काम करओ कहिके हम चाँहत हएं।

⁸ काहेकी हम सच्चाईके बिरुद्धमे कुछु करन करपात हएं, केबल सत्यके ताहीं इकल्लो करपात हएं।

⁹ काहेकी हम बिश्वासमे कमजोर हएं और तुम बिश्वासमे बलियो हओ कहेसे हम आनन्दित होत हएं। तुमर बिश्वासको प्रगतीके ताहीं हम प्राथना करत हएं।

¹⁰ तहिमारे मए तुमके जा बात लिखरहो हओं, जब मए अग्गु आओ रहओं ताकी प्रभु मोए तुमके दण्ड देन अधिकार दइ हए कहिके मए तुमके दिखाए पामओं। काहेकी मए अपनो अधिकार प्रयोग करके तुमके बिश्वासमे मजबुत बनान चाँहत हओं, तुमर नाश करन नाए चाँहत हओं।

आखिरी अभिबादन

¹¹ अन्तमे बिश्वासी ददाभइया, अब बिदा पामओं। सिध्दताको लक्ष्य धरओ। एक-दुस्रेके उत्साहित करओ। एक-दुस्रेके सँग सहमत होबओ। शान्तिमे रहबओ, तओ प्रेम और शान्तिको परमेश्वर तुमर सँग होबैगो।

¹² एक-दुस्रेके ख्रीष्टके प्रेमसे अभिबादन करओ।

¹³ ख्रीष्ट येशूके सबए पबित्र आदमी तुमके अभिबादन पठाइ हएं।

¹⁴ प्रभु येशू ख्रीष्टको अनुग्रह, परमेश्वरको प्रेम और पबित्र आत्माको संगती तुमर सबए सँग रहबए।