2 कोरिन्थी 12 - राना थारु नयाँ नियमपावलको देखो भओ स्वर्गीय दर्शन 1 गर्ब करनए पणहए। पर जासे कुछु फाइदा नाए होएसे फिर प्रभुसे पाओभओ दर्शन और प्रकाशके बात मए कररहो हओं। 2 ख्रीष्टमे मए एक जनै आदमीके चिन्हत हओं, जो चौधा बर्ष अग्गु स्वर्गतक उठाओ लैगओ। जा घटना घटत पेती बो अभौफिर शरीरमे रहए कि नाए रहए कहिके सो मए नाए जानत हओं, पर परमेश्वर पक्का करके जानत हए। 3 मए फिरसे कहात हओं, मए जानत हओं, कि जा आदमी स्वर्गमे उठाओ लैगओ रहए। फिर, मोके पता नाए हए, कि जा सच्मे घटो हए या जा दर्शन हए, परमेश्वर इकल्लो जानत हए। 4 और हुवाँ नाए बतान बारी बात बो सुनी, जौनको बारेमे औरेनके बतानके ताहीं आदमीनके अनुमति नाए हए। 5 जा आदमीको पक्षमे मए गर्ब करंगो, पर मिर अपनुवए बारेमे अपनो कमजोरी बाहेक और बातमे घमण्ड नाए करंगो। 6 अगर मए गर्ब करन इच्छा करंगो कहेस फिर मए मुरख नाए बनंगो, काहेकी मए सच्चो बात मसक रहो हओं। पर आदमी मोएमे देखो भओ और मोसे सुनो भओसे जद्धा कोइ मोके नाए मानए कहिके मए जा घमण्ड करनसे बचत हओं। 7 पर परमेश्वर दिखाओ भओ प्रशस्त प्रकाशके बारेमे घमण्डसे मए जद्धा नाए फुलओं कहिके मोके सतानके और घमण्डसे रोकनके शैतानको दूत बहुत अग्ठो समस्या अर्थात् एक काँटोसे छेदन बारो एक पिडा दओगओ। 8 जा मोसे हटजाए कहिके मए तीन चोटी प्रभुसे बिन्ती करो। 9 तओ मोसे परमेश्वर कही, “मिर अनुग्रह तिर ताहीं प्रशस्त हए, काहेकी मिर शक्ति कमजोरमे सिद्ध होत हए।” जहेमारे ख्रीष्टको शक्ति मोएमे बास करए कहिके मए बरु मिर कमजोरीनमे जद्धा खुसीसाथ गर्ब करंगो। 10 जहेमारे ख्रीष्टके ताहीं कमजोरीनमे, बदनामीनमे, कठिनाइमे, सतावटमे, आफतमे मए सन्तुष्ट रहत हओं। काहेकी जब मए कमजोर होत हओं, तओ मए ख्रीष्टको शक्ति द्वारा मजबुत होत हओं। कोरिन्थीनके ताहीं पावलको चिन्ता 11 मए मुरख भओ हओं। तुम मोके अइसे करनके कर लागए, काहेकी तुमरसे त मिर प्रसंसा होनके रहए। काहेकी मए कछु लायकको नाए होएसे फिर सर्वोच्च चुनेभए चेलनसे मए तुच्छ नैयाँ। 12 नेहात्तओ सच्चे येशूसे चुनेभए चेलाके लक्षण पुरा धैर्यसे, चिन्हा चमत्कार और शक्तिशाली काम द्वारा तुमर बीचमे प्रकट करेगए रहएं। 13 मए तुमर मण्डलीसे एक बात नाए करो, जौन अन्य मण्डलीनके सँग करो। बो जा हए, कि मए कभु फिर तुमर ताहीं आर्थिक रुपमे बोझ नाए बनो। का जहे तुमके तुच्छ महसुस करबाइ? तुमके जा सोँचन गलत हए, कि मए उइसो करके तुमर बिरुद्ध गलत करो हओं कहेसे मोके क्षमा करओ। 14 अब तिस्रो चोटी तुमर ठिन आन मए तयार हओं। और मए तुमसे कुछु नाए माँगंगो, काहेकी मए तुमर सम्पति नाए पर तुम्हीके चाँहत हओं। काहेकी अइयादौवाके ताहीं लौंणालौंणीया नाए, बल्कि लौंणालौंणीयनके ताहीं अइयादौवनके धन जमा करन पणत हए। 15 मए तुमर आत्माके ताहीं अपनएके और मेरे सँग भए सब चीज देनके ताहीं खुसी होमंगो, ताकी तुम परमेश्वरको अनुसरण कर्पाबओ। मए तुमके बहुत प्रेम करत हओं। पर अइसो लागत हए, कि तुम मोके थोरी प्रेम करत हओ। 16 मए तुमसे आर्थिक मदत नाए मागो, जा ठिकए हए। पर औरे आदमी सोँचत हएं, कि मए चलाँकी करके तुमके धोखा दओ, जा झुठो हए। 17 मए तीतस और कोइके तुमर सँग अपने ताहीं रुपैया पानके ताहीं प्रयोग नाए करो। 18 मए तीतसके जान कहिके बिन्ती करो, और बो बिश्वासी भइयाके बोके सँग पठाओ। का तीतस तुमसे आर्थिक सहयोग पाइ? का हम एकए उदेश्य द्वारा नाए चले? का हम एक समान काम नाए करे? 19 का तुम जा सोँच रहेहओ, कि यित्तो समय तक तुमर अग्गु हम अपनुवए सफाइ दइ रहे हएं? प्रिय हो, हम परमेश्वरको उपस्थितिमे रोजए सच्चो रुपसे ख्रीष्टद्वारा परचार करत हएं और जे सब तुमके बिश्वासमे मजबुत बनानके ताहीं हए। 20 काहेकी मोके डर हए, कहुँ अइसो नाए होए, कि मए आएके जैसो चाँहत हओं, उइसो तुमके नाए पामओं। और मोके फिर जैसो तुम नाए चाँहत हओ उइसीयए पाबओ। मोके डर हए, कि तुममे लडाइ, डाह, क्रोध, स्वार्थ, बिजरो, चुग्ली, घमण्ड और गोलमाल हुइ सकत हए। 21 कहुँ अइसो नाए होए, कि जब मए घुमके आमंगो, मिर परमेश्वर मोके अपमान करए। और मोके बहुत आदमीनके ताहीं शोक करन पडए जौन पहिले पाप करी रहएं, और अपना करोभओ अशुद्धता, व्यभिचार और छाडापनसे पाप करन छोडके परमेश्वर घेन नाए घुमी हुइहएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation